¹ Pien bin Melkisedek noni, kame obedo abaka me Salem, kede ngasaseredoti me ka Rubanga amalo, kame bin oriamo kede Aburaam di tie dwogo ika neneko abakai, en oko mine winyo. ² But en noni en kame Aburaam oko mino dul me acel me tomon me gi dedede kame bin en emao ika yii, dwong me nyinge obedo akaka me poore, dokon oko gonyo dwong me nyinge be abaka me Salem kame obedo abaka me mulem. ³ Abongo Papa mere, abongo toto mere, abongo eoke me nywale akadi iton agege me cenge mege kede ajikini me kuo mere likame tie, do ebedo bala wot ka Rubanga Rubanga oko bedo ngasaseredoti nakanaka. ⁴ Nan do nenunu rwom me dwongo me icuo ni, kame ngadwong wa Aburaam oko karuno mino acel me tomon me jame kame emao ika yii bute. ⁵ Me ateni, cuo kame bin obedo awobe ka Lebi, ogamo tic me josaseredoti di ocikakino gi me gamo acel me tomon kibut jo bala kame iswil waco, bed bala gin oudo kibedo imiegu kede amiegu ko wok iremo ka Aburaam. ⁶ Do icuo ni kame bin likame eoke me nywale liko wok ibut gi oko gamo acel me tomon ibut Aburaam di eko mino winyo but Aburaam lo kame oudo tie kede cikere. ⁷ Aso abongo piem moro dedede, ngat kame tididi udo winyo ibut ngat kame pire dwong. ⁸ Dokon i kame cuo kame too gamo acel me tomon, do imaca komio mujura i kom ngat kame gamo be en ebedo nakanaka. ⁹ Dokon atwero waco be, paka iton Lebi da oko gamo acel me tomon, di oculo acel me tomon ii Aburaam. ¹⁰ Piento oudo pwodi etie iremo ka Papa mere Aburaam ikare kame bin Aburaam oriamakin kede Melkisedek. ¹¹ Aso koto di oudo jame otimere kiber dokon ikare me Ilebin oudo tie kede josaseredoti (Piento ikare nono en kame jo ogamo kede iswil) rem me nyo en kame dokon oko neeno kuno en komio doko ngasaseredoti ace oko wokun pi lunyo wang Melkisedek, dodi likame olwonge pi lunyo ka wang Aroni?. ¹² Nan do kame tic me josaseredoti olokere; udo iswil da pore lokere. ¹³ Pien ngat kame kope gi tie yamere ikome owok i ateker apat kame likame otamo bin tic i alutari. ¹⁴ Etie kakaler be Rwot wa owokun ki i ateker ka Yuda kame Musa bin liko yamo be ngasaseredoti bino wok iye. ¹⁵ Etieko neeno kakaler be ngasaseredoti otieko wokun kame cal kede Melkisedek. ¹⁶ Likame owokun di lubo cik me kom do elubere kede twer me kuo kalikame tiek. ¹⁷ Pien mujura owokun be, in itie ngasaseredoti me mwakini kede mwakini di olubo kede anywali ka Melkisedek. ¹⁸ Me ateni, tic me iswil otieko jik pien goro mere oneno kakaler. ¹⁹ Pien iswil li oko twero iiko gimoro me doko ber odocon, do gen kame okelo newa ni oyubo gi dedede odoko ber. ²⁰ Medo iwi mano en likame edoko ngasaseredoti abongo ikwong. ²¹ Pien jo ka bin odoko josaseredoti abongo i kwong, do looni odoko ngasaseredoti beo kibut en di owaco ne be, "Rwot otieko ikwong di likame eyaro loko tam be in itie ngasaseredoti di lubere kede anywali ka Melkisedek. ²² Manoni mio isikan kame Yesu obino moko noni bedo ber odocon. ²³ Ateteni mere josaseredotin nogi oudo obedo tot piento to likame oudo yei ne gi medere. ²⁴ Do icuo ni, Piento en emede ameda kede kuo, tic mere me ngasaseredoti likame lokere. ²⁵ Pimanono, en etwero da doko loko jo kame bino but Rubanga di beo ki bute, Piento en etie kuo nakanaka pi mede kede ingangai pi jo. ²⁶ Pien epone me ngasaseredoti amalo ni odoko cal kede wa, kame cil, abongo imusung, abongo pwokere, di epokere tenge kibut jo dubo, di oko tinge malo me malo twal. ²⁷ Likame en emito miino kirabu me buli ceng bala jo tel me josaseredoti kapat ka, kame oudo miyo gi ayala me agege pi bal gi kede pi bal me jo bul ceng, do en etimo amanono icel kakame ejalo kede kome. ²⁸ Pien iswil loko jo kame tie kede goro doko jotel josaseredoti, do kop me isikan kame owokun di pwodi iswil ni mio wot ka Rubanga kame owiro pibedo nga tel josaseredoti mwaka kede mwaka.