¹ . Iceng me agege me Sabiti, odiko sek, di gi gin ko bino iates kede jamini angwe kur kame gin kiiko kede jo ace da. ² . Gi ko udo enaru kame oumo kede ate oloro tenge. ³ . Giko donyo iyiye gin gi ko udo be kom Rwot Yesu lii. ⁴ . Di pwodi gi pong kede wur gin giko neno cuo are di cungo inget gi digi ngapo igwen atie rieny. ⁵ . Kede iworo adwong gi ko luro nying piny di go kiko yamo negi be, pinyo bo ame un imounu kede ngat kakuo ibut jo koto? ⁶ . En eli ikan, oyaruno en Yutununu kite ame bin eyaro newu di pwodi eti Galilaya. ⁷ . Di ewaco be wot icuo opore mino icing cuo atimo bal di oko gure di iceng me adek eko yaruno dokon. ⁸ . Gin kiko utuno kope mege. ⁹ . Giko dok do iya tes digi ko tatamo kope nogi but jo ii kede jo dedede. ¹⁰ . Oudo Maria Magadelina, Jona, Maria toto me Yakobo kede mon ace ame udo tie kedegi di oyamo kope gi but jo oor. ¹¹ . Likagi ko yei kede gi pien kop nogi oudo winyere but gi bala kop akony mere li. ¹² . Di Petero oko yai sipidi eko ringo iates eko gungo neno igwen me aika di tie kengi eko dok di etie kede ur adwong pi gi otimere ikom gi. ¹³ . JO are ceng noni oko ot icalo me Emausi, ame oudo tie mairon bala kanyare ijai i Yerusalem. ¹⁴ . Giko yamo sama kengi kengi pi gi otimere. ¹⁵ . Di gi tie ot, Yesu kikome okobino iyapi inget gi eko upere kede gi. ¹⁶ . Do oudo wangi koumo me wek gin kur kingee. ¹⁷ . Eko penyo gi be benyo epone mene me yamo ine aun itienu yamo kenwu kenwu di iotunu de bobon da lika cunyu yom? ¹⁸ . Acel ikom gi anyinge Keleopos oko dwokone be in ba itie welo i Yerusalem kane ame pwodii likame iwinyo gi otimere icengere gi? ¹⁹ . Eko dwoko negi be, Nyo inonono? Giko yame be amako Yesu me Nasareti ame oudo tie enabi ame dwong adikini cel itice kede inyim Rubanga kede jo duc. ²⁰ . Kede epone ame jo saseredotin adongo, jo loc wa omio ongolene kop me too, di oko gure. ²¹ . Do wan oudo otie kede gen be en ame eyaro lako isiraili apat kede magi dedede tin do en ceng me adek geno me gigi timere. ²² . Bobon mon mogo da ame tie ie kodet wa odubo wiwa di gin gigigeo tino iates. ²³ . Gi ko udo kome li di gi ko dwogo yamo newa be gi neno yabere me imalaikan oko yamo negi be en ekuo. ²⁴ . Ikom wa da mogo oko ot iates oko udo be kop ame giyamo tie ateni do gin likame kine ne. ²⁵ . Di en eko waco negi be, okwe un jo mingo gi di cunyu da yei momot ikope dedede kame inabino oyamo. ²⁶ . Oudo likame epore ne Kristo neno can gi dedede di en eko donyo i deyo mere? ²⁷ . Dido geno ibut Musa kede inabino dedede eko yamo negi odocon kiber gi aca amako en. ²⁸ . Digin yapono tuno icalo ame oudo gitie ot iye en oudo emito ianyo gi cen. ²⁹ . Do gin ko genge di gi waco ne be pipny otieko uto dong bed kede wa, di en ek dong bedo kede gi. ³⁰ . Kamago, en okato, en eko bedo me cam kede gi ekwanyo mugati eko lonye di eko tuture en eko mino gi. ³¹ . Wangi di oko yabere gi ko ngene di eko rwenyo wir iwangi. ³² . Digi ko penyere kengi kengi be Benyo cunwa likame oki owang di eyamo kede wa dibobon da eyabpre wa gi awandi? ³³ . Gin giko yai malo iye sawa nono gi ko dok Yerusalem gi ko udo jo tomon iwie acel ka ocokere karacel kede jo ace audo tie kede gi. ³⁴ . Digi ko waco negi Rwot ateteni oyaruno eko neno but Simoni. ³⁵ . Digin giko tatamo negi gi otimere iyongayo kede epone ame engere kede but gi iesawa me turo mugati. ³⁶ . Digi tie yamo Yesu kikome di ko cungo idyere gi i ekoyamo negi be, mulem bed kede u. ³⁷ . Do oudo iworo omakogi kede polo cuny be amotoko gi neno tipo. En eko yamo negi be Nyo omio itienu kede poto cuny? kede nyo omio piem tie icuny u? ³⁸ . Nenunu cinga kede tiena ikonu ngeno be en ango. ³⁹ . Mukanu ikonu neno pien tipo li kede ringo kede cogere bala kite ame ango atie kede gi. ⁴⁰ . Di etieko yamo kede gi eko nyutonegi cinge kede tiene. ⁴¹ . Dipwodi gin likame gi tie yei pi yom cuny eko yamo negi be, itienu kede cam moro kan? ⁴² . Giko mine aporogo ocek kede kapien me kic. ⁴³ . Eko camo i nyim gi kanono. ⁴⁴ . Eko waco negi be magi en obedo kop ame bin awaco ne u di pwodi atie kede u, be gidedede pore cobere ame owandiko iswiliaka a Musa kede inabino kede itabu me Sabuli ame mako ango. ⁴⁵ . Di eko yabo wiangi tetekeny gi ki niangi gikame owandiko. ⁴⁶ . Di eko yamo negi owandikobe Kristo pore udo alola, di eko yaruno ikom jo oto iceng me adek. ⁴⁷ . Kede be iswilar kede aweka me gika reco pore atuca but atekerin dedede di egere i Yerusalem. ⁴⁸ . Yun itienu jo jurao me gigi. ⁴⁹ . Ayaro cwano neu gi ame papa ocio neu: Do bedunu karacel ibomba me Yerusalem paka kakame ipongunu kede twer kame yai imalo. ⁵⁰ . Eko telogi kabor bala nat tutu Bethany eko rieno bade eko mino gi winyo. ⁵¹ . Kamago okato di etie mino gi winyo eko yai i but gi oko tinge malo. ⁵² . Giko wore, gin giko dok Yerusalem kede yom cuny adwong. ⁵³ . Di eko mede amanono i tempulo diki pake kede mino Rubanga winyo. Amano.