¹ Mata hakimu, wa ma bi hakimu inta. ² Fi teriga al inta bi hukumu, bi hakimu inta, wa be wozin al inta wozinu, bi wozinu le inta. ³ Le inta bi suf fi wasaka ali fi ena bita akuk, lakin inta ma zekiru wasaka al fi ena bitak? ⁴ Kef inta bi gul le akuk, 'keli ana tala wasaka ali fi ena bitak,' lisa wasaka fi dakil ena bitak? ⁵ Intum al mumesilin! awelan tala wasaka bara min ena bitak, wa biga inta bi suf kwes ashan talau al fi ena bita akuk. ⁶ Mata wodi haja al kudus le kilab, wa mata jadau hajat jemil gidam khodrukat. umon bi dusu be kurayin bitomon, wa bi aglib wa sheretu inta le gita-at. ⁷ Asadu, bi wodi le inta. fetisu, inta bi ligo. Dugu bab, wa bi fatau le inta. ⁸ Fa le kulu zol al asadu, bi ligo; kulu zol al fetisu, bi ligo; wa le zol al bi dugu bab, bi fatau le huwo. ⁹ Wele munu minakum, kan jena bitou asadu rakif, bi wodi le huwo hajer? ¹⁰ Wele kan huwo asadu samak, bi wodi le huwo debiba? ¹¹ Ashan kida, kan intum al sheririn aruf kef bi wodi hadayat kwes le iyal bitakum, kef ketir shedid Abu bitakum al fi samah bi wodi hajat kwes le nas ali asalu Huwo? ¹² Ashan kida, kulu hajat al inta deir nas bi amulu le inta, inta kaman keli amulu le umon, fa de yau gawanin al Musa wa anbiya katabu. ¹³ Dakalu be bab al deik. Fa bab al wase wa kebir huwo yau sika al bi wodi nas le demar, wa hinak nas kutar bi yemsu fogo. ¹⁴ Lakin bab huwo deik wa sika de huwo sa-ab al bi silu nas le haya, wa besitin al bi ligo. ¹⁵ Keli intum kun harisin min anbiya al kazabin, al bija le intum be jilid ta korufan lakin umon morfoinat al hagiga. ¹⁶ Be semar bitomon intum bi aruf umon. Hal nas bi limu inab min kasabin ta shok wele jemeza min alig? ¹⁷ Fi nefsu teriga, kulu shejer al kwes bi antij semar al kwes, lakin shejer al batal bi antij semar al batal ¹⁸ Shejer al kwes ma bi antij semar al batal wele shejer al batal bi antij semar al kwes. ¹⁹ Ai shejer al ma bi antij semar al kwes bi gatau wa bi jadau fi nar. ²⁰ Ashan badin intum bi arufu umon be semar bitomon. ²¹ Ma ai wahid al bi gul le ana, 'Rabi, Rabi,' bi dakulu fi molokut ta samah, lakin ile del al bi amulu meshia ta Abu bitai al fi samah. ²² Nas kutar bi gul le ana fi yom dak, ''Rabi, Rabi, nina kan ma nabau fi isim bitak, fi isim bitak nina turuju sitan, wa fi isim bitak nina amulu hajat ketir?' ²³ Wa Ana bi kelim le umon, 'Ana ma bi arufu intum! amsu beid min ana, intum al bi amul amail sherir. ²⁴ Ashan kida, ai wahid al asma kalam bitai wa kutu fi sokol bi kun ze zol al negid al abinu bet bitou fok hajer. ²⁵ Matara bi nezil, feidanat bi ja, wa hawa bi ja wa bi dugu bet, lakin ma bi waga, ashan abinu fok hajer. ²⁶ Lakin ai wahid al asma kalam bitai wa ma kutu fi sokol bi kun ze zol al belit al abinu bet bitou fok rumula. ²⁷ Matar bi nezil, feidanat bi ja, wa hawa wa bi dugu bet, wa bet bi waga, wa bi demir kulu kulu.'' ²⁸ De ja baat zaman Yesuah kalasu wonusu kalam del, jamahir kan istagrab be dirsa bitou, ²⁹ fa huwo derisu umon ze wahid al indu sulta, wa ma ze ulama bitomon.