¹ . Icien ngei ceng are oudo ebaga me kalamo kede ebaga me ocamo iye mugati ame anip likame tie ie: jo saseredoti kede jo iwandik oko paro epone kame ki pore make kede ki rieko di kiko tuno neke. ² . Do gin kiko yamo be, likame iceng me ebaga, me wek kur jo lokere ne wa. ³ . Di en eko bedo tie Besani iot Asimoni adobo, kakame en eko bedo kede piny pi cam, dako moro oko bino di emako sanduku me alabasita me moa wel mere tek twatwal, en eko yabo sanduku, di eko onyo mo nono iwi Yesu. ⁴ . Do jo ace ame tie kede cuny arac ikom gi oko yamo be, pinyo omio odudubo tie me moni? ⁵ . Pien oudo opore koto cate kalamo siringi tol adek di koto oko mino but jo can Gin kiko dony ngur ikome. ⁶ . Do Yesu oko yamo be, wekunu en kene pinyo omio itienu lole? En itimo tic aber ikoma. ⁷ . Pien wun itie nu kede jo can kede wu naka naka pi wun itwerunu timo negi bero do ango likame atie kede wu nakanaka. ⁸ . En etimo gi ame etwero, en ebino sek pi wiro koma pi tuno iye aika. ⁹ . Ateteni ayamo ne wu, ejiri ni obino tuco iwi lobo dedede, mane ame en etimo obino yamo di oyutuno en kede. ¹⁰ . Dido Yuda Isikariot ngat aciel ikom jo tomon iwie are, oko ot but jodongo me Isaseredootin pi rupao en but gi. ¹¹ . Kakame gin ki winyo kede kiko bedo kede yom cuny, di kiko ciko en pi mine sente. En eko paro epone me cikere kede ikite me jale icing gi. ¹² . Icieng me agege me mugati arup ti ie kakame ki tieko kede ebaga me kalamo, josiao mege oko yamo ne be twai ame in imito ot oyiki me wek ocami iye ebaga me kalamo? ¹³ . En eko cwano josiao mege are, di eyamo ne gi be, otuno ibomba, ikuno icuo ayeo jagi me pi bino riamo kede wu: lube nu. ¹⁴ . Kakame en bino donyo iye yamenu won ot aber no be Ngadwong yamo be, agola me wele tie twai, kame ango abino camo iye ebaga me kalamo kede josiao na? ¹⁵ . En bino nyuto ne wu agola me malo alac ame otieko yiko iber: kanono yikunu pir wa. ¹⁶ . Dido josiao mege oko ot, di kiko tuno ibomba di iko udo bala kite kame en eyamo ne gi kede: di gin kiko yiko iber cuto pi ebaga me kalamo. ¹⁷ . Dido iye sawan me otieno en eko ot kede josiao tomon iwie are. ¹⁸ . Kakame gin kibedo kede pi cam, Yesu oko yamo be, ateteni ayamo ne wu be, ngat aciel ikom wu ame tie cam beda omito rupao ango. ¹⁹ . Gin di iko geno bedo kede por di iyamo but gi kengi kengi, kara ebedo ango? Bobo dano aceda di yamo be kera ebedo ango? ²⁰ . En eko dwoko di eyamo ne gi be, ebedo dan aciel ikom jo tomon iwiye are, ameribo kede. ²¹ . Wot kadano ateni bino ot, bala kite kame owandiko: do can bino bedo but ngato ngat orupao wot kadano eber oudo kame danono likame onywalo. ²² . Do kakame ki tie kede cam Yesu oko kwanyo mugati eko mino winyo en eko turo, di eko mino but gi, en eko yamo be, gami cami man en obedo koma. ²³ . Di eko kwanyo ikopo, do kakame en etieko kede mino pwoc en eko mino but gi di gin dedede iko mato iye. ²⁴ . Di en eko yamo ne gi be, man en remo na me cik ka nyen ame ony pi jo atot. ²⁵ . Ateteni ango ayamo ne wu, likame abino mato bobo iye anyakini me olok, tuno kede icengeno ame abino mato kede anyen ijago ka Rubanga. ²⁶ . Do kama gin kitieko kede wero wer me wor gin kiko ot imoru ne olibeti. ²⁷ . Di Yesu oleo yamo ne gi be, wun dedede iyaronu winyo irac pirango iwor atini: Pien owandiko, abino jwato akwat di oromini ko sasarun. ²⁸ . Do icien mere kame ang ayaruno abino ot ne wu anyim tuno Galilaya. ²⁹ . Do Petero oko yamo ne be, akadi bed bala jo dedede winyi kirac do ango liame abino winyo irac. ³⁰ . Di Yesu oko yamo ne be ateteni ayamo ni be ceng atin di bobo iwor noni di pwodi tong gweno li okok tien are, in ibino dag tien adek. ³¹ . Do en eko medo yamo atot kede teko be ame pi ango to kedi likame abino weki iye yamo amanono. ³² . Di gin kiko tuno ikabedo ame olwongo be Getesemani: di en eko yamo ne josiao mege be dongunu kane wek anho alegi. ³³ . Di en eko tero Petero kede Yakobo kede Yokana, di eko geno bedo kede lito atek kede peko adwong. ³⁴ . Di eko yamo ne gi be, kuo na tie kede iturur tuno ito darunu ikan di inenonu. ³⁵ . Di en eko ot inyime anonok di eko poto piny, di eko lego be, kame oudo twerere esawani koto okato ibuta. ³⁶ . En eko yamo Abba papa jame dedede twerere ibutin, kwany ikopo ni ibuta tenge do likame ekite amito kede do bala kame in imito kede. ³⁷ . Di en eko dwogo eudo gi kitie nino en eko yamo ne Petero Simoni wun inino nu? Kara wun likame itwerunu cei pi esawa aciel? ³⁸ . Cei wumu di iko nu lego me wek kur idonyunu iye atama. Cuny ateteni mito, do kom nyap. ³⁹ . Di bobo en eko ot tenge, di eko lego, di eyamo kope nogo. ⁴⁰ . Do kakame en edwogo kede, en eko udo gi inino bobo (Pien wang gi oudo pek) akadi koto ngeno giame ki pore dwoko ne. ⁴¹ . Di bobo en eko dwogo tien me adek, di eko yamo negi be, mede nu nino nan, di iko nu wei eromo do esawa otuno; neni wot ka dano obino jalo icing jo dubo. ⁴² . Yai wunu malo otunu, neni, en ngat ame tie jala otieko do tuno. ⁴³ . Di do awakawaka di pwodi en itie yamo Yuda di bino aciel ikom jo tomon iwiye are di etie kede kiwak jo atot kede epimai kede akutai owok ibut jo dongo me Isaseredotin kede jo iwandik kede jo adongo me piny. ⁴⁴ . Do ngat kame orupao en oudo otieko mino gi anen, di yamo be, ngalo ngat ame ango ayaro noto leme en dano nono udo ino mke nu di iko nu tere tenge iben. ⁴⁵ . Dido kame en eko bino kede awaka eko ot paka bute di eko yamo be Ngadwong Ngadwong. Di eko noto leme. ⁴⁶ . Di gin kiko make di oko tere tenge. ⁴⁷ . Di ngat aciel ki kom gi ame oudo cungo ingete di ko woto epima di eko tongo nga tic ka esaseredoti adwong di eko ngolo yite tenge. ⁴⁸ . Yesu di ko dwoko di yamo ne be in ibino buta bala but akuo kede ipimai kede akutai pien maka? ⁴⁹ . Oudo ango atie kedi buli ceng itempulo owandiko mier cobere. ⁵⁰ . Di gin dedede kiko weke di iko ringo. ⁵¹ . Di atin awobi moro oko lube di etie kede esuka awobi nono oko make: ⁵² . Di en eko weko esuka di eko ringo ki but gi nono. ⁵³ . Gin kiko tero Yesu tenge tuno but Ngadwong me josaseredoti ame oudo ocokere karacel kede Isaseredotin kede jo dongo me piny kede jo iwandik. ⁵⁴ . Di Petero oko lube icien kakabor paka tuno idikal me Ngadwong me josaseredoti di en eko bedo kede jo tic di ki yo mac. ⁵⁵ . Di josaseredoti kede kansulo lung oko paro pi udo ijura ikom Yesu pi mito neke; do likame kiko twero udo moro. ⁵⁶ . Pi jo atot mio ijura me abe ikome do bobo ijurak di ga likame riamo karacel. ⁵⁷ . Dido ngatamoro oko yai diko mino ijura me abe ikome di eyamo be, ⁵⁸ . Wan owinye di eyamo be, Abino reto tempulo ni ame otimo kede cing, do iceng adek abino gero ace ame likame otimo kede cing. ⁵⁹ . Do akadi da likame ijura gi riamo karacel. ⁶⁰ . Dido Ngadwong me josaseredoti oko cungo idiere gi, di eko penyo Yesu, di eyamo be in likame iduwoko gimoro? Nyo ine ame gin ki yamo ikomi? ⁶¹ . Do en eko dong kede kwei, di liame eko dwoko gimoro. Bobo Ngadwong me josaseredoti oko penye, di yamo ne be, in en ibedo Kuristo wot anga winyo? ⁶² . Di Yesu oko yamo be, Ango da ibino neno wot ka dano di bedo ibad tetu cam me cing metwer, da di ebino idowun me malo. ⁶³ . Dido Ngadwong me josaseredoti oko nyilo egoen mege, di eyamo be, ijura nyo ace ame wan bobo omito? ⁶⁴ . Wun itieko nu winyo acae mere, wun iparunu benyo? Di gin kiko ngolo ne be epore to. ⁶⁵ . Dido jo ace oko geno ngulo lau ikome di oumo wange, di obape di oyamone be, waci ngai en obapi di jo tic da oko donyo babapo en kede ngei cing gi. ⁶⁶ . Do kame Petero oudo tie kede idiakal atin nyako aciel ikom jo tic anga dwong me josaseredoti oko bino. ⁶⁷ . Do kakame eneno kede Petero di yo mac, en eko ngino di eyamo be ida oudo itie kede Yesu me Naseret. ⁶⁸ Do en eko dagi di eyamo be, ango liame ange akadi kolo niang gi are in iyamo. Dido en eko ot orute tong gweno oko kok. ⁶⁹ . Di bobo atin nyako nono oko nene di ko geno yamo nejo acungo inget gi, eda ngat aciel ikom gi. ⁷⁰ . En bobo eko dagi, di do Ingei kare acecek, jo atie cungo inget Petero oko yamo be, ateteni in ngat aciel ikom gi: pien in e Galilayat, da yamo ni nyuto. ⁷¹ . Do en eko geno lamere kede ilair di eyamo ango liame angeo icuo ni ame wun iyamunu. ⁷² . Di tong gweno oko kok tien are, di do Petero oko yutuno kop ame Yesu oudo oyamo ne be di pwodi tong gweno li okok tien me are in ibino daga tien adek kame en eyutuno kede amano eko kok.