1
. Baluwa ka Petero, obedo nga ot ka Yesu Kuristo but jo kongo okosasakin ki adulio me Pontus Galatia kappadocia, Asia kede Bisinia.
2
. Rubanga papa oyero wu bala kite kame ecako yiko kede sek di eko lonyo wu kede Tipo me wek ibedunu jo kame winyo kede kikiro wu kede remo ka Yesu Kuristo kisa bed kede wu kede remo ka Yesu Kuristo kisa bed kede wu kede mulem mede nakanaka.
3
. Winyo bed but Rubanga en papa me Rwot wa Yesu Kuristo ame pi kisa mere kodwong en emiyo konywalo wa bobo kikuo kanyen me gen me iyamu ka Yesu Kuristo kikom jo oto.
4
. Me wek ogam gikame likame otweo wilo di likame epwokere kede likame rwenyo, otieko kano ne wu manoni kimalo
5
. Kame odaro kede twero ka Rubanga pi yei kede udo alako kame eiiko pi tuco ne wu ikare me ajikini.
6
. Akadi nataman olelo twatwal do etiye pi kare kacecek, pien pwodi iteunu kede atama adwong twatwal.
7
. Do atama me yei un kame wel mere kalamo gikame ber bala saabu kame dubere bed bala otame kede mac cemogo oudo gi di pwodi kipako, di kiworo di kimio deyo ikare me nyutere ka Yesu Kuristo.
8
. Wun likame inenenu do imarenu bed bala wun pwodi likame inenenu nan, do iyeunu en, lelunu do ilel me yom cuny kalikame wacere di epony kede deyo.
9
. Pien gamo yei en adwokuni me alako me cuny.
10
. Pi alako mere en kame inabino openyo di kinging co kitek ngat komurao kop me kisa be epore bino but wu.
11
. Mono nyo arabo epwone me kare mane kame Tipo kacil kame tie kikom gi oneno kede di gin kimio ijura di pwodi Yesu likame oneno can, kede deyo kame bino lubo.
12
. Oudo konyuto ne gi be, likame kitie timo tie amako gin kengi do puwun di lubere kede gikame jo kame tuco ejin aber nataman waco ne wu pi twer me Tipo kacil kame ko cwao piny di wok kimalo, gi kame imalaikan paro pi neno.
13
. Pimano gwokunu tam wu di iyakerenu cuto, di wi wu tio, kede gen dedede kikom kisa kame ekelo ne wu kikare kame kobino nyuto ne wu kede Yesu Kuristo.
14
. Bala idwe kame wor, kur imiunu kuo wu lup mit asek di pwodi ikwianu piny,
15
, Do kie ekite me ngat kolwongo wi tie ngat kacil wuda poore ibedunu jo kacil kie ekite me tic wu.
16
. Pien kowandiko be bedunu jo kacil pien ango abedo ngat kacil.
17
. Pien kame in ilwongo papa ngat kame ngolo kop ne dano acelacel di lubo ti mere poore do ibedunu kede iworo kede wor inyinge pi kare lung kame itie kede ipiny kan.
18
. Wun inyeu nu iber be, likame kolako wu kede jame kopwokere me piny kan bala siliba kede saabu do kikom tic me itok me jo okwan wu;
19
. do kede remo ka Yesu Kuristo kopore acalo bala oromo kame likame tie kede dub arabo pwokere moro.
20
. Kame oudo okwanyo riki sek di pwodi likame ocweo piny do eko nyutere ikare me ajikini noni.
21
. Ngat kame ki kokome yei Rubanga kame oyaruno en kikom jo oto, di oko mine wor me wek yei wu, kede gen wu, bed but Rubanga.
22
. Nen be itiekunu lonyere icuny wu di ki Lubunu ateni kame beo ki Tipo kacil kame tie iyamara but imiegu kede amiegu, poore do omarerenu kenu kenu kede cuny wu lung me amara.
23
. Dano kame otieko nywalo tien me are, likame kelo kodi opwokere do ekelo kodi kalikame opwokere mere, kede kop ka Rubanga kame kuo di bedo nakanaka.
24
. Pien kom dano cal bala lum deyo lung me dano cal bala ature me lum, kom lum ner do di ature mere ko ony ppiny.
25
. Do kop ka Rwot bedo nakanaka di kop nogi en obedo ejiri kame opwonyo wu