1
. Yesu oko ot imoru me Olibeti.
2
. Odiko sek, di bobo eko dwogo itempulo, di jo dedede oko bino bute, en eko bebo piny di eko pwonyo gi.
3
. Di jo angeo iswil kede Iparisayon oko kelo bute dako kame omako di etie timo adote; di do kakame gin ikete kede idyer jo,
4
. Gin kiko waco ne be, Apwony dako ni komako di etie timo adote.
5
. Musa owaco ne wan i iswil be epone me dako ni kobino didipo en kede kide. Do in iwaco benyo?
6
. Man gin iyamo pi mito kino kop me doge pi udo kop me pide. Do Yesu oko luro piny di eko donyo wandiko lobo kede lwete, bala ngat kalikame owinyo kop gi
7
. Kakame gin kiko medere kede penye, di en eko kiar, en eko waco ne gi be, Ngat kame li kede dub ikomu, en egei dipe kede kidi.
8
. Di en bobo eko luro piny, eko wandiko lobo.
9
. Do kakame gin iwinyo kede kop no; bala kame cuny gi opido kede, iko cako yai acelacel, cako kibut joadongo naka gin tiek. Di Yesu oko dong kene, di dako nono tie cungo inyime.
10
. Kakame Yesu oko tingo kede wange malo, di likame eko neno dano moro kwanyo dako nono kenekene; en eko waco ne dako nono be, Dako ni, jo kame oudo tie pidi tie tuwai? Ngatamoro li ongolo ni kop?
11
. En eko dwoko be, Rwot dano moro li; Di Yesu oko waco ne be, Akadi ango da likame abino ngolo ni kop; oti, do kur bobo itim dub moro.
12
. Yesu di bobo oko yamo kede gin, di ewaco be, Ango atie lero me piny: ngat kame luba likame bino ot ikaka col, do ebino bedo tie kede lero ikuo mere.
13
. Iparisayon di oko yamo ne be, in itie yamo kop ajurao in, do kop ni nogo likame tie me ateni.
14
. Yesu oko dwoko ne gi be, bed bala ango atie yamo kop kame jura, do ijura nango tie me ateni. Pien ango angeo kakame awok iye, kede kakame atie ot iye. Do wun likame itwerunu waco na nu kakame ango awok kiye kede kakame atie ot iye.
15
. Wun ingolunu kop di lubere kede tam me dano-adana, do ango likame angolo ne ngatamoro kop.
16
. Da kame ango angolo kop, angolo kop i ateteni; pien ango likame atie kena, do ango kede Papa na ngat koora.
17
. Bobo kowandiko i iswil wu be, caden me ijurak are bedo me ateni.
18
. Ango en amio ijura ikoma, do Papa na ngat koora en kame mio ijura pira.
19
. Gin kiko waco ne be, Papa ni tie ai? Yesu oko dwoko be, Wun likame ingeanu, akadi Papa na da; koto di oudo ingeanu, koto ingeunu Papa na da.
20
. Yesu oudo yamo kope no gi di oudo etie i agola kame oudo okano iye sente. bala kame oudo etie kede pwony itempulo; do likame tie ngatamoro oko make, pien esawa mere oudo likame otuno.
21
. Di Yesu bobo oko waco ne gi be, ango atie ot ot na, do wun dokon ibinunu mona, da ibinunu to idub wu; pien kakame ango ayaro ot iye, wun likame isobolunu bino iye.
22
. Di do Iyudayan oko waco be, Mam en etwero nekere kene? Pien eyamo be, Kakakme ango ayaro ot iye wun likame itwerunu bino iye.
23
. Do en eko waco ne gi be, Wun iwokunu ilobo, ango awok imalo, wun jo me piny kan, ango likame abedo dano me piny kan.
24
. Ango awaco ne wu be, ibinunu to idub wu, pien ka wun likame iyeunu be ango en inonono, ibinunu ateteni to idub wu.
25
. Gin kiko waco ne be, in ibedo ngai? Yesu oko waco ne gi be, manoni en kame ango abedo waco ne wu cako kiagege.
26
. Atie kede kope atot me ayama kede kame poore ngolo ne wu kop iye: do ngat koora obedo ateni, doko ango atie waco ne jo me lobo kop kame ango awinyo kibute.
27
. Gin likame kiko niang be en oudo etie yamo kede gi kop kame mako Papa
28
. Di Yesu oko waco gi be, kame ikiaraunu Wot ka dano, en kame mio ikounu ngeno be ango inonono; kede da be ango likame atimo gimoro ipara kena, do bala kame Papa na opwonya, en mio ango ako yamo.
29
. Doko ngat koora tie keda, Papa likame oweka kena; pien nakanaka angoatimo gikame yomo cunye.
30
. Kakame eyamo kede kope no gi, jo atot oko yei en.
31
. Di do Yesu oko waco ne Iyudayan oko yei en be, Ka imedere nu lubo kop na, ibinunu bedo josia na me ateni.
32
. Da ibinunu ngeno ateni di ateni ko mino wu genyere.
33
. Gin kiko dwoko ne be, wan kom obedo ikwae ka Aburaamu, doko likame obedo itwec kangatamoro; benyo-benyo kame mio in iwaco be, kobino gonyo wu?
34
. Yesu oko dwoko ne gi be, Ateteni, ateteni awaco ne wu be, ngat acelacel kame timo dub edoko epasoit me dub nono.
35
. Doko eposoit likame dong bedo ipaco nakanaka, do Wod en kame dong nakanaka.
36
. Ka Wod ogonyo wu, ibinunu bedo jo kogonyere ateteni.
37
. Ango angeo be wun ibedunu ikwae ka Aburaamu, do wun doko itienu mito neka; pien kope na likame oudo kabedo icuny wu.
38
. Ango atie yamo gikame aneno kibut Papa na, wu da itienu timo gikame inenunu kibut papa wu.
39
. Gin kiko dwoko ne be, Aburaamu en obedo papa wan, Yesu oko waco ne gi be, ka wun oudo ibedunu idwe Aburaamu, koto oudo itimunu gikame Aburaamu riki otimo.
40
. Do nan wun imitunu neka; ango ngat kame atie waco ne wu kop me ateni, kame awinyo kibut Rubanga; Aburaamu riki likame otimo kamanono.
41
. Wun itimunu tice ka papa wu, gin kiko waco ne be, wan likame obedo nywal kame oudo i oko me nyom. Wan otie kede papa wa acel, en Rubanga.
42
. Yesu oko waco ne gi be, ka koto Rubanga obedo Papa wu, oudo koto imararu, pien ango awok kibut Rubanga, likame abino pi mit na, do en kame eora.
43
. Pinyo komio likame itienu niang kope kame ango ayamo? Doko likame itienu winyo kope na.
44
. Wun ibedunu me ka papa wu Sitani, kede eranga ka papa wu; en kame wun imitunu timo. En ebedo nyanek cako i agege, doko en likame ecungo i ateni, pien ateni li kibute. Kame etie yamo kop me angalo udo etie yamo cunye. Pien en ebedo nyangalo doko etie papa me angalo.
45
. Pien ango atie waco ne wu kop me ateni, omio wun likame itienu yei ango.
46
. Ngai kikom wu kame sobolo nyuto dub na? Do kame ango atie yamo ne wu kop me ateni, pinyo komio wun likame itwerunu yei kop na?
47
. Ngat kame tie pi Rubanga, winyo kope ka Rubanga; wun likame iwinyunu kope na: pien wun likame ibedunu jo ka Rubanga
48
. Do Iyudayan oko dwoko ne di kiwaco be, Mam wan otie waco kop me ateni be in ibedo Ngasamaria doko itie kede jwogi?
49
. Yesu oko dwoko be, Ango ali kede jwogi, do ango a woro Papa na, do wun likame iwora nu.
50
. Do Ango likame atie mono deyo kame maka, do ngat acel tie kame tie mono, doko en kame ebino ngolokop.
51
. Ateteni, ateteni, a waco ne wu be, kame dano olubo kope na likame ebino bilo to.
52
. Di Iyudayan oko waco ne be, Wan do otieko niang kiber be in itie kede jwogi. Aburaamu otieko to, inabin da, do in pwodi itie waco be, Ka dano olubo kop na, likame ebino bilo to.
53
. Iparo be in piri tek kalamo Aburaamu papa wan, ngat otieko to? Kede inabin da otieko to; In do ibedo ngai?
54
. Yesu oko dwoko be, Kame Ango atie mini deyo ikoma, deyo na udo kony mere li. Papa na en kame tie mina deyo. Ngat kame wun itienu waco be etie Rubanga wu.
55
. Wun likame engeenu, do ango angee. Abino bedo ngangalo kame a waco be, ango akwie; udo adoko ngangalo bala wun, do ango angee, doko alubo kope mege.
56
. Papa wu Aburaamu bin olelo pi neno ceng me bino na: da di eko neno, cunye oko bedo yom.
57
. Di Iyudayan oko waco ne be, In pwodi likame iromo mwakini ot kany, In do ber oneno Aburaamu ituai?
58
. Yesu oko waco ne gi be, Ateteni, ateteni Ango a waco ne wu be, di pwodi likame onywalo Aburaamu, Ango oudo atie.
59
. Gin kiko kwanyo kide di kimito didipo en kede; do Yesu oko pwono ne gi, eko yai donyo oko me tempulo, di ebeo idyere gi kanono, di en eoto