¹ Yala ruwasa ta aba ja min usura ta Jalaad jena ta Makir (al kan jena ta Manassa), al min usura ta iyal ta Yusuf, umon ja wa wunuso gidam ta Mosa wa ruwasa al kan mugedimin ta usar t aba ta shaab Israel. ² Umon kelim, ''Yahwah weri le ita, ya said ta anina, kede gesim ard de le shaab Israel be gura. Yahwah kan weri le ita kede wedi nisba ta Salfahat aku ta nina le banat tuo. ³ Lakin kan banat tuo juozu min gebila tani min shaab Israel, nisba tumon bi shilu min gebila ta nina. Wa bi ziddu le nisba ta gebila al juozu umon fugu. Bi shilu min nesib ta gura ta anina. ⁴ Wa kan zaman ta Yubil ta shaab Israel ja, bi ziddu nesib tumon le nesib ta gebila al juozu umon fugu, wa nesib tumon bi shilu min nesib ta aba ta nina. ⁵ Mosa wedi awamir le shaab ta Israel, hasab kalam ta Yahwah. Huwo kelim, ''Kalam al gebial iyal ta Yusuf kelim de sah. ⁶ De haja al yahwah kelim be kusus ta banat ta Salufahad. Huwo kelim, 'Kede juozu umon bi nas al umon bi ayinu kues le umon, Lakin kede bes kun min gebila ta abuhat tumon. ⁷ Kede nesib ta Israel ma gairu min gebila le gebila. Lakin ayi zol min shaab Israel lazim bi iltezim be nesib ta abuhat tuo. ⁸ Yi binia al indu nesib tuo fi shaab Israel kede juozu min gebila al tabi abuhat tuo. de ashan ayi zol shaab israel biligu miras tuo min abuhat tuo. ⁹ Kede ma hawilu nesib min gebila le gebila. Ayi wahid min gabaeil ta Israel kede hafiso miras tuo.'' ¹⁰ Banat ta Salufahat amulu nfsa kalam al Yahwah kelim le Mosa. ¹¹ Mahla, wa Tirsa, wa Hajla, wa Milka, wa Noah, banat Salufahat, juozu umon be iyal amam tuomn, iyal ta Manassa. ¹² Juozu umon be iyal ta Manassa iyal ta Yusuf. Be triga miras tumon fadulu fi gebila ta abu tumon. ¹³ De yao wasaya wa gawanin al Yahwah wedi le shaab Israel be wasat ta Mosa, fi Arabat Moab safa ta Urdon fi Ariha.