¹ . Kakame Yesu otieko yamo kede kope nogi, en eko yai ki Galilaya, eko ot i adul me Yudea kame tie loka tetuca me ecilet me Yorodan. ² . Ikodete me jo atot oko lube, en eko cango jotuwo ki kuno. ³ . Iparisayon da oko bino bute, pi tame, gin di kiwaco be, Iswil yei ne icuo pi riamo dako mere pi kop moro ni kenekene? ⁴ . En eko dwokone gi di ewaco be, likame itiekunu somo iwandik kame waco be, “En ngat kame ocweo gi ikare me agege; ecweo gi cuo kede mon ⁵ . Di eko Waco be, Pi mano, icuo bino weko papa kede toto mere, di eko ribere kede dako mere, gin are gi kobino doko kom acel? ⁶ . Pi udo gin do likame bobo kitie are, do udo kidoko kom acel. Pi mano, gikame Rubanga otieko ribo kur dano moro poki. ⁷ . Gin kiko waco ne be, Pinyo do komio Musa bin oko mino cik be, kotwero wandiko ne dako baluwa me gonye, di en eko pokere kede me Atwal? ⁸ . Yesu oko waco ne gi be, Musa oyei ne wu pokere kede mon wu pi tek wi wu: do cako ikare me agege me cwec, oudo likame ecal kamano. ⁹ . Pi mano, ango awaco ne wu be, Ngatamoro ni dedede kame riamo dako mere, kwanyo kop me adote; di en eko nyomo dako ace, udo etimo adote. ¹⁰ . Josiao mege oko waco ne be, Ka kop cal amano i dyere me icuo kede dako mere, likame do ber ne icuo nyomere. ¹¹ . Do En eko waco ne gi be, Cuo dedede likame bino yei kede kop noni, kwanyo jo kame oyabo ne gi kenekene. ¹² . Pien jo mogo tie kame onywalo di kitie abwocin, kede tie jo mogo kame odoko abwocin kame jo en oloko gi doko abwacin, da tie mogo koyei bedo abwocin pi kop me ajakanut me malo. Ngat kame twero gamo mano, en miero egami. ¹³ . Di oko kelo ne idwe atino me wek eket cinge ikom gi di eko lego ne gi; do josiao oko donyo cokocoko gi. ¹⁴ . Do Yesu oko waco be, Wekunu idwe atino bin buta, doko kur igengunu gi, pien Ajakanut me malo tie pi jo kame cal amano. ¹⁵ . En eko keto cinge ikom gi di eko yai ikuno. ¹⁶ . Di do dano moro oko bino bute, di eko waco ne be, Apwony aber, nyo en kame ber kame poore na timo me wek aud kuo me nakanaka? ¹⁷ . Yesu oko waco ne be, Pinyo komio in itie lwonga be aber? Likame tie ngat kame ber kwanyo ngat acel kenekene, en Rubanga: ka imito donyo ikuo me nakanaka, poore igwok iswilia mege. ¹⁸ . En eko waco ne Yesu be, mege? Yesu oko waco ne be, Kur ineko; Kur itimo adote; Kur ikwalo; Kur imio ijura me angalo; ¹⁹ . Wor papa ni kede toto ni; In myero imar ngakio ni bala kame imaro kede komi keni. ²⁰ . Awobi nono oko waco ne be, Ango agwoko cik go dedede cako i eponga na: nyo en kame pwodi orem na? ²¹ . Yesu oko waco ne be, ka imito bedo ngat kame opoore, ot iko cato gi dedede kame in itie kede, di iko mino but jocan; di iko bino bedo kede abar i malo: iko bino luba. ²² . Do kakame awobi nono owinyo kede kop no, en eko ot di cunye likame yom: pien oudo en ebaro twatwal. ²³ . Di do Yesu oko waco ne josiao mege be, “Ateteni ango awaco ne wu be, ebino bedo tek twatwal ne ngabar donyo i Ajakanut me malo. ²⁴ . Doko da, awaco ne wu be, eyoyot ne aguragura donyo iwang pisi akaka ngat kobaro donyo i Ajakanut ka Rubanga. ²⁵ . Kakame josiao mege owinyo kede kop noni, gin kiko bedo kede ur atek, di kiwaco be, Ngai do en kame bino udo alako? ²⁶ . Do Yesu oko ngino gi di eko waco ne gi be, Man likame twerere kibut dano, do kibut Rubanga gi dedede twerere. ²⁷ . Di Petero oko dwoko ne di ewaco be, Neningo, wan otieko weko gi dedede di oko lubi; Kamago tie da nyo do en kame wan obino udo? ²⁸ . Di Yesu oko waco ne be, Ateteni ango awaco ne wu be, Wun jo kame ilubanu gi, ikare kame Wot ka dano bino bedo kede ikom mere me deyo ipiny kanyen, ibinunu bedo ikomini me pug tomon kiwie are, di itie nu ngolo ne atekerin tomon kiwie are me Isirael kop. ²⁹ . Doko ngat acelacel kame bino jalo ude mege, imiegu arabo amiegu, papa arabo toto, dako arabo idwe mege kede lobo mere pira, ebino udo tol-acel okom tol-acel, doko en eko bino udo kuo me nakanaka. ³⁰ . Do jo atot kame tie nan jo me agege bino bedo me ajikini; kede jo kame nan tie me ajikini bino bedo me agege.