¹ De yau shunu al Yahweh kelim, “lahizu shunu al saa, wa amulu shunu al hak; lianu kulasa tai gerib, wa bir tai bi wori. ² Baraka le rajil albi amulu de, wa bi amsuku gowi. Huwo bi hafizu yom al sebit, wa mabi karabu huwo. Wa bi hafisu yeden towo min amulu shar.” ³ kede mafi ajnebi al ja taabi Yahweh kelim, “Yahweh bi taalau ana min nas towo Al ma mutehir kede ma kelim, Ainu, Ana shejera al yabis. “ ⁴ lianu de yau al Yahweh kelim “ le al matehiru al hafizu sebit wa hazilu shunu albi farahu ana, wa amsuku wasaya tai, ⁵ le humon ana bi kutu fi bed tai wa fi dakil heta tai nisba ta zikra al aksen min indu aulat wa banat . wa ana bi wodi le humon nisba zikra al ma bi gatau bara kulu- kulu. ⁶ Wa Kaman al ajnebi al limu nefsu le Yahweh- ashan kadimu huwo, wa albi hibu isim Yahweh, ashan mejidu, aiya wahid al bi hafizu yom sebit wa al bi hafizu min nejsu, wa al bi amsuku shedid wasaya tai ⁷ – Ana bi jibu le jebel tai almukadas wa amulu be farah fi bed tai ; zebiha tomon al mahruk wa zabaya tomon mokbul fi member tai. Lianu bed tai bi nadi bed ta salawat le kulu umam. ⁸ De yau karar ta Rabuna Yahweh ,albi limu al abau ta Israel- wa ana bi limu ziada le humon.” ⁹ kulu intakum kayana ta zira, taalau wa akulu, kulu kayana ta gabaat! ¹⁰ kulu rujal alhuras amiyaniin, humon mabi fahim. Humon kulu kilaab albi askud mabi kore. Humon bi hilim, wa bi num tehed humon bi hibu num. ¹¹ Kilaab indu niya kebir; humon mabi ligo kifaya; Humon ruaah bidun temeis; humon gelibu kulu fi teriga tomon, aiya wahid indu niya fi haja alma saa. ¹² “ Taal” humon bi kelim, “ kede ena ashurubu merisa. Bukura bikun ze alela, yom alkebir mamaruf.