¹ . Kakame piny oni kede, jo dongo me josaseredoti kede jo dongo me jo piny dedede oko cokere pi kelo tam arac ikom Yesu pi mito neke. ² . Di gin itieko twene kiko tere tenge, di oko mine icng Ponyias Pilato kamp opedo nga pug adwong. ³ . Dido Yuda, ngat kame orupao en, kakame eneno kede be ongolo ne kop meto, eko swilaro en kikame, di eko dwoko bobo sente akaya ot adek nogo but jodongo me josaseredoti kede jo dongo me piny. ⁴ . Di ewaco be, ango adubo pien ango arupao dano kame likede raco moro, di gin kiko waco be, mano nyo kibut wan? in do inyeo mago. ⁵ . Di en eko kiro sente akaya piny itempulo di eko yai, di eko ot, di en eko dere. ⁶ . Di jodongo me josaseredoti okko kwanyo sente akaya nogo di kiwaco be, likame iswil yei ne wa keto mogi i isan kame okano iye sente, pien ebedo sente kame owilo kede remo. ⁷ . Di gin kiko oro kop, di kiko wilo kede sente nogo poto kibut nga cwei agunne, pi bedo kakame koyiko iye jokumbor. ⁸ . Geno ikare nono poto no kolwongo be poto me remo, paka tuno tin. ⁹ . Do eko cobo gikame riki kowaco di wok ibut Yeremia obedo enabi, di ewaco be, di gin kikotero sente ot adek akaya, wel kame oudo oyei culo ikome gin idwe me Isirael en oyei. ¹⁰ . Di kiko wilo kede poto me nga cwei aejune bala kite kame Rwot onyuto na. ¹¹ . Di Yesu oko cungo inyim ngapug me Roma, di ngapug me Roma oko benye, di ewaco be, in en ibedo abaka me Iyudayan? di Yesu oko dwokone be. In en kiwaco. ¹² . Di kite kame jodongo me Isaseredoti kede jodongo me piny opide kede, en likame eko dwoko kop moro. ¹³ . Dido Pilato oko benye be, mam itie winyo kop atot kame kitie pi di tye? ¹⁴ . Di likame eko dwoko ne kop moro, manono oko mino ngapug opedo kede ur adwong twatwal. ¹⁵ . Nan ikare me ebaga no, ngapug me Roma oudo onare gonyo ne jo Mabus acel, kame gin kimito be gonyi. ¹⁶ . Di oudo tie mabus kame wie rac, kame nyinge Baraba. ¹⁷ . Kakame jo ocokere kede karacel, Pilato di oko penyo gi be, wun imitunu ango agony ngai ne wu? Baraba arabo Yesu kame kolwongo be Kristo. ¹⁸ . Pien en oudo engeo be pi nyeho gi en komio otere bute. ¹⁹ . Kakame Pilato otieko bedo kede ikom mere me ngolo kop, dako mere oko cwano ne kop, di ewaco be, kuu itim gimoro ikom dano amwol no, pien ango aneno can kede ilek atot iwor atin ni pi en. ²⁰ . Do jodongo me Josaseredoti kede jodongo me piny oko supo iwak jo be kipeny pi Baraba di oko neko Yesu. ²¹ . Ngapug oko dwoko ne gi kop di ewaco ne gi be, ngai kikom jo are gi kame wun imitunu be agony ne wu> GIn kiko waco be, Baraba. ²² . Pilato di oko penyo gi be Ango ako timo nyo kede Yesu kame kolwongo be Kristo? Gin dedede kiko waco ne be, wek gure ikom musalaba. ²³ . Di Pilato oko penyo be, Pinyo? Nyo karac kame en etimo do gin kiko medo kilelem kitek di kiwaco be "wek gure ikom musalaba. ²⁴ . Kakame Pilato oneno kede be likame ekanuno? timo gimoro ace, do kwanyo gero en oko cako timere, en eko kwanyo pii, di eko lwoko kede cinge inyim ekodet di ewaco be" Ango alikede racomoro ikome onyo remo me dano amol ni, kop no mako wun. ²⁵ . Do dwok oko wok kibut jo dedede, di kiwaco be, Remo mere bed ikomwan, kede ikom idwe wa. ²⁶ . Kikame eko gonyo negi Baraba eko mino gi, di eko mino kodao Yesu, en ekomine icing gi pi ot gure imusalaba. ²⁷ . Kikano isirikalen me nyapug oko tero Yesu iyot kame jo cokere kiye, di eko coko inyime isirikalen apat me kuno dedede, ²⁸ . Di oko gonyo igoen mege, di oko ngapa ne ekauso akwarkwar. ²⁹ . Di kame gin itieko cweno kede ocoro me okuto, gin kiko rwako ne iwiye, di oketo magada icinge tetu cam; di kiko donyo riondiko inyime, di ki nyware, kiwaco be, "yoga abaka me Iyudayan!" ³⁰ . Di ki ngungulo lan ikome, di kiko kwanyo magada, di iko jwato kede wie. ³¹ . Di gin do itieko nyware, kiko gonyo ekanso tenge ikome, di oko ngapone igoen mege, di oko tere tenge pi ot gure ikom musalaba. ³² . Di oudo tie wok oko, kiko namo kede icuo moro me sirene, Simoni obedo nyinge, en kame gin kiko dino tetek yeno musalaba mere. ³³ . Di kakame gin ituno kede kame kolwongo be Gologota, kame dwong mere be, kabedo me cogowic, ³⁴ . Gin kiko mine bwini kame onyalo kede gi akec di kakame etieko bilo kede, likame eko mato. ³⁵ . Di gin kiko gure ikom musalaba, di kiko doko poko igoen mege, di kiuco alulu, me wek kop cobere bala kite kame riki enabi owaco kede, ki pokopoko igoenna bot gin kengi kengi, di kikom igoenna kiko uco alulu. ³⁶ . Di kiko donyo bedo piny pi dare ikuno. ³⁷ . Di oko guro kiwandik iwie malo me pide kame kowandiko be, MAN EN YESU ABAKA ME YUDAYAN. ³⁸ V 38. Kikano udo tie jo yak are kame oguro ki musalaba kede en, acel ibat tetu cam, kede acelu i bed tetu ngodai. ³⁹ . Di jo kame oudo beo kuno walone kop me anywar, di kiyayango wii gi. ⁴⁰ . Di kiwaco be, ngat kame oudo waco be eyaro turo tempulo di eko gere pi ceng adek lak kuo ni kame in iwot ka Rubanga, wok pin ki musalaba. ⁴¹ . kama nono da jodongo me josaseredoti okodony nyware, kede jopwony me iswil kede jodongo me piny, di kiwaco be, ⁴² . En elako jo apat, en kikome likame etwero lakere, kanu en abaka me Isirael, wek ewok piny nan ki musalaba, di wan oko yei en. ⁴³ . En oudo eketo gen but Rubanga, wek Rubanga nono lake nen, kame di etie kede, pien ewaco be, Ango wot ka Rubanga. ⁴⁴ . Jo yak da, kame oudo kogure kede, oko donyo yeyeto en i epwone acel nono inyime kanono. ^{47 45} . Do geno esawa me kanyape mere, colo oko romo piny iung paka tuno kede esawa me kanyangon. ⁴⁶ . Di esawa me kanyangon iyapiyapi romo Yesu oko kok kede dwan amalo, ewaco be, ELI, ELI LAMASABA CHICHANI? kame dwong mere be, Rubanga na, Rubanga na, pinyo komio ijala? . JOmogo kikom gi kame oudo tie cungo kanono, kakame kiwinyo kede kiwa be, icuo ni tie lwongo Elia. ⁴⁸ . Di awakawaka ngat acel kikomgi oko ringo di eko kwanyo ecango, di en eko pongo iye bwini awac, di eko tweno i magada, di eko mino en emato. ⁴⁹ . Do jo apat oko waco be, odamu, odar onenunu kame Elia oyaro bino lake. ⁵⁰ . Yesu, dido bobo okomedo kok kede dwan amalo, eko omo cunye di eko to. ⁵¹ . Di kikano, egoe kame lem poko isenge me tempulo oko yec cako imalo paka tuno piny, di piny okoyangere, di lela oko barere. ⁵² . Di atesini da oko yabere, di kom jo atot acil kame oudo onino oko cei. ⁵³ . Di kiko wok ki atesin icen me kiyarun, di kiko ot ibomba kacil, di kiko nyutere but jo katot. ⁵⁴ . Bin di ngadwong me isirikalen kede jo kame oudo tiye kede en, pidaro Yesu, oneno yangere me piny kede giko timere, di iworo oko mako gi kitek, di kiwaco be, ateteni man oudo wot ka Rubanga. ⁵⁵ . Di mon atot da oudo tie kuno di, icungo ikakabor kome olubo Yesu cako Igalilaya di kikunye. ⁵⁶ . kikom gi oudo tie Maria Magadalina kede Maria toto me Yakobo kede Yosepu kede toto me idwe ka Sebedaya. ⁵⁷ . Esawa me piny oyuto kede, dido icuo kobare me Arimatea, anyinge Yosepu oko bino, kame eda bin ebedo ngasiao ka Yesu. ⁵⁸ . En eko ot but Pilato, di eko kwano kom Yesu, di Pilato oko mino cik be mie kome. ⁵⁹ . Di kakame Yosepu otieko kwanyo kede kome, en eko bone kede esuka kacil. ⁶⁰ . Di eko kete ei ates mere kame oudo pwodi nyen kame oudo pwodi eroko aroka ki iela, di en eko loro kidi ati idog ates di eko ot tenge. ⁶¹ . Di oudo tie Maria Magadalina kede Maria ocelu, oudo tie bedo kuno inget ates. ⁶² . Do oru mere, kame lubo ceng me yikere jodongo me josaseredoti kede iparisayon oko ot karacel inyim Pilato. ⁶³ . KIwaco be, adwong wan oyutuno be nga angalo no owaco, di pwodi en ekuo be, inei ceng adek, abino yamuno bobo. ⁶⁴ . mi cik me wek dar ates kiber tuno kede iceng me adek tetekeny kur josiao mege bin iwor, di kiko kwalo kome di iko waco ne jo be, en etieko yamuo kikom jo oto, kop me ajikini noni bino bedo rac kalamo me agege. ⁶⁵ . Pilato oko waco ne gi be, temnu jo dar, dokunu do. Damun kuno bala kite kame itwemun kede. ⁶⁶ . Gin kiko ot, di kiko yiko dog ates kiber, kiko mwono engaro kede alama di kiko keto jo dar.