¹ Rasulu ish taki fi ras moyo, ashan baad ayam ketier int bi ligu howo tani mara . ² Shariku maa sabaa, hata tamaniya nas, ashan inta ma arufu yatu karisa bi jaa hasiil fi al ardi. ³ Iza kan sehab maliyan maa muturu, homon bi nezil kulu fi ardi, wa Iza kan shejera waga le itejah ta junub aw itejah ta shamal, howo bi kun hinak. ⁴ Zol al gi intezir hawa howo ma bi zara, wa zol al gi intezir sehab howo ma bi amulu hasad. ⁵ Zi int ma arufu sika ta hawa wele audam ta jena gi raba keif fi rehim al hamilan, wa inta kaman ma bi agdeer fahim Aamal ta Allah, al kalagu kulu haja. ⁶ Azraa buzur taki fi Sabah; ishtakal shedid bi eda taki bi guwa al mumkin lahadi Mesa, ashan inta ma bi arufu yatu yahu bi najah, ta Sabah, wele ta Mesa, aw de aw dak, aw homon kulu itniin bi tala kweseen sawa. ⁷ Hagiga Nur howo hilu, wa howo haja jemil ashan eayun bi ainu al Shemish. ⁸ Iza kan insan iesh sinawat ketier, (Aumur towil) keli howo afrah fi kulu homon, lakin keli howo fekir fi ayam ta duluma al jai, ashan bi kun ketier.Ayi haja al gi jaa ma indu maana.(Batil). ⁹ Afrah, Ya Insan, fi shabab taki, wa keli gelba taki afrah fi ayam shabab taki. fetishu niyat al kwes ta gelba taki, wa ayi haja al fi gedam ta eayun taki. Lakin keli inta aruf inu Allah bi jebu inta fi deiynuna ashan hajat deel kulu. ¹⁰ Shilu Ghadab bara min gelba taki, wa jahilu ayi waja fi jesim taki, ashan shababiya wa gowa kulu batil (ma indu maana).