¹ Baluwa kowok kibut Paulo ngat kobedo ngaor ka Kirisito Yesu pi mit ka Rubanga, kede kibut omin wa Temeseo. But ekodet me jo koyei Rubanga i Korinti karacel kede jokacil dedede kame tie Akaya. ² Kisa kede mulem kame wok kibut Rubanga Papa wa kede Rwot Yesu Kirisito bed butu. ³ Opwounu Rubanga Papa me Rwot wa Yesu Kirisito, Papa kame ngakisa, ngakwei cuny jo iepone dedede. ⁴ En ekweo cuny wa i can dedede, tetekeny wada otwerunu kweno cuny jo icegun kame tie kede peko, di okweo cuny gi iekite acel nono kame Rubanga okweo kede cuny wada. ⁵ Pien bala kame can ka Kirisito kame wan onywakunu dwong ne wa kede, kamanono da wan onywakunu kweno cuny adwong kame Rubanga mio pi Kirisito. ⁶ Ka wan otie i peko, mano kelo ne wun kweicuny kede alako; doko ka kokweo cuny wan, uda iudunu kweicuny kame mio wu idirenu kanyakino akodi can acel nono kame wada otie kanyakino. ⁷ Wan otie kede gen atek butu; pien wan ongeo be, bala kame inywakunu kede wa can, kamanono da inywakunu kede wa kweicuny. ⁸ Imiegu kede amiegu na, wan likame omito be ibedunu abongo ngec i kom peko kame wan obeo iye i Esia; pien oudo komio wa peko kalikame kanyere, omio oko bedo li kede gen me kuo. ⁹ Ateteni wan do oudo owinyo i kuo wa bala kotieko ngolo ne wa kop me to; do manoni otimere tetekeny wan kur oket gen wa i kom wa kenwa, do me wek ogen Rubanga ngat kame yaruno jo oto. ¹⁰ En ngat kame eko mino wa obwot ki can kame oudo romo kelo to, ebino meede mino wa bwot; wan otieko keto gen wa i kome be en ebino mino wa obwot bobo. ¹¹ Uda miero ilegunu karacel kede wa, tetekeny Rubanga winy ilega me jo atot pirwa, di en eko mino wa winyo, di jo atot ko bino pwone pirwa. ¹² Gikame wan owakere iye en ine be, ngec me cuny wa juro be, epone me kuo wan i piny kan, kede twatwal mere epone kame wan otie bedo kede wu, tie i yore me lero kede ateni kame wok kibut Rubanga, likame kede rieko me lobo kan, do kede kisa ka Rubanga. ¹³ Wan owandiko ne wu gikame wun itwerunu somo di ikounu niang iye kenekene. Ango atie kede gen be ibinunu niang gi dedede kiber, ¹⁴ akadi bed bala nan iniangunu dul kenekene. Manono bino mino i ceng me dwogo ka Rwot Yesu, ikarununu bino wakere pirwa, di wada oko karuno wakere piru. ¹⁵ Ango oudo angeo man kiber, en omio bin aiko pi cako kong bino butu, tetekeny iudunu winyo tien are. ¹⁶ Pien ango amito be abei welao wu di atie ot Makedonia, di doko ako beo butu di adwogo ki kuno, me wek imianu kony me meede kede ot na Yudea. ¹⁷ Mam oudo ango atie lokoloko tam na i kare kame oudo ango aiko kede kamano? Benyo, ango do mam atimo iik na bala dano me piny kan, kame kong yei gimoro di doko eko lokere dagi i cen mere? ¹⁸ Ateteni bala kame Rubanga genere kede, likame tie kop moro kame wan oyei ne wu di doko oko lokere dagi. ¹⁹ Pien Yesu Kirisito, Wot ka Rubanga kame ango kede Sila kede Temeseo opwonyo kop mere butu, likame obedo ngat kame kong yei gimoro di doko eko lokere dagi; do en eyei gimoro icel atwal. ²⁰ Piento en kame emio gi dedede kame Rubanga ocikere timo cobere. En komio wan omio Rubanga deyo i Yesu Kirisito di oyamo be “Amen.” ²¹ Do Rubanga en kame mio wan karacel kede wun ocungunu itek i Kirisito, doko etieko kwero wa. ²² En etieko keto alama mere i kom wa, di eko mino wa Tipo i cuny wa pi bedo bala gikame moko iik mere. ²³ Rubanga en mujura na; ango likame adwogo Korinti pien ango oudo likame amito mino wu peko. ²⁴ Likame pien wan otie dino wu i gikame poore iyeunu; do wan otio karacel kede wu pi yomo cunyu, pien wun icungunu itek i yei wu.