1
. Odiko sek di piny otieko ru jo dongo me Isaseredotin oko ariamakin kede oadongo me piny karacel kede joadongo me iswil karaciel kede kansulo lung, kiko tweno Yesu kiko tere iko mine icing Pilato.
2
. Pilato oko penye be, “In en ibedo abaka me Iyudayan? Di Yesu oko dwoko ne be, “In en iwaco.
3
. Jo dongo me Isaseredotin oko pide kede kope atoti, do en likame eko dwoko kop moro.
4
. Pilato bobo oko medo penye be, “Likame tie kop moro kame iromo dwoko? Winy ber kong twon kop kame otie pidi iye”
5
. Do Yesu likame oko dwoko kop moro, omio do Pilato oko uro.
6
. Bin ikare me ebaga nono oudo en egonyo negi mabus aciel, kame jo mito be egonyi.
7
. Ikare nono oudo tie dano moro anyinge Barabasi kame oudo omako karaciel kede jo oudo otimo nek ikare me logologo oudo otimere kede ipiny.
8
. Ekodet me jo oko cokere, di kilelemo itek kiko penyo en pi timo ne gi bala kite kalem etimo negi kede sek.
9
. Pilato oko penyo gi be, imitunu agony ne wu Abaka me Iyudayan?
10
. Pi en oudo engeo be jodongo me josaseredoti omio Yesu bute pi nyeko.
11
. Jodongo me josaseredoti nogo oko donyo supo cunyi ekodet pi en gonyo ne gin Barabasi.
12
. Pilato bobo oko medo penyo ekodet be, Nyo ame wun imitunu be ako timo ne ngat ame wun ilwongunu be Abaka me Iyudan?
13
. Gin kiko dwoko di kilelemo be, gure iyat aria.
14
. Pilato bobo oko penyo gi be, Pinyo nyo araci kame en etimo? Do gin kiko mede kede ilelem itek gure iyat aria.
15
. Do pi kite kame Pilato oudo mito kede yomo cuny jo omio en eko gonyo ne gi Barabasi, di eko mino kodao Yesu, di eko mino icing isirikalen pi ot gure.
16
. Isirikalen oko tere i ot adwong me apugan kiko lwongo isirikalen icegun dedede.
17
. Kiko ngapone ekanso akwakwar di kiko dolo okuto kiko ngapone iwie.
18
. Kiko cako mote be, yoga abaka me Iyudayan.
19
. Gin kiko jwate iwie kede ebela, di iko ngungulo lau ikome, di kiriondiko piny di kimie wor.
20
. Kakame gin kitieko timo ne kede tim me anywar nogo, kiko gonyo egoe akwakwar nono, di kiko ngapo ne igoen mege dido kiko tere ot gure.
21
. Kiko dino icuo anyinge Simoni pi yeno bat aria ka Yesu. En oudo eyai kipaco etie ot ibomba Simoni oudo obedo papa me Alekesanda kede Rupus.
22
. Kikotero Yesu kabedo kame kolwongo be Gologota kame dwong mere be, “kabedo me cogo”
23
. Gin kiko mine bwini kame konywalo kede maya doen gire eko dagi mato.
24
. Kakame gin kiko tieko gure kede iyat aria di kiko popoko igoen mege di kiuco, alulu pi neno gikame ngat acelacel poore tero.
25
. Kiko gure iyat aria iye esawa adek me odiko.
26
. Iwandik kame oketo malo iwie kame nyuto kop kame kopide iye yamo be, “Abaka me Iyudayan.”
27
. Di doko iko guro jo kuo are da kede acel ibade tetucam kede acel ibade ngodal.
28
. Dido iwandik kacil kame yame be, okomare di oribe ikom jo tur iswil oko cobere.
29
. Jo kame oudo beo kuno yayango wi gi ki yamo ne kop me anywar be, Ee in oudo iyamo be iyaro tuturo tempulo di bobo iko gere pi cieng adek.
30
. Nan do lakere keni di iko wok piny ki yataria.
31
. I epone acel nono da jodongo me josaseredoti karacel kede jopwony me iswil oudo yamo kengi kop me anywar be, En leme lako jo apat do likame etwero pi lakere kene.
32
. Ber kkong Kuristo abaka me Israel wok piny nan, ki yat aria, wek wan oneni di oko yei” jo kame kogure kede da oko donyo cane.
33
. Iye esawa kanayape me icieng piny lung oko doko col tuno iye esawa kanyangon me otieno.
34
. Iesawa kanyangon Yesu oko kok kede dwan amalo di be “Eloi Eloi, LEMASABACHTHANI” kame dwong mere be, Rubanga na, Rubanga na, pinyo komio ijala?
35
. Jo mogo oudo tie cungo kun oko winyo kope gi kiko yamo be “Winyunu etie iwongo Elia”
36
. Dano aciel ikom gi oko ringo di eko rwako ecango ibwini awac, di eko rwako iwii atadi di eko mino bute be emati, di eko yamo be wek onenunu kame Elia oyaro bino kwanye iyat aria.
37
. Yesu oko kok kede dwan amalo eko omo cunye di ko to.
38
. Di egoe kame oudo poko isenge me tempulo oko yec tien aare cako kimalo tuno piny.
39
. Kakame Ngadwong me isirikalen kame oudo tie cungo ingete tucel owinyo kede koko mere kede ekite eto kede eko yamo be ateteni icuo obedo wot ka Rubanga.
40
. Mon mogo oudo tie kuno kame oudo tie nene kitenge kikom gi oudo tie iye Maria Magadalina, Maria toto me Yakobo, atidi kede Jose kede Salume.
41
. Kame bin oudo etie kede Galilaya, oudo mon nogi obedo jo kame lube, di kikonye karacel kede mon acie atot kame oudo oupere kede en tuno Yerusalem.
42
. Di piny oyuto piento oudo ebedo cieng me likere cieng kalubo Sabato.
43
. Yosepu me Arimatea obedo dano me kansulo kame oworo kame oudo tie kuro pi bi me Ajakanut ka Rubanga, oko bino di eko bedo kede nwang cuny di eko ot but Pilato di eko penyo kom Yesu.
44
. Pilato oko bedo kede ur kame ateteni Yesu otieko to. En eko iwongo Ngadwong me isirikalen di eko penyo kame Yesu otieko to.
45
. Kakame eudo niang kibut Ngadwong me isirikalen be Yesu otieko to, en eko mino kome but Yosepu.
46
. Di en eko wilo igwen acil eko kwanyo kome piny di eko bono kede igwen nogo di ekotero di eko pielo iye atesi kame oudo oroko ilela. En eko loro kidi eko umo kede dog atesi nono.
47
. Maria Magadelena kede Maria toto me Jose oudo tie neno kame otie keto iye kome.