¹ Elan kabara an Mesir, ainu, Rabuna arkab fi sehab al seri wa gi ja le Mesir, asnam/authan ta mesir hezu arjef gedam haro tau, wa gulub ta Mesiriin karobu bi min juwa, ² Ana bi hariku Mesiriin did Mesiriin, kulu wahid bi haribu did aku tou, wa kulu wahid did jerna tou, medina bi kun did medina, wa mamlaka did mamlaka, ³ Roho ta Mesir bi kun deaf min dakil, ana bi demiru mushtushar tou, hata kan homon asalu asnam tomon, arwah ta nas al mutu, nas al fi nus wan as al gi arufu, ⁴ Ana bi wodi Mesiriin fi iden ta reis al saab, wa melik al guwi yahu bi hukumu homon, de yahu Elan kabara ta Rabuna Allah Rab al Junud, ⁵ Moya ta bahar bi Yabis wa nahar bi Yabis wa ma bi kun indu yoya ⁶ Anhur bi tala batal, jadawill ta moya al gi jere ta Mesir bi nagis wa bi Yabis shejerat al gi raba fi juw moya wa alamat bi kun mafi, ⁷ Shejerat al fi neel al fi tarof neel wa kulu buzur terab al zarau fi mahal zara al neel bi tala al shon, bi ta lou bara, wa bi kun mafi. ⁸ Al sayaadiin bi kore wa bi kun haznaniin wa kulu del al gi jada shabaka fi neel bi kore, wa del al gi jada shobaka fi moya bi kun haznaniin ⁹ Omal al gi meshetu hubal ta gumush ta katan wa del al gi khitu gumush bi tala deyef ¹⁰ Omal ta khitu gumush al ta Mesir bi demiru, kulu del al ajeru ashan bi istakal homon bi tala hazaniin fi nufus tomon, ¹¹ Ruwasa ta Zodr belidiin tamaman. Irshad ta Mush to shoriin ta Pharaoh biga ma indu Faida, kef inta bi kelimu le Pharaun ana jena ta rujal al hakim jena ta muluk al gedim? ¹² Biga wenu rujal al hukama taki de? Keli homon kelim le inta wa wori haja al Rab al junud khatitu le Mesir, ¹³ Ruwasa ta zodn biga tala belitiin, ruwasa ta Memphis kobasu, homon sibu nas ta Mesir wodoru al haro yahu hajer zawiya ta gabail tou. ¹⁴ Rabuna lakbatu roho ta kharaba fi wasat ta hiya, wa homon wodoru Mesir fi kulu hajat al hiya gi amulu, ze zol al sakaran mustagarab be turas tou, ¹⁵ Mafi ai zol al bi agdeir amulu le Mesir, wele ras du danobol, fere ta nakhla au kasab, ¹⁶ Fi yom dak, Mesiriin bi kun ze nasawin, homon bi rejef min kafu leanu Rab junud medu ida tou al haro arfa le homon. ¹⁷ Ard ta Judah bi tala sabab ta kafu le Mesir, kulu ma ia zol zekiru homon an hiya homon bi kafu, ashan khufa ta Rabuna, al haro khatitu did homon. ¹⁸ Fi yom dak bi kun khomsa mudun fi Ard ta Mesir al gi wonusu luga ta Canaan wa halifa ta wola le Rabuna au Rob al Junud. Wahid min mudun del bi nadi medina ta Shemish ¹⁹ Fi yom dak bi kun fi mazbaha ta Rabuna fi wasat Ard Mesir, wa amud ta hajer fi Hudud le Rabuna, ²⁰ De bi kun alama wa shuhud le Rab al junud fi Ard Mesir, fi zaman al kan homon kore le Rabuna ashan taab, howo bi rasulu le homon mukhlis wa zol al bi defa homon, wa howo bi kalisu homon, ²¹ Biga bi arufu Rabuna fi Mesir, wa Mesiriin bi arufu Rabuna fi yom dak. Homon bi gedimu zebiha wa tegdima wa bi amulu woud le Rabuna wa bi kamilu, ²² Rabuna bi dugu Mesir, bi dugu, wa bi aliju, homon bi reja le Rabuna, haro bi asuma sala wat tomon, wa bi aliju homon. ²³ Fi yom dak bi kan fi sika min Mesir le Assyira, wa Assyrian bi ja le Mesir, wa Mesiriin le suriya wa Mesiriin bi abidu ma suriin ²⁴ Fi yom dak, Israel bi kun nemra talata ma Mesir wa suriya. Barakat bi kun fi wasat ta Ard. ²⁵ Rab al junud bi bariku homon wa bi kelim, Baraka le nas shaab tai ta Mesir, suriyiin nas al ana sala bi iden tai, wa Israel al homon warisa tai.