¹ Cenge nono Yesu oko yai i ot di eko ot bedo piny i dog nam. ² di ikodeta adongo me jo oko cokere bute, omio en eko donyo i yee di eko bedo iye, di ekodet me jo dedede oko dong cungo i dog nam. ³ Di en eko waco ne gi kope atot i agole, di ewaco be, "Nga cui kodi moro bin ooto cuno kodi. ⁴ Kakame oudo etie cuc kede, kodi mogo oko poto iyongayo, di winy oko bino oko camarogi pit. ⁵ kodi mogo oko poto ilobo kame obedo kidi kidi, kakame lobo oudo nonok ne gi iye, kiko susunyo tui pien lobo lia tut ne gi ⁶ Do kakame ceng orieny kede, ceng oko wango gi, pien aliasin gi oudo likame odonyo piny iber kiko ner. ⁷ Di mogo oko poto idyere dyere me okuto, mago okuto oko susunyo dongo oko twilo gi. ⁸ Apat oko poto i lobo aber kiko nyak, mogo wi gi tol acel, mogo wi gi ot kany, mogo wi gi ot adek. ⁹ Ngat kame tie kede yite me winyo, wek ewinyi!? ¹⁰ Jo siao oko bino bute di iko penye be, "Pinyo omio in iyamo kede gi i agole?" ¹¹ Yesu oko dwoko be, "pien otieko mino wi ngeno omung me ajakanut me malo, do Rubanga likame omio jo apat ngec nono. ¹² Pien ngat kame tie kede gimoro obino medo ne ace, tetekeny en eko bedo kede atot, ngat kame li kede gi moro, akadi atitidi kame etie kede da obino kwanyo ibute. ¹³ Pi mano ango ayamo kede gi i agole, pien gin ingongolo do li kame ineno, iciko yit gi do li kame itwero winyo, amoto niang. ¹⁴ Enabi Isaya bin omurao ikom gi kakare kame ewaco be, "ibino winyo, do li kame iibino niang, ibino ngino do li kame iko neno. ¹⁵ Pien cuny gi odoko nwang, pien yit gi ocule me wek kur gi iwiny kop, doko imio wang gi da me wek kur ineni kede wang gi doko me kur iwiny kede yit gi, di iko lokere buta, di ango ako cango gi." ¹⁶ Do wang u tie kede winyo pien ineno, doko yitu da tie kede winyo pien iwinyo. ¹⁷ Ateteni ango awaco ne wu be, bin inabin kede jo opoore atot oudo tie kede mit me neno gikame wun inenunu, do likame iko neno, doko oudo imito winyo gikame wun iwinyunu, do likame iko winyo. ¹⁸ Pi mano, winyu nu kop kame agole me nyacuc pwonyo. ¹⁹ ka ngata moro owinyo kop me ajakanut ka Rubanga di likame eko niang, ngarac bino di eko wariso kop kame ocuo icunye, ngat nono cal bala kodi opoto iyongayo. ²⁰ kodi opoto ilobo obedo kidikidi, cungo pi dano kame winyo kop ka Rubanga, cucuto en eko gamo kede ilel, ²¹ do kop noni likame ko keto aliasin ikuo mere, amio en eko kanyakino pi kare acecek. Aso, ka peko arabo itidil moro ko bino pi kop nono, en egete cucuto eko poto. ²² Kodi opoto idier okuti, cungo pi dano kame winyo kop ka Rubanga, do pi paro kuo me piny kan kede angalo me abar ko twilo kop ka Rubanga ikuo mere, di ko mine likame enyako anyakini me tipo kacil ikuo mere. ²³ Do kodi opoto ilobo aber cungo pi dano kame winyo kop ka Rubanga di eko niang, eko mio donyo ikuo mere en eko nyako anyakini bala kodi kame nyako nyige tol acel, moto ot kanyape kede apat ot adek." ²⁴ Yesu oko waco agole ace ne jo be, ajakanut me malo cal kede dano kame ocuo kodi abeco ipoto mere. ²⁵ Do iwor acel di jo tie nino, nga kwor mere oko ot di eko cuno nyige me okitu i poto me engano nono, di eko ot gire tenge. ²⁶ ikare kame engano odongo di ko suro, okitu da oko neno. ²⁷ Jo tic me won paco nono oko ot bute di iko waco ne be, "Adwong, mam bin in oudo icuo kodi abeco i poto ni? Doko okitu otuno iye benyo? ²⁸ "En eko dwoki ne gi be, "nga kwor na moro en otimo gino! jo tic oko penye be, "Do nan imito be wan ooti opuputo gi?" ²⁹ Di en eko waco be, 'li. Pien kare kame wun itienu puputunu kede okitu, ibinunu puputo kiton engano da karacel kede go. ³⁰ Wekunu gin ki mede dongo karacel tuno ikare me kac, ikare me kac ango abino yamo ne jo kac, "pi ber cako puputo okitu, di kiko twe tweo gi i arita pi wango gi, icen mere gin kiko coko engano kiko keto iderona." ³¹ Yesu bobo oko waco ne gi agole ace be, "Ajakanut me malo cal bala nyige me Karadali, kame dano okwanyo di en eko cuno ipoto mere. ³² en kodi kame ditileng kalamo kodere dedede. Do kama etui kede eko dongo, edoko dwong kalamo deke dedede kame jo pito ipoti, eko doko yat ojanyo kame mio winy me malo bino ko gero ude gi iye jange mege." ³³ Yesu bobo oko tatamo negi agole ace be, "Ajakanut me malo cal bala arup kame dako okwanyo, di eko nyalo kede alos aromo gi pim adek, tuno kede di en eko mino moko also lung buuno." ³⁴ Magi dedede bin Yesu owaco ne ekodet i agole, likame tie gi moro kame en epwonyo gi abongo tic kede agole. ³⁵ tetekeny gi kame bin enabi owaco cobere kakare be, "abino yabo doga but gi i agole. Di a tuco gi omungere cako ikare kame ocweo kede piny." ³⁶ Yesu di ko peruno ekodet medo di eko ot i ot, Josiao mege obo bino bute, di ki waco be, "gony ne wa dwong me agole me okitu kame ocuo ipoto." ³⁷ En eko dwoko eko yamo negi be, "ngat kame ocuo kodi kabeco en wot ka dano. ³⁸ Poto en piny, kodi kabeco en idwe me ajakanut ka Rubanga, do okitu en idwe ka ngarac. ³⁹ Ngakwor kame ocuo okitu en sitani. kac en ajikini me piny, kede jo kac en imalaikan. ⁴⁰ Pi manono bala kite kame ocoko kede okitu di oko wango imac, ebino timere amanono da i ajikini me piny ni. ⁴¹ Wot ka dano bino ooro imalaikan mege, gin ibino coko tenge me ajakanut mere jame dedede kame timo gi tao ne jo dubo kede jo kame timo gi ka reco. ⁴² Di iko uco gi imac ko dop, kaka me jo bino koko kede mwodo lak gi iye. ⁴³ Di jo opore ko bino rieny bala ceng i ajakanut ka Papa gi. Ngat kame tie kede ite, wek ewinyi. ⁴⁴ Bobo, ajakanut me malo cal bala abar kame okano ipoto. Kame dano oudo, eumo. Pi yom cuny adwong kame etie kede, eoto eko cato gi dedede kame etie kede, di eko wilo kede poto nono. ⁴⁵ Doko, ajakanut me malo cal bala nga cat kame moo bira me wel. ⁴⁶ Ikare kame en eudo kede bira acel me wel adwong, en eko ot cato gi dedede kame oudo etie kede, pi wilo kede bira nono. ⁴⁷ Doko da, Ajakanut me malo cal bala bwoi, kame oudo ouco inam di eko mako dek nam me epone dedede. ⁴⁸ Kakame, oudo bwoi otieko pong kede jo oko wane idog nam, iko bedo piny yero dek name abedo di iketo ibukito, do iko uco areco mege tenge. ⁴⁹ Ebino timere kamano da i ajikini me piny. Imalaikan bino wok, di iko kekeo jo ka reco ikom jo opore, ⁵⁰ di iko uco gi imac odop, kakame jo bino kok kede mwodo lak iye. ⁵¹ "Yesu oko penyo gi be, otiekunu mam do niang gi dedede?" gin kiko dwoko ne be, "ebo oniang, Rwot" ⁵² En eko waco negi be, "pi mano nga iwandik ace acel otyeko pwonyo kop me ajakanut me malo cal bala won paco, kamo woto gika nyen kede gi kacon kame ekano iye jame mege." ⁵³ Kakame Yesu otieko mino pwony iye agole, en eko yai weko kuno. ⁵⁴ Di eko ot I bomba me tur gi, en eko cako pwonyo jo me kuno I sinagoga gi, gin iko uro di i waco be, "I cuoni oudo rieko kede tice me twer gi itwai? ⁵⁵ Mam wot ka nga pac ine? Mam nying toto mere Maria? krfr Imiegu mege en Yakobo, Josefu, Simoni, kede Yuda? ⁵⁶ Mam amiegu mege dedede tie kede wa karacel? Do en eudo gigi dedede ituai?" ⁵⁷ Gin dido cuny gi oko guikin ikome. Do Yesu oko waco ne gi be, "Jo me kabedo dedede woro enabi, kwanyo jo me adul me turgi kede jo me i ode." ⁵⁸ En likame eko timo tice atot me twer ikuno pien oudo ili kede yei.