¹ Yahwah, inta Allah tai; Ana bi arfa inta, Ana bi sabihu isim taki; ashan inta amulu hajat ajeeb, hajat al katitu min bediri, fi amana kamil. ² Lanu inta kutu medina biga kuom, medina al guwi, karabu, wa guwa ta ajanib mafi fi ayi medina. ³ Ashan kida shaab guwi bi mejidu inta; wa medina ta umam guwiin bi kafu inta. ⁴ Ashan inta yao kan mahal ta aman le de al miskin, dulu le de al muhtaj fi zuruf tuo- dulu min habub wa dul mi sakana. Kan nefs ta delin al guwin biga ze habub al did hetta, ⁵ wa ze sakana fi wata al yabis, inta bi baridu ezaaj ta ajanib, ze sakana bi baridu be dul ta sihab, ashan guna ta de al guwi bi juwabu. ⁶ Fi jebel de Yahwah Rabuna ta junud bi amulu Aid ta hajat al semin le shaab kulu, min iktiar ta kumur, ta laham tamam, aid ta kumur al afdal. ⁷ Huwo bi demiro fi jebel de kuta al fi ras ta umam kulu. ⁸ Huwo bi abula mutu lel abad, Rabuna Yahwah bi masa moyo ena min kulu usat; wa bi shilu aar ta shaab min ard kulu, Lanu Yahwah wunuso. ⁹ Bi wunuso fi yom dak, ''De Allah ta nina; anina istena huwo, wa huwo bi kalisu nina. De Yahwah; anina istena huwo, anina bi tala murtah wa bi afrah fi kulasa tuo.'' ¹⁰ Ashan iden ta Yahwah bi nezil fi ras jebel de; wa Maob bi dusu tihit fi mahal tuo, ze bi dusu tebin fi moyo ta zibala. ¹¹ Umon bi midu idenat tumon fi nus tuo, ze zol al bi huom bi fatta idenat tuo le huom. Lakin Yahwah bi nezilu kibiria tumon fi kutat ta muhara ta idenat tumon. ¹² Hiyat takum kubar wa tuwalin huwo bi nezilu tihit fi wata, le turab.