¹ Ntheura Yesu, nakuzula na Mzimu Mtuba, wakawelera kufuma mu dambo la Yolodani, ndipo wakalongozgeka na Mzimu mu mapopa. ² Uko mazuba 40 wakayezgeka na Satana, wakalya kanthu yayi, napa umaliro wa nyengo iye wakapulika njala. ³ Satana wakati kwa iye,"pala ndiwe Mwana wa Chiuta phalirani libwe ili lizgoke buledi," ⁴ Yesu wakamuzgora iye," kuli kulembeka,'munthu wangakhala wamoyo yayi na buledi lekha." ⁵ Ndipo satana wakalongozga Yesu pachanya nakumurongora iye maufumu ya mucharo kulingana na nyengo. ⁶ Satana wakati kwa iye,"nikupenge mazaza yose na uchindami, chifukwa kwapiwa kwa ine, ndipo ningapereka ku wali yose nkhukhumba. ⁷ Sono apa, ngati wanigwadira na kundisopa ine, chibenge chako." ⁸ Kweni Yesu wakazgora nakuti kwa iye,"chili kulembeka usopenge Fumu Chiuta, nakumutebetera iye yekha." ⁹ Nheura satana wakamurongozgera Yesu ku Yelusalemu na kumubika iye pachanya chomene pa Tempele, nakuti, pala ndiwe mwana wa Chiuta, jiponye wekha kufuma pano. ¹⁰ Pakuti chilikumbeka, watumenge bangelo kwa iwe kukuvikilira iwe,' ¹¹ ndipo bamukukunyamura mumaboko yabo, mwakuti uleke kupwetekeka malundi yako ku malibwe." ¹² Pakumuzgora iye, Yesu wakati, chili kuyowoyeka, ungayazganga Fumu Chiuta wako nakumuyezga." ¹³ Apo satana wakati wamalizga kumuyezga Yesu, waka fumapo na kumuleka kufikira nyengo inyake. ¹⁴ Ntheura Yesu wakawerela ku Galileya mu nkhongono ya Mzimu, na uthenga wake ukaluta kose-kose kuzungulira chigaba chose. ¹⁵ Ndipo wakayamba kusambizga muma Sinagogi yabo ndipo wakalumbika na bose. ¹⁶ Wakiza ku Nazareti, umo wakakulira, ndipo, nga ndi mwambo wake, wakanjira ku Sinagogi pa zuba la Sabata na kuyimilira kubelenga mwakukuwa. ¹⁷ Buku la Nchimi Yesaya yikaperekeka kwa iye wakajula buku nakusanga pamalo apo pakalembeka, ¹⁸ Muzimu wa Fumu uli pa ine, chifukwa wakanizoza ine kuyowoya uthenga uwemi ku bakavu. walikunituma ine kuphara za kumasuka ku ukapolo, nakuwezgelapo bakudoloka maso, kumasula bose bakukakika. ¹⁹ kuphara za chaka cha Fumu na lusungu." ²⁰ Ntheura wakavunga buku,wakapereka ku muteweti nakukhala pasi. Maso ya bose mu Sinagogi yakalabiska pa iye. ²¹ Wakayamba kuyowoya kwa ibo. "Lino mazgo yakwaniliskika mukupulika kwinu." Waliyose wakayowoya uwemi wake ndipo bakazizwa na mazgu yauchindami ayo yakafumanga mu mlomo wake, ndipo bakafumba, ²² "Kasi uyu ndi mwana wa Jozefe.? ²³ Iye wakati kwa iwo, "Nadi muzamukuyowoya nthalika kwa ine, Adokotala, jichizgani mwekha. Chilichose icho tili kupulika icho mukachita ku Kapenaumu. chitani chimoza pela muboma yinu." ²⁴ Kwene wakati,"unenesko nkhuyowoya kwaimwe, kulije nchimi iyo bakayipokelera ku boma lakwa iye. ²⁵ Kwene mu unenesko nkhumuphalirani kuti kukaba vyokolo vinandi mu Isirayeli mu nyengo za Eliya, apo mutambo ukajalika kwa vilimika vitatu na miyezi sikisi ndipo njala yikulu yikiza pa charo chose. ²⁶ Kwene Eliya wakatuka ku waliyose chara, kwene Zarefati mu Sidon, kwa chokolo icho chikakhalanga kwene kura. ²⁷ Kukaba ba vyoni banandi mu Yisilayeli mu nyengo yakwa Eliya nchimi, pakabavye wakuchizgika kwene kufumyako Namani mwina Siliya." ²⁸ Banthu bose mu Sinagogi bakazula na ukali apo bapulika vinthu ivi vyose. ²⁹ Bakanyamuka, mwakuchichizga kumufumya mu boma, nakumulongozga pachanya pa lupili uko boma lao likazengeka, bakapenja kuponya pasi. ³⁰ Kwene wakapolota pakati pawo nakuluta ku malo yanyake. ³¹ Ntheura iye wakaluta ku Kapeneumu, musumba wamu Galileya, na kuyamba kubasambizga pa Sabata. ³² Bakaba bakuzizwa pa visambizgo vyake, chifukwa wakayowoyanga na mazaza. ³³ Sono mu Sinagogi mula mukaba munthu wa muzimu uhen, ndipo wakalira mwa kukuwa, ³⁴ Ah! Kasi tichitechi naimwe, Yesu waku Nazareti? ka mwiza kui bwangandura ise? Nkhumumanyani kuti ndimwe mtuba wa Chiuta!" ³⁵ Yesu wakachiphalira chimuzimu, nakuti, "leka kuyowoya! Fuma mwaiye!" apo chi muzimu chikaponya munthu yura pasi pakati pa ibo, wakafuma mwa iye, ndipo kuti ukamupweteka muli mose chara. ³⁶ Banthu bose bakaba bakuzizwa chomene, bakapitilizga kuyowoya za iye yumoza na munyake. Bakati, "kasi ni mazgo ya mutundu uli aya? Wakulamula ku mizimu yiheni na mazaza na nkhongono vikufuma." ³⁷ Sono uthenga wa iye ukayamba kuphalazgika mu malo yose ya chigaba. ³⁸ Ntheura Yesu wakafumamo mu Sinagogi naku njira mu nyumba ya Simoni. Sono anyina vyala ba Simoni basuzgika na thupi kupya chomene, bakamulomba mumalo mwa mwao. ³⁹ Ndipo wakaimilira ndipo wakakalipira kupya kwa thupi, ndipo yikafuma mwaiye. Penepapo wakauka na kuyamba kubatebetera. ⁴⁰ Apo zuba likanjilanga, banthu bakamuperekera yesu bakulwala nthenda zakupamba-pambana. Wakabika maboko yake pa iwo bose nakuba chizga. ⁴¹ Mizimu yiheni yakafumamo mubanandi, nakuchemerezga na kuti, "ndimwe Mwana wa Chiuta!" Yesu wakakalipira vimizimu viheni kuti vileke kuyowoya, chifukwa vikamanya kuti iye wakaba Khrisitu ⁴² Apo kukati kwacha, wakaluta ku malo kwayekha. Muzinda wa banthu ukamupenja iye na kufika kumalo uko wakaba. Bakayezgeska kuti waleke kufumako kwa iwo. ⁴³ Kwene Yesu wakati kwa iwo,"nkwenereraso kukapharazga uthenga uwemi wa Chiuta kumisumba, ndicho chifukwa nkhaumika kuno. ⁴⁴ Ntheura wakapitilizga kupharazga muma Sinagogi mpaka na Yudeya yose.