¹ Man en baluwa me are, jona kame amaro awandiko baluan gi butu gin dedede me yangaro tam wu iyore me iyutun. ² Wek ibedunu kede iyutun ikom kope kame riki inabin kacil owaco sek. Yutununu da iswil kowok ibut joor ka Rwot ngalak. ³ Ngeunu be ikare me ajikini jo acae oyaro bino di ki lubo mit gi me kom gi ken gi. ⁴ Gin kibino waco be cikere me dwogo mere nono tie twai? pien ikare kame jo akwari wan oto kede gi gi dedede tie medo ameda timere bala kitekame kitimere kede cako cweno piny. ⁵ Pimano gin kimit gi, kibedo kede kwic ikom kop ka Rubanga kop ariki omio malo obedo tie kede lobo ko cungo loka me pii kede i pii. ⁶ En omio lobo kame bin tie alele me pii di ko mwonyo kede jo kame bin bedo iye. ⁷ Do malo kede lobo me kare ni pi kop acel nono omio otie gwoke di odare kede mac i ceng me ngolo kop kame obino tieko kede jo kalikame ngeo Rubanga. ⁸ Do jona kame amaro kur ibedunu kede kwic ikom gi acel be ceng acel kibut Rwot rom aroma kede mwakini tutumia acel. ⁹ Pien Rwot likame ogal ikom cikere mere bala kitekame jo mogo tamo kede; do en etie dire kede wa di likame emito be ngatamoro kikomwa kei, do jo dedede tun iswilaro. ¹¹ Bala kame ineno kede be kobino tieko jame gi dedede, in do miero ibed dano kame cal nadi? iponeso abeco kede woro Rubanga ¹² Nenunu di ikonu keto iye cuny wu ibino me ceng ka Rubanga, di malo kobino wang kede mac di jamini kame tie iye kobino calar kede lieto atek. ¹³ Pimano wan di lubere kede cikere mere otienu kuro malo anyen kede lobo anyen kame poore bedo iye. ¹⁴ Pimano, jona kame amaro bala kame itienu kede daro gi nogi, ketunu cuny wu wek ud wu di itienu i en kede mulem bongo ka ocukukao, abongo ibunan. ¹⁵ Di omarunu be diire ka Rwot wa en alako, bala kame ominwa me amara Paulo owandiko kede but wu di lubere kede rieko kame bin komie. ¹⁶ Bala ikom baluan mege dedede ewaco kop acel noni iyi gi kame mogo ikom gi niang iye tek kame jo mogo kame likame opwonyere kede jo kalikame ocungo itek dwadwanyo gi, bala kame kidwanyo kede iwandik kacil ko kelo negi rwenyo. ¹⁷ Pimano jona kame amaro itiekunu neno kede ngeno gigi sek, gwokerenu kur icetarunu itim me jo dubo di ikonu poto tenge i kakame i cungu nu iye kitek. ¹⁸ Do dongunu ikisa kede ingec ka Rwot kede ngalak Yesu Kristo deyo bed buten nataman tuno kede ikare dedede. Amen!