¹ Yahwah kan wonusu le Musa gali, ² Kelim le nas ta Israel kida, ana yau Yahwah Rabuna takum. ³ Intum keli ma amulu ayi hajat al na amulu fi Masir, mahal al intum kan geni fogo zaman. Intum ma bi amulu hajat al has ta Kanaan gi amulu, mahal al ana gi shilu intum fogo. Mata kum amulu adat tomon. ⁴ Intum bi amulu gawanin tayi wa intum bihafizu wasaya tayi, ashan intum bidouru wara umon, ashan ana yau Yahwah Rabuna takum. ⁵ Ashan kida intum binafizu kararat tayi ma gawanii tayi. Iza kan zol interim umon, huwo bi ish, ashan umon. Ana yau Yahwah. ⁶ Mata ja gerib ma zol al gerib fi usura ashan binum mahuwo,leanu de laham wa dom taki, ana Yahwah. ⁷ Mata fakidu ihtiram le abu taki wa inta ma bi ayinu arian towo. ⁸ Mata num ma mara ta abu taki, de ariyan ta abu taki. ⁹ Mata num ma okot taki, kan hiya biniya ta abu taki wala biniya ta uma taki wala kan weledu hiya fi beit takum au fi mahal tani beid min intum. ¹⁰ Mata num ma biniya ta weled taki wala biniya ta biniya taki ashan ariyan tomon de ariyan taki zatu. ¹¹ Mata num ma biniya ta mara ta abu taki, al rabau juwa usura ta abu taki, ze hiya biga okot taki. ¹² Mata num ma okot ta abu taki, hiya min usura ta abu taki. ¹³ Mata num ma okot ta uma taki hiya usura ta uma taki. ¹⁴ Mata ayinu ariyan ta aku ta abu taki, maana towo- mata num ma mara ta aku abu taki, hiya amati taki. ¹⁵ Mata num ma mara weled taki, hiya ze biniya taki-inta ma bisuf ariyan ta hiya. ¹⁶ Mata num ma mara ta aku taki, de ariyan ta aku taki. ¹⁷ Mata num ma mara wa jena Kaman, wa mata num ma biniya ta weled towo au bininia ta biniya towo da sher kebir. ¹⁸ Inta ma bijouzu okot ta mara ze mara nimira etnein wan um ma hiya ligo mara al awel lisa fi hayi ¹⁹ Mata num ma mara fi zaman ta ada shaharia/zaman ta nezelu wasaka ta dom. ²⁰ Mata num ma mara ta jeran taki ashan inta bikun nijis. ²¹ Mata wodi ayi min iyal taki ashan bija dawo fi nar. Ashan biwodi umon zabiha le molech, ashan intum ma bi karabu isim ta Rabuna takum. Ana Yahwah. ²² Mata num ma ayi rajil ze mara, de makruh wa batal. ²³ Mata num ma ayi hayiwan ashan biwodi faiya le nefsa taki, Kaman mara ma bisibu nefsa towo ashan hayiwon binum ma hiya, de dur gidam Rabuna. ²⁴ Mata nejisu nefsa takum fi kulu sikat del, ashan fi kulu sikat del bilad biga nejes, bilad al ana bishilu bara min gidam takum. ²⁵ Wata biga nijis, ashan ana yau wodi ikab ashan batal towo, wa wata de aturusu nas al gi geni fogo. ²⁶ Ashan kida, intum, keli hafizu kararat wa wasaya tayi, wa intum keli ma amulihajat al batal, kan de mo watin Israili wala zol al deifana geni fi nus takun. ²⁷ Ashan nas al kan geni fi beled de gubal intum kan amulu hajat al batal kutu beled de biga nijis. ²⁸ Ashan kida keli intum amulu hisab takum ashan wata de ma bi aturusu intum bara Kaman zaman intum binijisu huwo. Ze kan aturusu bara nas al kan geni gubal intum. ²⁹ Ayi zol al bi amulu ayi hajat al nijis ze de, zol de bigatou bara min nus nas towo. ³⁰ Ashan kida intum lazim keli hafizu taalimat tayi mata amulu takum aadat al batal, al kan gi amulu hini gubal intum ma wosulu hini, ashan intum ma binijsu nefsa takum ma hajat tomon. Ana Yahwah Rabuna takum.