¹ Simoni Petero, obedo Epasoit kede ngaor ka Yesu Kristo, but gi jo otieko udo yei arom aroma kede mer wa, beo kipore ka Rubanga kede ngalak wa Yesu Kristo. ² Kisa kede mulem mede idiere wu, beo ingeno Rubanga kede Yesu Rwot wa. ³ Di lubere kede twero mere me malo, en eko mina jamini dedede kame makere kede kuo, kede woro Rubanga. Beo ingec meren ngat ko lwongo wa ideyo kede bero mere. ⁴ En kame emia kede cikere adwong kame pire tek, me beo igigi wan obed jo kame nywako kede ikuo mere, di otie jo bwot ii dubere me lobo ni di beo imit me kom. ⁵ Pi kop noni, tamakino nu medo bero ikom yei, iko nu medo ngec ikom bero, ⁶ Iko nu mede dino mit me kom ikom ngec wu, iko nu mede dino cuny ikom dino mit me kom, iko nu medo woro Rubanga ikom dino cuny. ⁷ Kede ikom woro Rubanga iko nu medo iye nywak me imiegu, ikom nywak me imiegu iko nu medo iye amara. ⁸ Pien kame itienu kede gigi dedede di gin kitie nyai ii wu, gin kimio wu likame ibedunu jo kame li kede teko, kede kame likame nyak ingec ka Rwot Kristo. ⁹ Do ngat kame li kede gigi udo wange oto likame neno kaka ber, do wie udo otieko wil be olwoke ikom dub mege kasek. ¹⁰ Pimano imiegu kede amiegu na tamakino wu moko lwongo kede yer kame oyero wu kede, pien kame itimunu gigi likame ibinunu poto. ¹¹ Pien manoni bino mino ko yabo ne wu odocon yongayo me ajakanut kalika jik kede me angalak wa Yesu Kristo. ¹² Pi mano likame abino jajalun pi yutuno ne wu gigi nakanaka, akadi bed bala ingeunu gi di isipakinunu iye ateni me nan. ¹³ Ebo ango aparo be eber, tek kame di pwodi atie ikuo me kom ni, pi poro ber keto wu iye iyutun. ¹⁴ Di angeo be ikare iyapiyapi, apore kede koma ni tenge bala kame Rwot wa Yesu Kristo onyuto na kede. ¹⁵ Medo iwi manono ango ayaro bino cane itek akadi di ango ali, ibinunu yutuno gigi nakanaka. ¹⁶ Pien wan bin likame olubo itatam kame dano oteto kede rieko me wie, me mino wu ngeno twer kede dwogo ka Rwot Yesu Kristo. Do wan obedo ijurak kame oneno dwongo mere kede wang wa. ¹⁷ Pien egamo woro kede deyo kibut Rubanga Papa kakame dwan oko wok kede ideyo amalo, di waco be, "Man en woda kame amaro, kame iya yom ikome." ¹⁸ Di dwan owok imalo ni wan owinyo di otie kede en i moru kacil. ¹⁹ Manoni omoko kop me imurai ebino bedo ber kame iketunu tam wu ikop noni, pien ebino bedo bala lero kame rieny kaka col tuno kede paka obai, di acer me iceng diko rieny i cuny wu. ²⁰ Me agege ngeunu be, likame tie kop moro me imurai me iwandik kacil ni, kame ngatamoro twero gonyo niang mere en kene. ²¹ Pien imurai likame obino ikare asek pi mit me dano do jo kacil ka Rubanga di gin oudo kiyamo di Tipo Kacil en kame telo gi.