¹ Zaman Yesuah nazal min jebel, adad kebir min jamahir masha warau. ² Zol ayan bi juzam ja le huwo wa dengir gidamu, ''Rabi, kan indak niyah, aliju ana.'' ³ Yesuah medu yedu wa lemesu huwo, gal, Indi niyah. kun nedif.'' Nefsu zaman alaju huwo min ayan ta juzam. ⁴ Yesuah kelimu le huwo, ''keli inta ma wori le ai zol. Amsi sika taki, wa wori nefsak le kahin wa gedimu hadaya al Musa kan wasi, bi kun shudah le umon.'' ⁵ Zaman Yesuah dakalu le Capernaum, kaid ta miya jesh ja le huwo wa asalu, ⁶ gal, ''kadam bitai naim fi bet moshulul wa fi waja shedid.'' ⁷ Bad dak Yesuah kelimu le huwo ''Ana bi ja wa aliju huwo.'' ⁸ Kaid de juwabu wa kelimu, ''Rabi, Ana ma istehik ashan inta bi dakalu fi bet bitai, bes gul kalam wa kadam bitai bi ligo ilaj. ⁹ Fa Ana kaman zol al tehet sulta ta zol tani, wa Ana indi jesh tehet ana.Ana bi kelim le wahid, 'amshi,' wa huwo bi yemsi, wa le wahid tani, 'ta-al,' wa huwo bi ja, wa le kadam bitai, 'amul de,' wa huwo bi amul.'' ¹⁰ Zaman Yesuah sima kalam de, gelbu kasuru wa kelimu le nas al kan bi ja warau, Hagiga Ana bi kelim le intum, Ana ma ligo ai zol be iman de fi Israel. ¹¹ Ana bi kelim le intum, Kutar bi ja min sherik wa gharib, wa umon bi num jambu terbeza ma Ibrahim, Ishak, wa Yaghub, fi molokut ta samah. ¹² Lakin iyal ta molokut bi jadau bara fi duluma, Fi mahal al fogo kore wa adi sunun.'' ¹³ Yesuah kelimu le kaid de, ''Amsi! ze inta amin, bi amulu le inta.'' wa kadam de aliju nefsu saa. ¹⁴ Zaman Yesua ja fi bet ta Butrus, Huwo safu uma ta mara ta peter naim ayan be huma. ¹⁵ Yesua lemesu ida ta hiya, wa huma khala hiya. Hiya gam wa kadimu huwo. ¹⁶ Zaman misa ja, nas jabu le Yesua nas kutar al muskunin ma roho ta sherir. Huwo amiru arua keli tala bara be kilma wa aliju kulu nas al kan ayanin. ¹⁷ Fi teriga de kamilu kalam al kan kelimu be Nebi Isaiah, gal ''huwo be nefsu shalu ayan bita nina wa amrad bita nina." ¹⁸ Zaman Yesua sufu jamahir haulu, huwo wodi tojihad ashan bi amsu fi tija tani ta bahar Galiliya. ¹⁹ Wahid min ulama ta ganun ja le huwo gal, ''mualim, Ana bi amsi warak fi ai mahal inta bi amsi fogo.'' ²⁰ Yesua kelimu le huwo, ''Sailib indum hufar, wa tiyur al fi jou indum biyut, lakin ibin al insan ma indu mahal ashan bi num fogo.'' ²¹ Wahid min telmiz kelimu le huwo, ''Rabi, keli ana mashi awel ashan dofunu abui.'' ²² Lakin Yesua kelimu le huwo, ''Taal warai, wa sibu meitin keli dofunu meit bitomon.'' ²³ Zaman Yesua dakalu fi murkab, talamiz bitou masha warau. ²⁴ Hawa kebir haza bahar, ashan kida murkab kan kati be muaj. Lakin Yesua kan naim. ²⁵ Talamiz ja le huwo wa goumu huwo, gal, ankizu nina, Rabi; nina gerib ma mutu!'' ²⁶ Yesua kelimu le umon, ''malu intum bi kafu, intum al deifin fi iman?'' Wa huwo gam fok wa wobiku hawa wa bahar. Bad dak hinak jou biga adi. ²⁷ Nas del istagrabu wa gal, ''Zol de sikil yatu, al hawa wa bahar ihterim huwo?'' ²⁸ Zaman Yesua ja fi tija tani bita bahar wa le doula ta Gadarenes, itnin nas moskunin be arua sherira gabilu huwo. Umon ja bara min mugabir wa umon kan takiyanin, ashan zol musafir ma bi futu be sika dak. ²⁹ Wa umon kore wa galu, inta deir sunu min nina, Ibin Allah? Hal inta ja hina ashan azibu nina gubal zaman?'' ³⁰ Kodurukat kan bi yakul hinak, ma beid shedid min umon. ³¹ Arua sherira del kelimu le Yesua gal, ''Kan inta turudu nina, Rasulu nina le kodrukat dak,'' ³² Yesua kelimu le umon, ''amshu!'' Arua sherira del tala bara wa dakalu le kodrukat; wa biga kodurukat del jere min mahal al nazil de le bahar wa umon matu fi moya. ³³ Nas al kan bi haresu kodrukat del joro wa mashu le medina wa wodi taharir kamil, Kasatan haja al hasal le nas al kan moskunin be arua. ³⁴ Nas al kan fi medina ja ashan gabilu huwo. Zaman umon shafu huwo, umon asalu huwo ashan yekali iklim bitomon.