¹ Pi mano di otie weko yamo ace ikom musingi a Kristo, otuno anyim icilo mere, di likame bobo ocweunu acakini me iswilar ace oyai iyei ot but Rubanga. ² Ikom itok me Batisimu, keto cing i kom jo, iyarun me jo oto, kede ngolo kop me ajikini. ³ kede magi wan oyaro timo ka Rubanga oyei. ⁴ Pimano likame etwerere ne jo kame oudo olakere, di ibilo giamia me malo, kede iko gin da tic kede Tipo kacil. ⁵ Kede iko bilo kop kabeco me a Rubanga, kede twer me kare atie bino. ⁶ Kame ki poto tenge dwoko gi bobo iye iswilar tek pi gin ken gi udo bobo iguro wot a Rubanga iko keto ileuc kaler. ⁷ Pi lobo mato kot kame bino iye, eko mino jame tui ne jo kame puro, udo eudo winyo i but Rubanga. ⁸ Do kame enyak okuto kede ocoko cok, kame kony mere lii di iyapiyapi kede ilam, ajikini mere en wange. ⁹ Imiegu na me amara, wan otie kede asule me cuny, me jamini abeco ikoma wa, ee jamini bala nat upere kede alako, akadi oyame i epone ni. ¹⁰ Pi Rubanga likame bino weko ngolo kop ikom tic me amara kame inyutunu inyinge, amanono in ituco Ejiri but jo oyei iko timo tic. ¹¹ Pi wan oparo be ngat acel acel ikom wu ngut amanono, i amok me gen opong paka iye ajikini. ¹² Do kur komu bed bot, do bedunu bala jo kame beo iyei gi, iko dire icikere gi. ¹³ Kame Rubanga omio kede cikere but Aburaam, piento en oudo likame tie dano adwong bobo kame en ekwongo inyime omio en ekwongo inyime kene. ¹⁴ Di ewaco be, "ateteni abino mini winyo di ikwae ni ko nyai." ¹⁵ Kede amanono kame en eko kanyakino kede i dire mere, en eko udo cikere nono. ¹⁶ Pi jo mio ikwong kede gi adwong kalamo gi, di icikere me timo amok pir gi pi gengo aruba ruba. ¹⁷ Pi Rubanga nyuto mit me cikere mere di opong kede i sumun mere. ¹⁸ Kede da jamini are kame likame lokere, kame Rubanga likame twero ngalo iye, wan opore bedo kede cikere adwong kame cuko cunywa icen di eko keto wa igen atie anyim. ¹⁹ Gen ni tie bala kirin me cuny wa, kame ateni kalikame yangere, kame oyabo ikom gi oudo oumo wang wa. ²⁰ Kame da jo ringo kalikame jik otieko dilo wa iye, Yesu da oko bedo ngasaseredoti adwong nakanaka di lubere kede anapeta a Melkisedek.