¹ Bad talata ayam, Esther libisu gumas tou ta melka wa ruwa wogif fi saha ta kasra ta melik, fi gidam ta bet ta melik. Melik kan bi geni fi kursi tou ta muluk fi bet, gi ainu fi bab ta dukul. ² Zaman melik ainu melka Esther wagif fi saha ta al bet, huwo sedeku hiya. Huwo rafa idan tou al indu dahab al melkia. Yala Esther ja gerib wa lemesu dahab al melkia. ³ Bad dak melik kelimu le hiya, "Melka Esther, inta der shunu? talab taki shunu? Sala nus ta momlaka tai bi wodi le inta," ⁴ Esther kelimu, "Kan melik gablan, Kede melik wa Haman ja alela le iid al ana bi jahizu le huwo." ⁵ Bad dak melik kelimu, "jibu Haman seri, ashan bi amulu haja al Esther kelimu." Yala melik wa Haman ruwa le iid al Esther nazimu. ⁶ Zaman kamur bi khadimu fi al iid, melik kelimu le Esther, " Balak(arida) taki shunu? bi wodi le inta. talab taki shunu? Sala nus ta momlaka , bi wodi le inta." ⁷ Esther juwabu, "Balak wa talab tai yau, ⁸ kan melik moksut ma ana wa kan melik der ashan bi hilu balak tai wa ihterim talab tai, kede melik wa Haman ja fi iid al ana bi nazimu le inta bukura wa ana bi juwabu shuwal ta melik." ⁹ Fi yom dak Haman ruwa be farah fi gelbu. Lakin zaman Haman ainu Mordecai fi bab hoz ta melik, inu Maordecai wele gam au rejif be kof gidamu, Huwo kan mala be zel did Mordecai. ¹⁰ Geir min zalik(lakin), Haman ma zahiru zel tou wa ruwa fi bet tou. Huwo rasal kabar le asdika tou wa limu humon mahal wahid, ma mara tou Zeresh. ¹¹ Haman rija asibu mali tou, adad ta awaulad tou, kulu tergiya al melik wodi le huwo, wa kef huwo itgadam fok dubad kulu wa khudam ta melik. ¹² Haman kelimu, "Melka Esther ma rahibu ai zol ile ana ashan bi ja ma melik le hafula(iid) al hiya nazimu. Hata bukra hiya rahibu ana tanimara ma melik. ¹³ Lakin de kulu taalis le ana zema ana bi ainu Mordecai al Yahudi bi geni fi bab hoz ta melik". ¹⁴ Bad dak mara tou Zeresh kelimu le Haman wa asdika tou, "Kede humon salau masnak fok al indu kamsin Cubit(zira). Fi sabah kelimu le melik be niyaba tomon ashan haligu Mordecai fogo. Bad dak ruwa be farah ma melik le iid." De kutu Haman tala moksut wa huwo wodi nas ashan bi abinu masnak.