¹ Baad hajat del kulu, melik Ahesurus rugau Haman weled ta Hammdeth al min Agagite, wa kutu kursi tou ta sulta fi ras dubad kulu al kan ma huwo. ² Khudam ta melik kulu al fi bab hoz ta melik dengir(raka) tehet wa inhana tehet le Haman, ze melik amiru le huwo ashan amulu. Lakin Mordecai ma dengir au inhana tehet. ³ Bad dak khudam ta melik al fi bab hoz ta melik kelimu le Mordecai, "Le inta alisu awamir ta melik?" ⁴ Humon bi wori le huwo kulu yom, lakin huwo aba ashan bi asuma kalam tomon. Bad kida humon wori le Haman ashan ainu kan kalam an Mordecai bi akir zede, huwo wori le humon inu huwo Yahudi. ⁵ Zaman Haman ainu inu Mordecai ma dengir wa inhana le huwo, Haman zalan. ⁶ Huwo fakar ashan bi katulu Mordecai bes, Khudam ta melik wori le huwo Mordecai min nas yatu. Mordecai der ashan bi masau(demiru) Yahudiin kulu, Shab ta Mordecai, al fi momlaka kulu ta Ahasuerus. ⁷ Fi shahar al awel(al huwo shahar ta Nisan), fi sena nimra itnasar ta Melik Ahasuerus, Pur-gura jadau fi gidam Haman, ashan bi azilu yom wa shahar. Humon jadau gura tani wa tani lahadi gura de waga fi shahar nimra intnasar(al huwo shahar ta Adar). ⁸ Bad dak Haman kelimu le melik Ahesuerua, "Fi nas tanin waza wa gesimu beinu wilayat ta momlaka taki. Gawanin tomon indu ferik min nas tanin, wa humon ma bi hafisu gawanin ta melik, yala huwo ma kwes le melik ashan humon bi ish(geni). ⁹ Kan melik der, wodi awamir ashan bi katulu humon, wa ana bi wozinu ashara alf kilo ta fidah fi idan ta del al mosulin fi sokol ta melik, ashan bi kutu fi kazina ta melik." ¹⁰ Bad dak melik shalu khatim min idan tou wa wodi le Haman weled ta Hammedatha al min Agagite, adu ta Yahudiin. ¹¹ Melik kelimu le Haman, "Ana bi ainu inu gurus de rejau le inta wa shab taki. Inta bi amulu be ai haja al inta deiru." ¹² Bad dak alinu kutaba fi yom talatasar ta shahar wahid, wa katab karar al fogo kulu awamir al Haman kelimu le kulu hukam ta wilayat ta melik, Del al fi kulu wilayat, le hukam ta kulu shab, wa le dubad ta kulu shab, le ai wilaya bi kitaba tomon, wa le kulu shab be rutan tomon. Katibu be isim ta melik Ahaserus wa moktum be khatim tou. ¹³ Murasilin wazau juwabad de le kulu wilayat ta melik, ashan bi masau, katulu, wa demiru Yahudiin kulu, min suker le kubir, iyal wa nusuwan, fi wahid yom-fi yom talatasar ta shahar itnasar(al huwo shahar ta Adar)-wa bi nahabu mumtalakat tomon. ¹⁴ Sura ta juwab kutu ze ganun fi kulu wilayat. Kutu ashan arufu be kulu shab al fi kulu wilayat inu humon bi jahizu le yom de. ¹⁵ Murasilin tala seri ashan wazau awamir ta melik. Karar de kaman wazau fi medina Susa. Melik wa Haman geni tehet ashan ashrubu, lakin medina ta Susa kan fi dimar.