¹ Baad daak Yahwa kelimo le Musa" Hasa ita be ayeno Ana bi amulo shono le Faraun. Ita bi ayeno haja de, fa huwo bi sebo humon ruwa ashan iden tai al gowi. Ashan iden tai al gowi, huwo bi tala humon min ard tou." ² Allah wonoso le Musa wa kelimo le huwo," Ana Yahuwa. ³ Ana zahi le Ibarhim, le Ishak, wa le Yakub ze Allah al kebir: lakin be isim tai, Yahwa, Ana kan ma moruf le humon. ⁴ Ana kman amulu ahad ma humon, ashan bi wodi le humon ard ta Canan, ard al humon ish fugu ze kaano ma beled tumon. ⁵ Wa kman, Ana asuma waja ta shab Israeal ashan Masreen kan gi azibu humon, wa Ana zekiru ahad tai al kan Ana amulo. ⁶ Ashan keda kelimo le Isrealin, Ana Yahwa. Ana bi tala itakum min abodiya ta Masreen, wa Ana bi fiku min guwa ta tumon. Ana bi khalisu itakum be iden tai al gawi, wa be hukum tai al gawi. ⁷ Ana bi shelo itakum shaab le Ana, wa Ana bi kun Illah le itakum. Itakum bi arufu gali Ana Yahwa Allah takum, al tala itakum min abudiya ta Masreen ⁸ Ana bi jebu itakum fi ard al Ana halifu be ino bi wodi le Ibraheem, le Ishak, wa le Yakub. Ana bi wodi le itakum lel abad. Ana Yahwa." ⁹ Zaman Musa wori kalam de le nas Israel, humon kan ma asuma le huwo be sabab ta waja ta abudeya al gawi. ¹⁰ Yahwa kan kelimo le Musa, gali," ¹¹ Ruwa wonoso le Faraun, melik ta Masir, kede huwo sibu nas Israel tala min ard ta tou." ¹² Musa kelimo le Yahwa," Kan nas Israel ma asuma le ana, kef Faraun bi asuma le ana, kan ana ma bi arufu wonosu?" ¹³ Yhawa kelimo le Musa wa Haron. Huwo wodi awamir le humon le nas Israel wa Faraun, melik ta Masir, kede tala nas Israel min ard ta Masir. ¹⁴ Delin humon yao ras ta abuhat ta beyot ta Isarael: Iyal ta Ruwabin, de bikir ta Israel, humon Hanok, Falu, Hesron, wa Karmi. Deal yao iyal ta Ruwabin. ¹⁵ Iyal ta Shamon yao Yemuel, Yamin, Ohad, Yakin, Zohar, wa Shaul al uma tou min Kanaan. Deal yao Iyal ta Shamon. ¹⁶ De yao asmaa ta iyal ta Lawi, sawa ma bab ta tou. humon yao Jershon, Kahat, wa Marari. Lawi kan ish lahadi 137 sena. ¹⁷ Iyal ta Jershon wa user ta tou yao Libni wa Shamei. ¹⁸ Iyal ta Kahat yao Aamran, Yashar, Hebron, wa Uziel. Kahat ish lahadi 133 sena. ¹⁹ Iyal ta Merari yao Jahli wa Mushi. De yao bega iya wa bab ta Lawein. ²⁰ Amram zaojo Yokabet, ammati ta tou. Heya weledo Haron wa Musa. Amrem ish lahadi 137 sena. ²¹ Iyal ta Yashar yao Koreh, Nafeg, wa Zikri. ²² Iyal ta Uziel yao Mishael, Elsafan, wa Sitri. ²³ Haron zaojo Elishaba, beniya ta Aminadab, okhot ta Nahshon. Heya weledo Nadab wa Abiho, Eleazar wa Isamar. ²⁴ Iyal ta Korah yao Assir, Elkana, wa Abiasaf. Dael yao bab ta Korah. Eleazar, jena ta Haron, zaojo wahid min iyal ta Futiel. ²⁵ Heya weledo Finehas. Delin yao rass ta abuhat ta beat ta Lawein, hasab bab tumon. ²⁶ Haron wa Musa humon yao Yahwa kelimo," Tala takum shaab Israel kulu min ard ta Masir, hasab majmuat ta tumon." ²⁷ Humon yao al kelimo le Faraun, melik ta Masir, ashan sibu humon tala Shaab Israel min Masir. ²⁸ Zaman Yahwa wonosu le Musa fi ard Masir, ²⁹ Huwo kelimo gali," Ana Yahwa. Kelimo le Faraun, melik ta Masir, kulu haja al Ana bi ruwa kelimo le ita." ³⁰ Lakin Musa kelimo le Yahwa," Ana ma bi arufu wonosu kweas, kef bi hasil ino Faraun bi asuma la ana?"