¹ . Di dokon Yesu oko dwoko ne gi kop di yamo ne gi i agole be; ² . Ajakanut me malo cacal kede abaka moro kame bin ioko nyom ka wode. ³ . Di en eko ooro jo tic mege pi oot lwongo jo kame bin en emio kad pi bino inyom do gin likame kiko bino. ⁴ . Dokon en eko medo ooro jo tic apat, di ewoco ne gi be, wacenu jo kame ango amio kad be; Ango atieko iiko cam do otieko cek; bianu do inyom. ⁵ . Do gin kiko tero kop no kede itadal, di gin kiko yai oot iyote gi ka papat, ngati ooto ka oot mere, ngat ca da ooto cato wil mere. ⁶ . Jo ace di ko mako jo kame abaka ooro ka di kiko donyo tidilo gi, di dokon kiko neneko gi. ⁷ . Kakame abaka oko winyo kede rwonge go, cunye oko wang twatwal: di en eko cwano ikearin mege di oko oot neneko jo nek go, di kiko cwinyo mac ikom bomba gi. ⁸ . Di en eko yamo ne jo tic mege be, ebaga do otieko ikere, do jo kibecokina liame obino. ⁹ . Pimano, apeunu do, i ooti cungunu i akakarame yongoyote Adongo, di ikounu lwongo jo dedede kame iudunu pi bino i ebaga me nyom ni. ¹⁰ . Aso jo tic go diko oot, di kiko cungo i akakarame yote adongo di kiko cooko jo dedede kame gin ki udo areco kede abeco dedede dido ka nyom oko pon kede wele. ¹¹ . Kakame abaka obino kede pi neno wele, wange diko cop ikom dano moro kame liko ongapo egwe m nyom. ¹² . Di en eko waco ne be, ngawota, epone mene en kame yin idonyo kede kane di liki ingapo egwe me nyom? Dano nono di ko ling alinga. ¹³ . Abaka diko yamo ne jo tic mege be; Tweunu cinge kede tiene di ikounu tere tenge, di ikounu uce oko kaka cel, en kunono kame koko kede rigao lak bino bedo iye. ¹⁴ . Pien ko lwongo jo atot, do anonok en kame koyero. ¹⁵ . Iparisayon diko do oot bedo piny pi poro kop me udo epone me make kede yamo mere. ¹⁶ . Di gin kiko ooro ne jo siao gi di upere kede jo ke Rode, di ki waco be, nga dwong, wan onge be yin ipwonyo yongayo ka Rubanga ki i ateni, dokon liki iparo kop kamako dano moro ni dedede; Pien yin liki iworo dano moro dedede. ¹⁷ . Aso pimano, waco wa yin iparo benyo? Iswil yei jo culo esolo but Kaisari arabo li? ¹⁸ . Do Yesu oudo otieko ngeno tim arac kame oudo tie icuny gi di en eko waco be pinyo en ko mio un itamanu un jo isidik? ¹⁹ . Nyuta nu sente kame jo culo nono. Di gin kiko kelo ne ogap acel. ²⁰ . En di eko waco ne gi be, cal angai ine kede inyukutan adong dongo gi mako ngai? ²¹ . Gin kiko waco ne be, me Kaisari. Di en eko waco ne gi be, Pimano miunu Kaisari jamini kame mako Kaisari; di ikounu mino Rubanga da jamini kame mako Rubanga. ²² . Kakame gin kiwinyo kede kope go, gin kiko bedo kede ur, diki ko yai tenge. ²³ . Isadukayon da diko bino bute iceng acel nono, kame yamo be iyarun lika me tie gida kiko penye. ²⁴ . Di ki yamo be, nga dwong, Musa oyamo ne wa be, kame icuo moro oto, di likame enywalo idue, omi mere bino nyomo dako mere no di eko nywalo kede kodi kame mako omimere. ²⁵ . Nani oudo bin tie imiegu kanyaare karacel kede wa; awobi me agege onyomo dako eko too di likame enywalo atin moro eko weko dako ne omimere. ²⁶ . Kop acel nono oko timere ne omimere olube no da, iton awobi me adek da, paka tuno but awobi me adek da, paka tuno but awobi me kanyaare. ²⁷ . Me ajikini mere dedede, dako ni da diko too. ²⁸ . Nando, dako ni do oyaro bedo me ka ngai ikom imiegu kanyaare gi, pien gin dedede ki bedo kede dako ni? ²⁹ . Yesu di ko dwoko di waco ne gi be: Wun ipacaru nu pien liki ingeunu gi awandik, ara bo twer ka Rubanga. ³⁰ . Pien iceng me iyarun jo liko oyaro nyom arabo mino anyira gi inyom, do gin kiyaro bedo bala imalaikan ka Rubanga kii malo. ³¹ . Do pi kop kame mako iyarun me jo ko too, wun likame cabon isomunu kop kame Rubanga bin oyamo butu be, ³² . Ango en Rubanga ka Buramu, kede Rubanga Isaka, kede Rubanga ka Yakobo? Rubanga liko obedo Rubanga me jo ko too, do me jo ka kuo. ³³ . Kakame ekodet oko winyo kede kope go, gin kiko uro kite kame en epwonyo kede. ³⁴ . Do Kakame Iparisayon bin owinyo kede be en emio dog Isadukayon olingi gin kiko cokere karacel. ³⁵ . Di ngatacel ikom gi kame bin obed ngat kangeo iswil, oko penye, pi tame di ewaco be. ³⁶ . Nga dwong, icorakin mene en kame dwong kalamo ikom iswiliaka? ³⁷ . Yesu diko waco ne be, yin ipore maro Rwot Rubanga ni kede cunyi dedede, kede tipo ni dedede, kede tam ni dedede. ³⁸ . Manoni en icorakin me agege di dokon en en edwong kalamo. ³⁹ . Kame lubo da dokon cacal kede, ewaco be, yin ipore maro nga kio ni bala kame imaro kede komi keni. ⁴⁰ . Iswil dedede kede kope me inabino liero ikom icorakin are gi. ⁴¹ . Di pwodi Iparisayon tie karacel, Yesu oko penyo gi be. ⁴² . Wun ber iparunu nyo ikom Kuristo? En ebedo wot ka ngai? Gin kiko waco ne be, wot ka Daudi. ⁴³ . En eko waco ne gi be, do epone nyo dokon en ko mio Daudi di oudo tie i cuny olwongo dokon be Rwot, di ewaco be, ⁴⁴ . Rwot oyamo ne Rwot na be, bed ber kong yin icinga tu cam kan, tuno kede Kakame ango amio kede jo kwor ni doko bala abanya me keto tieni. ⁴⁵ . Benyo, kame dokon Daudi d lwonge be Rwot mere, epone mene doko kame en ebedo kede wode? ⁴⁶ . Dano moro likame tie oko karuno dwoko ne kop akadi acel, akadi dokon penye peny moro geno cenge no oot anyim.