¹ Hasa asuma, ya Jacob khadam tai, wa Israel, al ana ihtaru, ² De yau kalam al Rabuna gi kelimu, al huwo sala inta wa al kalagu inta fi batna wa huwo bi saidu inta, mata kafu, ya Jacob kadam tai, wa inta ya Jerusalem, al ana ihtaru. ³ Leanu ana bi kubu moya fi ard al yabis wa mala judu wal al yabis fi ard, ana bi kubu Roho tai le usura taki, wa barakat tai le iyal taki. ⁴ Humon bi raba fi wasat ta gesh, ze shejera ta gutun al fi juduwal ta moya. ⁵ Wahid bi kelimu, al tabe le Rabuna, wa tani bi nadi isim ta Jacob, wa tani bi katibu be ida tou le Rabuna, wa bi sama isim tou bi isim ta Israel." ⁶ De yau kalam al Rabuna gi kelimu, al huwo melik ta Israel wa mukalis tou, Rab al junud, ana al awel, wa ana akir, wa mafi Rabuna tai ila ana. ⁷ De munu ze ana? Keli huwo wori wa kelimu le ana hajat al hasil min tasis ta nas tai al gedim, wa keli humon wori hajat al gi ja hasil fi mustakbal. ⁸ Mata kala du kafu, hal ana ma kelimu le inta min zaman, wa wori kabara de? Inta shuhud tai, hal fi Rabuna tani min ana? Mafi hajir, ana ma arufu. ⁹ Kulu nas al gi sala asnam humon ma indu faida, humon gi istamta fi hajat al ma indu faida, shudiin tomon ma bi ainu au bi arufu ai haja, wa bi kutu humon fi fadiya ¹⁰ De munu bi sala ilah/Rabuna au resimu sanam al ma indu faida? ¹¹ Ainu, asdika tou kulu bi kun be fadiya, zol al rasam de huwo insaan bes, keli humon wogifu sawa, bi kurumusu fashal wa bi kun be fadiya. ¹² Hadadiin ma addwat tomon, yau gi sala, gi istakal fi faham huwo gi seninu bi shakush wa gi sala bi iden tou al guwi, huwo jeyan wa guwo tou gi nagisu, huwo ma gi ashrabu moya wa huwo kemir batil ¹³ Najar gesu khasab bi metir kait wa kutu fogo alama bi galam rasas huwo resimu bi adawat tou wa kutu alama fogo bi bosala huwo resimu fi shekil ta insaan jazab de insaan, bi agdeir kutu fi beit. ¹⁴ Huwo gi gata khasab ta urz tehet, wa gi ihtaru shejera al ssuru au shejaera balut, huwo gi shilu le nefsa tou ashjar min gaba. Huwo zara khushub alttanub wa motoro raba humon. ¹⁵ Biga insaan gi istagdim le nar wa ashan bi dafi ma nefsa tou, naam, huwo bi wala nar wa bi amulu min fogo Elah/Rabuna wa huwo gi amulu senam wa bi dengiri tehet ashan bi abidu, ¹⁶ Huwo gi haragu khasab tanin bi nar ashan bi nashefu laham tou, huwo gi akulu wa shaban, huwo gi dafi nefsa tou wa gi kelimu, ah, ana dafi, ana ainu nar. ¹⁷ Ma min bagi akshab tou de huwo gi sala Elah Rabuna rsim ta sura tou, huwo gi abidu, wa gi ihtaramu huwo, wa gi seli le huwo gal, kalisu ana, leanu inta Elah tai." ¹⁸ Humon ma arufu wala humon fahimu, leanu uyon tomon mugful amiyan wa ma gi ainu, wa gulub tomon ma bi fahimu. ¹⁹ Mafi zol al gi fekir, wala humon gi fahimu wa kelimu, ana haragu juzu min khashab fi nar, naam, wa ana aragu laham fi faham tou wa akulu, hasa keli ana amulu juzu al tani ta khashab le haja al batal sheen ashan bi abidu? Hal keli ana abidu geta khashab? ²⁰ Gi ze huwo gi akulu rumad, gelibu tou ta kezib woduru huwo, huwo ma bi agdeir khalisu nefsa tou, wala huwo bi kelimu, haja al fi ida tai al yemin de Rabuna al ta kezib." ²¹ Fekir fi hajat del, ya Jacob, wa ya israel, leanu inta khadam tai, ana yau kalagu inta, inta kadam tai, ya Israel, ana ma bi nesitu inta, ²² Ana masa bara amail taki al batal al gi ze sehab al duluma, katiya taki al geni ze sehab de reja le ana, leanu ana khalisu inta. ²³ Verim intum ya samawat, leanu Rabuna yau amulu de, saeakh kore inta ya tehet turab ard, fejir be guna, intum ya jubal, intum ya gebat ma kulu ashjar, leanu Rabuna kalisu Jacob, wa huwo bi wodi mejid tou fi Israel, ²⁴ De yau haja al Rabuna gi kelimu inta mukalis al huwo yau kalagu inta fi betna, ana Rabuna al sala kulu hajat al waza samawat, huwo al wahid kalagu ard. ²⁵ Ana huwo al gi wogifu nas al gal humon arufu wa al gi amulu fadiya le nas al gal humon arufu, ana huwo al gelibu hikma ta nas al negetiin wa bi amulu murshidiin tomon belediin. ²⁶ Ana Rabuna, al gi akidu kelimat ta khadam tou wa bi hagigu nubuwat ta murasalat tou, al gi kelimu an Jerusalem, hiya bi kun muwatin sukan wa ta mudan ta judah, bi abinu humon tai mara, wa ana reja hajat tomon al karabu, ²⁷ Al huwo gi kelimu le moya al amik kebir, keli yabis, ana bi yabisu moyat takum, ²⁸ Rabuna yau zol al gi kelimu an cyrus, huwo rayi tai, huwo bi amulu kulu tamaniyat tai, huwo yau bi kelimu an jerusalem, bi abinu hiya, wa an al heikal, bi abinu asas tou."