¹ Kakame bin gin inoko kede Yerusalem, di do kituno i Betepage, i wi moru me Olibeti, Yesu oko cwano josiao are ² Di ewaco ne gi be, “Otunu i calo kame tie anyim wu ca, cucuto ibinunu udo punda kame otweo di etie kede atin mere i ngete: gonyunu gi di ikounu kelo buta. ³ Do ka ngatamoro oyamo ne wu kop moro, wun wacenu be, ‘Rwot en kame mito gi’; awakawaka en ebino yei ne wu kelo gi.” ⁴ Magi dedede otimere me wek kop kame enabi owaco cobere kakare be, ⁵ “Wacenu nyar ka Sion be, neningo Abaka ni tie bino buti; di emwol, da di etie wanano punda, kede atin me punda.” ⁶ Josiao oko ot di kiko timo bala kame Yesu oudo ociko ne gi, ⁷ Di kiko kelo punda kede atin mere; kiko peto igoen gi ingei punda di kiko mine bedo iye. ⁸ Di ekodet me jo atot oko peto igoen gi i yongayo, apat mege oko tongo ajange me yen kiko peto i yongayo. ⁹ Ekodet me jo kame oudo tie telo anyim kede kame oudo tie lubo Yesu ki cen oko cako ilelem be, “Osana but wot ka Daudi! Etie kede winyo, ngat kame tie bino i nying Rwot! Osana i malo twal.” ¹⁰ Kakame Yesu odonyo kede Yerusalem, bomba lung oko yangere, di kiwaco be, “Ngai ine?” ¹¹ Di ekodet me jo oko dwoko be, “Man en Yesu enabi owok i bomba me Nasaret, me Galilaya.” ¹² Yesu di oko donyo i tempulo ka Rubanga, eko riamo ooko jo dedede kame oudo tie cato kede wilo jame i tempulo; di eko rereto imesai me jo kame oudo tie seso sente, kede gibedo me jo kame koudo tie cato amam. ¹³ En eko waco ne gi be, “Kowandiko be, ‘Ot na kobino lwongo be ot me ilega; do wun ilokenu edoko kapwono me joyak.” ¹⁴ Di imuduka kede ingwalasa oko bino bute i tempulo, en eko cango gi. ¹⁵ Do kakame jodongo me josaseredoti kede jopwony me Iswil oneno kede gi me aura kame en etimo, kede di idwe tie ilelem i tempulo di kiwaco be, “Osana but Wot ka Daudi,” cuny gi oko wang. ¹⁶ Gin kiko waco ne be, “Mam itie winyo gikame gin kitie yamo?” Do Yesu oko waco ne gi be, “Ebo; wun likame i somo be, ‘Idog idwe kede imukerun kame adot in iyaro udo pak kopoore’?” " ¹⁷ En oko weko gi, eko wok ki bomba eoto Betania, di eko buto kuno. ¹⁸ Odiko kakame en oudo etie dwogo kede i bomba, eko winyo kec. ¹⁹ Kakame eko neno kede yat epigi ilak yongayo, en eko ot i dude, do likame eko udo anyakini moro iye kwanyo boke erume; di en eko waco ne yat nono be, " “Anyakini moro likame bobo bino wok ibuti cako nan Atwal:” Esawa nono di yat nono oko tuo. ²⁰ Kakame josiao oneno kede gikotimere, kiko uro twatwal di kiwaco be, “Benyo benyo komio yat ni osusunyo tuo?” ²¹ Yesu oko dwoko ne gi be, “Ateteni awaco ne wu be, ka itienu kede yei di likame ibedunu kede gung, likame ibinunu timo gikame kotimo ne yat ni kenekene, do akadi ka iwaco nenu moru ni be, ‘Putere iot ipoti i nam’, ebino timere. ²² Doko gi dedede kame ilegunu di itienu kede yei, ibinunu udo.” ²³ Kakame en edonyo kede i tempulo, jodongo me josaseredoti kede joadongo me piny oko bino bute di oudo etie pwony, kiko penye be, “Akarinikin mene en kame in itimo kede gigi? Ngai en komii akarinikin nono?” ²⁴ Yesu oko dwoko ne gi di ewaco be, “Ango da ayaro penyo wu gi acel, ka idwokonanu, ada ako bino waco ne wu kakame akarinikin kame ango timo kede gigi wok iye. ²⁵ Batisimu kame bin Yokana batiso kede jo, ewok ki malo arabo kibut jo?” Di gin kiko cako piem ken gi ken gi di kiwaco be, “Ka wan owacunu be, ‘Ewok ki malo,’ en ebino waco ne wa be, ‘Do pinyo komio likame ikounu yei en?’ ²⁶ Do ka owacunu be, ‘Ewok kibut jo,’ otienu kede lworo but jo, pien jo dedede ngeo kiber be Yokana obedo enabi.” ²⁷ Di do gin kiko dwoko ne Yesu be, “Wan likame ongeo.” Yesu oko waco ne gi be, “Akadi ada likame abino waco ne wu akarinikin mene kame ango atie timo kede gigi.” ²⁸ Wun iparunu benyo? Icuo moro oudo bin tie kede awobe mege are; en eko ot but awobi mere me agege di eko waco ne be, ‘Woda, ape tin itim na tic i poto me olok.’ ²⁹ En eko dwoko be, ‘Ango likame ayaro ot’; do i cen mere en eko loko tam mere di eko ot. ³⁰ En eko ot but awobi me are da di eko waco ne kop acel nono; di awobi oko waco ne be, ‘Adwong ayaro ot’; do likame en eko gire ot. ³¹ Ngai kikom awobe are nogi en kotimo gikame papa mere mito?” Gin kiko dwoko ne be, “Awobi me agege.” Yesu oko waco ne gi be, “Ateteni awaco ne wu, “Be jorar esolo kede malayan bino cako ot ne wu i Ajakanut ka Rubanga. ³² Pien Yokana bin obino butu di etimo ateni, do wun likame ikounu yei en, do jorar esolo kede imalayan oko yei en: do wun, kadi di bin itiekunu neno kede gikame gin kitimo, likame ikounu loko tam wu tetekeny ikounu yei en.” ³³ Winyunu agole ace bobo, Bin tie icuo moro kopuro poto me olok, di eko wano en rimaro, eko kunyo bur me bino bwini iye; da di eko gero ot ikiara malo me daro poto: en eko keto jo mogo daro ne poto nono, di en eko ot i piny abor. ³⁴ Do kakame kare me ngwedo anyakini oko tuno kede, en eko cwano jotic mege but jodar poto pi omo ne anyakini moro iye. ³⁵ Do jodar poto oko daruno jotic mege nogo kiko bungo acel ikom gi, kiko neko acel, kede ocelu kiko didipo kede kide. ³⁶ En bobo eko cwano jotic ace kame tot kalamo me agege; do jodar poto doko oko timo ne gi tim acel nono. ³⁷ Me ajikini mere, en eko cwano wode but gi di ewaco be, ‘Kibino nyuto wor but woda.’ ³⁸ Do kakame jodar poto oneno kede wode nono, kiko donyo pooro kop ken gi ken gi be, ‘Man en musika mere, bia onekenu, me wek wan osikao jame kame make.’ ³⁹ Di gin kiko make, di kiko uce ooko me poto di kiko neke. ⁴⁰ “Nan do kame won poto me olok obino, iparunu be nyo kame en ebino timo ne jodar poto nogo?” ⁴¹ Gin kiko waco ne be, “En ebino dudubo jo areco nogo iepone me to arac adikinicel, di eko bino keto poto me olok mere i cing jodar apat, kame bino mine anyakini i kare me ngwedo gi.” ⁴² Yesu oko waco ne gi be, “Likame itiekunu somo iwandik kacil be, ‘Kidi kame jogedo odagi en kame oko lokere odoko kidi me esonda kame pire tek; man obedo iik ka Rwot, doko etie gi me aura i wang wan’? ⁴³ “Pi mano, ango awaco ne wu be. Kobino kwanyo Ajakanut ka Rubanga kibutu di oko mino but atekerin kame nyako anyakini kabeco. ⁴⁴ Doko ngat kame bino poto i wi kidi noni ebino tuturun, do ka kidi noni opoto i kom ngatamoro, ebino nyinyito dano nono doko bala alos.” ⁴⁵ Kakame jodongo me josaseredoti kede Iparisayon owinyo kede agole nogi, gin kiko niang be Yesu oudo tie waco kop gi i kom gi. ⁴⁶ Do kakame gin kiko tamo make kede, gin oudo kiko bedo kede lworo but ekodet me jo, pien jo oudo ngeo be Yesu obedo enabi.