¹ Kelima ja le Jeremiah an kulu Yahudin al gi geni fi ardi ta Masir, del al gi geni fi Migdol, Tahpanhes, Memphis wa fi Shamal al Masir: ² Yahwah ta Junut, Allah ta Israel kelim, intum be nusukum ainu dimar kulu al ana jebu le Jerusalem ma kulu medina ta Yahuza. Suf, alela demiru humon, mafi zol al bi geni fogo. ³ De ashan amail al batal al humon amulu ashan kutu ana tala zalan leanu humon haragu bokhur wa abudu rabunat tannin. De rabunat al kan wale humon be nufus toumon wale intum wale jil takum kan arufu. ⁴ Ashan kida ana keriru rasulu ambiya ketir, kudam tai le humon ana rasulu humon ashan bi kelim, wogi fu amulu amail al momnu de kulu, ashan niya tai aba. ⁵ Lakin humon ma asuma humon aba ashan bi kutu bala toumon wale ashan bi rija min amail batal toumon ta haragu bokhur le rabunat tannin. ⁶ Ashan kida, shokol takian tai wa shokol zalan tai kubu bara wa wala nar fi medina ta yahuza wa shawari ta Jerusalem. Ashan kida humon tala karaban wa mudemir, zei fi yom ta alela. ⁷ Ashan kida hasa, Yahwah, Allah ta junut wa Allah ta Isrrael kelim kida, lee intum gi amulu amail al batal zede did nufus takum? Lee intum yau gi sibu gi gatau intum bara min yahuza- rujal wa nusuwan, iyal wa atfal? Mafi aiya wahid min intum al fadulu bi sebu ⁸ Be shokol amail al sherir al intum amulu le ana be ident takum, wa haragu bakhur le rabunat tannin fi ardi ta Masir, mahal al intum ruwa geni fogo. Intum ruwa hinak ashan keli demiru intum, ashan keli intum geni laana wa inzar fi wasat ta umam tannin ta ard. ⁹ Al intum nesitu amail sherir al amulu be muluk to Yahuza wa nusuwan toumon? Al intum nesitu amail. Sherir al intum be nufuskum amulu wa nusuwan takum amulu fi ardi ta Yahuza wa fi shawari ta Jerusalem? ¹⁰ Lahadi alela, humon lisa ma nenjilu nufus toumon. Humon ma kerimu ganun wa qararat al ana kutu gidam toumon wa gidam judud toumon wale zatu humon douru hasab teriga de: ¹¹ Ashan kida, Yahwah ta junut, Allah ta Israel kelim kida, Ainu, ana gerib der kutu ena tai didakum ashan bi jebu le intum karitha wa ashan bi demiru kulu Yahuza. ¹² Ana bi shilu bagi nas ta Yahuza al kan fadulu wa ruwa ashan bi geni fi ardi ta masir ana bi amulu kalam de ashan humon kulu keli mutu fi ardi ta Masir. Bi katulu humon be shef wa be jian min soker le kebir kulu bi mutu be shef wa jian. Humon bi mutu wa bi tala haja ta halifa. Laana inzar shay fazie. ¹³ Ana bi wodi eqab ie del al gi geni fi ardi ta Masir zei al ana wodi eqab le del al fi Jerusalem be shef, be jian wa be darba, ¹⁴ Ashan mafi aiya wahid min del al fadulu min Yahuza al ruwa fi Masir keli nofut wale hai ashan bi rija fi Yahuza, al humon endu niya ashan bi geni fogo wa mafi aiya wahid min humon bi rija ile besitiin al tefesh min hinak.” ¹⁵ Bad de kulu rujal al kan arufu inu nasawin toumon kan gi haragu bakhur le rabunat tannin, wa kulu nasawin al kan fi ijti maa kebir die wa kulu shab al kan sakiniin fi tehet wale fog ta Masir juwabu Jeremiah, ¹⁶ Humon gal, “bi nisba le kelima al inta wori le nina be isim ta Yahwah, nina ma bi asuma le inta ¹⁷ Anihna bi amulu be hagiga. Kulu hajat al nina kelim gali nina bi amulu bi haragu bakhur le melka ta sama wa bi kubu leben ka zebiha le hia zei ma kan nina judud tanina, muluk ta nina, wa qaada ta medina ta Yahuza wa shawari ta Jerusalem. Yala nina bikun endu akil ketir wa bi tala ganianiin bidun ma nina waji aiya karaba. ¹⁸ Wokit al nina kan wogifu min amulu hajat del, mafi zebiha ta bakhur le melka ta sama wa mafi zebiha le leben kan bi kubu le hia, nina kulu kan gi ligo tab ta zuruf wa kan gi mutu be shef wa jian” ¹⁹ Nusuwan kelim, “wokit nina kan gi gedimu zebiha ta bakhur le melka ta sama wa bi kubu zebiha ta shirab le hia, al kan nina amulu kalam le did rujal taana. Ligo nina amulu torta fi shikil ta hia wag i kubu zebiha ta shirab le hia? ²⁰ Yala Jeremiah kelim le kulu shab le rujal wa nusuwan, wa le kulu nas al kan juwabu kalam tou-huwo alinu wa kelim, ²¹ Al Yahwah ma gi zekiru bokhur al intum haragu fi medina ta Yahuza wa shawari ta Jerusalem, intum ma judud takum, muluk takum wa qiadin, wa shab ta ardi? Yahwah gi zekiru kalam de: gi ja fi afkar tou. ²² Huwo kan biga ma biakder istaqmal le amail takum al sherir, be sabab ta hajat batal al intum amulu. Yala ardi takum tala kharaab, raeb, wa laana ashan kida kan mafi zol biga gi geni fogo zei al lahadi yom de. ²³ Leanu intum haragu bakhur wa amulu katia did Yahwah, wa leanu inta ma asuma le sout bitou, sheriha bitou, gawanin bitou auw qararat ta ahad, kharaab de al did intum de kan hasil zei ma hasil hahadi yom de.” ²⁴ Jeremiah kelim le kulu shab wa kulu nusuwan” asuma kelima ta Yahwah kulu Yahudin al fi ardi ta masir. ²⁵ Yahwah ta junut, Allah ta Israel, kelim kida, “intum wa nusuwan takum kulu kelim be kasuma takum wa arfa hajat al intum kelim de fi ident takum, “nina bi amulu alifa al nina amulu ashan bi abidu melka ta sama, ashan bi kubu le hia zebiha ta Moshrubat.” Hasa, kamilu alifa takum; amulu towali, ²⁶ Yala baga, asuma kelima ta Yahwah, kulu nas ta Yahwah al gi geni fi ardi ta Masir, “suf ana alifu isim bitai al kebir de-Yahuza yau kelim isim tai tani mara ma bi nadi be kasuma ta aiya nas ta Yahuza al fi ardi ta Masir, intum al hasa biga bi kelim, “zei Rabuna Yahwah aish.” ²⁷ Suf ana gi ainu fogo humon le kharab wa ma le kwes. Aiya zol ta Yahuza al fi ardi ta masir bi mutu be shef wa jian lahadi kan humon intaa kulu. ²⁸ Yala del al nofut min shef bi rija min ardi ta Masir le ardi ta Yahuza be adad besit. Kulu del al faduld min Yahuza al ruwa fi ardi ta Masir ashan bi geni hinak bi arufu kelim ta munu yau bi wogif tai, wale toumon. ²⁹ De bi geni alama ie inta de elan ta Yahwah al ana gi jahizu did intum fi mahal de ashan failan intum bi arufu inu kelimat tai bi ajimu intum be kharaab. ³⁰ Yahwah kelim zede “ainu, ana gerib bi wodi Pharaoh Hophra melik ta Masir fi ident ta ada tou wa fi ident ta del al gi fetish ashan bi katulu huwo. De bi geni zei wokit al ana wodi zedekiah melik ta Yahuza fi ident ta Nebuchadnezzar melik ta Bablyon, adu tou al kan gi fetish teriga ashan bi katulu huwo.