¹ Do tie riki oudo Inabin me angalo idiere me jo bala kitekame jo pwony me angalo da oyaro bedo tie kede i dyere wu, jo nogo oyaro lwidar donyo kede pwony gi kame rwenyo jo, paka tuno iton dagi Rwot ko wilo gi, di kiko duparo amuducar adwir ikom gi. ² Di jo atot kobino lubo yote gi oparao, pi tim noni ko mino jo donyo yamo kope areco, ikom yongayo me ateni. ³ Kede tim me ingobel gi ni, ki ko donyo kelo yamo me abe, ki ko donyo cato will kede wu kame ngolo kop gi likame oyaro gal, doko amuducar gi likame oyaro nino. ⁴ Do kame di Rubanga likame oweko imalaikan otimo dub, eko uco gi piny ibur, di eko tweno gi kede irikoi me kaka col pi daro gi pi ngolo ne gi kop. ⁵ Likame eko weko paka lobo kacon, do eko lako Nua, dano me kanyauni, nya pwony me pore, ekelo alele me pii ilobo me jo kalikame woro Rubanga. ⁶ Dieko loko Bomban me Sodoma kede Gomora solo buru, engolo kop oloo gi kede reto gi di oko mino gi doko anen but jogo kame mito bedo jo kame likame woro Rubanga. ⁷ Di eko lako Lot, dano aber, obedo ool kede tim areco kame jo timo. ⁸ Pi dano opore ni, bedo mere idiere gi, pi gi kame ebedo neno kede winyo, olo pore me Tipo buli ceng, kede tice gi kame iswil dagi. ⁹ Rubanga ngeo epone me kwanyo dano kame woro Rubanga tenge iye atama, kede gwoko dano arac paka ceng me ngolo kop, pi mine alola. ¹⁰ Twatwal mere jo aoto ikom, kede imue me emuna, doko da ki cao akarinikin, jo acungi nwang ka tio kede tam gi ken gi, likame ki tie kede lworo moro ikom jo adongo kame oworo. ¹¹ Paka kiton imalaikan, kame dwong kede twer kede teko, likame kiko kelo pido me ayet ikom gi inyim Rwot. ¹² Jogi tie bala leini ali kaparo piny, aming kame omako amaka di oko neko, kiyamo kope areco ikom gi kame ili kede niang iye, gin kiyaro too kadikini cel pi dubere gi. ¹³ Kiyaro udo cul me likame tim apore nogo, bala kame jo mogo tero bala mulem, di kitimo Isapan iceng kitie bala ka ocukukao, kede ka opwokere, angalo gin ikom gi omio gi itie bala ka ocukukao iye ibagai wu. ¹⁴ Ki tie kede wang gi opong kede adote, kame likame imito weko timo dub, kiko ngalao cuny mogo kalika pwodi osipokin, ki tie kede cuny me timo ingobel, idwe kame olamo. ¹⁵ Jo otieko dagi yoo aber, di kiko tarasar lubo yoo ka Balamu wot ka Bosor, lo amaro cul kalikame apore. ¹⁶ Do bin oko buce pi kop me dub mere nono - asigira kame lebe li, di ko donyo yamo kede dwan me dano eko gengo poyo me enabi. ¹⁷ Jo gi cal kede Ataniek kame pi li iye, idoun kame yamo tie buko tenge; gin en kame okano pir gi colo me ekuna me nakanaka. ¹⁸ Pien kame di gin kiyamo kope atek adongo me ewaka di kony gi li, di mit me kom gi diko nuno gi, beo ilore gi do jo acil ko bwot abwota ibut gin jo atie bedo igi arac, jo gi kame tie bedo iye atotolun. ¹⁹ Di pwodi gin kiciko ne jo pi gen me udo agonya do di gin ki kom gi di kitie ipasoi me atotolun, piento dano kame obwono dano moro no, en edoko epasoit me dano obwone nono. ²⁰ Piento kame ingei gin bwot iye amunaun me lobo, di oyai pi ngec ikom Rwot kede ngalak Yesu Kristo, gin bobo kiko dok tukere iye di oko bwono gi, atiekini gi bino bedo rac lo agege. ²¹ Piento oudo bin ber, kame di koto likame ki ngeo yoo me pore, lono gin ngeno, di bobo kiko lokere tenge i cik kame omio gi. ²² Gini otimere negi di upere kede agole me ateni be, "ogwok olokere oko dok ingok mere, kede epege kame otieko lwoko di bobo eko dok une icwoto."