¹ Fi yom dak Yesua masha bara min al bet wa gaad taraf bahar. ² Jamahir lama hauli huwo, huwo dakalu fi murkab wa gaad, kulu jamahir wagaf fi taraf bahar.. ³ Bad dak Yesua kelimu le umon hajat ketir bi amsal. huwo gal, ''Muzari masha bara wa zara tirab. ⁴ Zema huwo bi zarau, tirab tanin waga fi share, wa tiyur ja wa akal kulu. ⁵ Tirab tanin waga fi ardi fogo hujar, mahal al ma indu turab ketir. tirab del gam, ashan turab ma ketir. ⁶ Lakin baad shemis tala, umon nasifu kulu ashan umon ma indu iriik, wa umon matu. ⁷ Tirab tanin waga fi wasat shok. Shok gam fok wa kanagu umon. ⁸ Tirab tanin waga fi turab al kwes wa tala zura, tanin miya marat wa aktar, taninin sitin, wa tanin teletin. ⁹ Kulu zol al indu adan keli yesma.'' ¹⁰ Talamiz ja wa kelimu le Yesua, ''Le inta bi wonusu le jamahir be amsila?'' ¹¹ Yesua juwabu wa kelimu le umon, Wodi le intum fursa ashan fahimu ashrar an molokut ta samawat, lakin le umon ma wodi. ¹² ashan ai zol al indu, hata al ketir bi wodi le huwo. Lakin ai zol al ma indu, hata kan huwo indu bi shilu minu. ¹³ De yau sabab al Ana bi kelim le umon be amsila: hata kan umon bi ayinu, umon ma bi suf; wa hata kan umon bi asma, umon ma bi asuma, wele bi fahim. ¹⁴ Le umon nubuwa bita Isaiah kamilu, al bi gul, ze bi asma umon bi asuma, lakin mafi teriga umon bi fahim; ze bi ayinu umon bi suf, lakin mafi teriga umon bi fahimu. ¹⁵ Gulub ta nas de tala belidin, wa umon tala gowi ashan asuma, wa umon gafulu uyun tomon, asan umon ma bi suf ma uyun tomon, au asuma be adana tomon, wele fahimu be gulub tomon, umon bi aglib tani, wa A ana bi aliju umon. ¹⁶ Lakin baraka le uyun bitak; le-anu bi shuf; wa adana takum, ashan bi yesma. ¹⁷ Hagiga Ana bi kelim le intum be-inu anbiya kutar wa nas hagigiyin indum niya ashan bi suf hajat al intum bi suf. wa ma ayinu umon. Indum niya ashan bi asuma hajat al intum asuma, wa ma asuma umon. ¹⁸ Asuma bad kida le amsal ta muzari al bi zara tirab tou. ¹⁹ Kan ai zol al asuma kalam bita molokut lakin ma fahim, sitan bi ja wa bi shilu bara haja al zarau fi gelbu. De yau tirab al zarau fi tarab share. ²⁰ Tirab al zarau fi ardi fogo hujar yau zol al bi asuma kilma wa bi akudu be farah, ²¹ lisa ma indu iriik fi nefsu wa huwo bi ithamal fi zaman guseir. Kan masakil wele itihadad zahar ashan kilma, huwo seri bi waga. ²² Tirab al zarau fi wasat shok, de yau zol al asuma kilma, lakin hajat bita duniya wa sokol gani bi kanagu kilma, wa huwo biga ma bi undu shimar. ²³ Tirab al zarau fi turab al kwes, de yau zol al asuma kilma wa bi fahim. Huwo bi antij shimar, bi tala miya marat wa aktar zema zarau, tanin sitin, wa tanin teletin marat wa aktar.'' ²⁴ Yesua wori le umon amsal tani. Huwo gal, ''Molokut ta samah huwo ze zol al zarau tirab al kwes fi zira tou. ²⁵ Lakin zaman nas naimin, Adu tou ja wa zara kaman ges fi wasat geme wa huwo masha. ²⁶ Zaman geme del gam wa tala shimar, Wa ges del zahar kaman. ²⁷ Kudam ta zol al mosul min al zira de ja le huwo wa gal 'Ya seid inta kan ma zara tirab al kwes fi zira? kef biga indu ges? ²⁸ Huwo kelim le umon, 'Adu yau amulu.' Kudam de kelim le huwo, Hal inta deir ashan nina bi yemshi amurugu bara?' ²⁹ Zol al mosul de kelim, 'La. Le-anu kan intum amurugu ges de bara, intum bi amurugu geme de ma umon. ³⁰ Keli umon raba sawa lahadi fi zaman ta hasad. Fi zaman bita hasad Ana bi kelim le nas al bi gatau, ''Awel amurugu ges wa robutu umon fi komat ashan bi aragu, Lakin limu al geme fi gugu.''''' ³¹ Bad dak Yesua kaman wori le umon amsal tani. huwo gal, ''Molokut ta samah ze bizra al saheir ali zol bi shilu wa zarau fi zira tou. ³² Bizra de huwo saheir kalis min buzur al tanin. Lakin kan raba, huwo bikun agbar min buzur al tanin. Huwo bikun shejer, ashan tiyur al fi jou bi ja wa abinu biyut tomon fogo.'' ³³ Yesua kaman wori le umon amsal tani. ''Molukut ta samah ze kemira ali mara bi shilu wa lakbatu ma talata wozin ta degig lahadi hajin kulu bi furu. ³⁴ Yesua wori kulu hajat del le jamahir be .amsal; wa huwo ma kelim haja le umon bidun amsal ³⁵ De yau bi amur al kan nebi wanisu bi jaa hagiga, zema ma huwo wanisu, "Ana bi fata kasuma tai be amsal Ana bi kelim hajat al dusu min asas bita duniya.'' ³⁶ Bad dak Yesua sibu jamahir wa masha dakil al bet. Talamiz bitou ja le huwo wa gal, ''Wori le nina amsal bita ges al fi zira.'' ³⁷ Yesua juwabu wa gal Zol al zara bizra huwo yau ibin al insan. ³⁸ Zira huwo yau al duniya; wa bizra al kwes de, del yau iyal bita molokut. Ges de yau iyal bita zol al sherir, ³⁹ wa adu al zara umon yau sitan. Hasad yau nihaya bita zaman, ⁴⁰ Ashan kida, ze ges del limu min dura wa haragu be nar, be kun zede fi hakir beta sinin. ⁴¹ Ibin al lnsan bi rasulu bara malayikat bitou, wa humon bi lemu bara min malakut bitou kulu hajat al sabab le khatia wa del al amulu shar. ⁴² Bi jadau umon fi hufra ta nar, hinak bi kun fi kore wa adi sunun, ⁴³ Bad kida nas al kwesin bi lama ze shemis fi molokut bita Abu tomon. zol al indu adana kede huwo asuma. ⁴⁴ Molokut ta samah ze haja al mohim dusu fi zira. Zol ligo wa dusu. fi fara huwo masha, biyu kulu hajat huwo indu , wa istara zira dak. ⁴⁵ Tani Molokut bita samah huwo ze zol al tajir al suf hajat al indu keima. ⁴⁶ zaman huwo ligo wahid min juwahir al keima tou kebir, Huwo masha wa biyu ai haja al huwo indu wa istara al juwahir. ⁴⁷ tanimara, molokut bita samah ze sabaka al kutu fi bahar, wa limu kulu mokholugat ta ai nou. ⁴⁸ Zaman biga malyan, Sayadin de juru fi taraf bahar Bad dak umon geni tehet wa limu hajat al kwesin fi makhazin Lakin hajat al ma kwesin jadau bara. ⁴⁹ Huwo bikun zede fi zaman al akir. Malaikat bi ja wa ferigu al deifin min wasat ta nas al kwesin. Bi jadau ⁵⁰ umon fi hufra ta nar, hinak fi bikun kore wa adi sunun. ⁵¹ ''Hal intum fahim kulu hajat del?'' Talamiz kelim le huwo, nam.'' ⁵² Bad kida Yesua kelim le umon, Ashan kida ai mualim ta sheriya al biga telmiz bita molokut ta samah huwo ze zol al mosul fi al bet, al bi tala hajat al gedim wa al jedid min kazina bitou. ⁵³ Ja bad kida zaman al Yesua kalasu amsal del, huwo futu bara min makan dak. ⁵⁴ Bad kida Yesua dakal iklim bitou wa derisu nas fi biyut ta salah. Netija kan umon tala mostgrabin wa gal, Zol de ligo hikma tou de wen wa mujizat al? ⁵⁵ Zol de ma yau weled ta najar? Akwan tou ma yau Yakub, Yusif, Samaan, wa yahuza? ⁵⁶ Ikiwat tou ma yau kulu ma nina? Huwo ligo hajat del kulu wen?'' ⁵⁷ Umon aba huwo. Lakin Yesua kelim le umon, ''Nebi ma bi ihteramu ile fi doula wa fi usra bitou.' ⁵⁸ Huwo ma amulu hajaib ketir hinak le-anu adam Iman bitomon.