¹ Imiegu kede amiegu na kame oudo ango abino kede but wu likame oudo obino kede yamo amit amotoko rieko, do tatamo ne wu ijura ka Rubanga. ² Pien ango amoko tam pi weko ngeno gimoro kenekene idiere wa kwanyo Yesu Kristo kenekene ngat kame oguro iyat. ³ Doko udo ango atie kede ikare me goro kede lworo kede imiel kom atek. ⁴ Doko udo yamo na kede pwony na likame beo ikope kame wao tam me rieko ka dano, do ebeo itice me Tipo Kacil kede itwer, ⁵ Wek kur yei wu cungi irieko ka dano, do itwer ka Rubanga. ⁶ Do wan oyamo rieko idiere gin jo ocwiny, dodi likame rieko me lobo ni kame kony gi li amotoko jo pug me lobo ni, likame bino niang. ⁷ Do wan, opwonyo rieko a Rubanga opong kede imung, iton rieko mogo okanere kame Rubanga okano di pwodi likame ocweo lobo ni pi deyo wan. ⁸ Ka likame nga pug moro me lobo ni kame ngeo, pien kame koto udo ingeo, koto likame oudo iguro Rwot me deyo. ⁹ Pien bala kitekame owandiko kede be, "likame tie wang oneno, amotoko yit owinyo, doko likame edonyo icuny dano gi kame Rubanga oiko ne jo kame mare". ¹⁰ Do Rubanga oyabo gi but wan beo i Tipo Kacil mere. Pien Tipo Kacil mo gi dedede ebo, akadi kakatut me kope a Rubanga. ¹¹ Do ngai kame ngeo tam me dano? kwanyo cuny dano kame tie ien, kamanono da tam a Rubanga likame tie dano moro kame twero ngeno kwanyo Tipo Kacil a Rubanga. ¹² Pien wan likame ogamo tipo me lobo ni, do Tipo Kacil kame obedo me ka Rubanga me wek tetekeny ongei jame kame Rubanga omio wa nono. ¹³ Manono en gi kame wan oyamo di likame beo ikope me rieko me dano, do kame Tipo Kacil pwonyo di egonyo gi me cuny but jo kame tie kede cuny da di ebeo i Tipo Kacil. ¹⁴ Do dano kalikame obedo me cuny, likame twero gamo jame me cuny pien gin itie gi me mingo bute. Piento jo kame tie kede cuny en kame twero popoko dwong gi. ¹⁵ Pien dano kame tie kede cuny en kame twero ngeno dwong me jame dedede dodi likame tie ngat kame ngolo ne kop. ¹⁶ Pien ngai kame ngeo tam ka Rwot, me wek etwer mine tam? Do but wan, wan otie kede tam ka Kristo.