¹ Ja fi ras ta Darios ino bi koto meia wa isherin hakim ashan bi hukomo mamlaka kulu. ² Fok min humon fi talata wozara, wa Daniel kan wahid min humon. Wozara de aino ashan le idara amwal ta wilaya ashan mafi zol kede serego gurush ta melik. ³ Daniel kan momeiz akter min bagi wozara wa hukam ashan huwo kan indo ruhu momeiz. Melik biga indo neia ashan bi koto huwo hakim le mamlaka kulu. ⁴ Wozara wa hukam ta wilaya bada fetiso galat fi shokol ta Daniel al fi mamlaka, lakin humon ma ligo ai galat wele fasat ashan huwo kan amin. Mafi galat aw ihmal fi safa ta tou. ⁵ Biga rujal de kan kelimo, "Enna ma bi agder ligo ai sabab ashan bi ashteki Daniel ile iza kan enna ligo haja did huwo fi teriga ta ganon ta Allah tou." ⁶ Yala wola wa hukam jibo khuta gidam ta melik. Humon kelimo le huwo, "Melik Darios, kede ita ish lelabat! ⁷ wozara ta mamlaka, wa hukam, wa wola, mustasharin geni sawa wa tifago ino ita, ya melik, kede tala karar guwi ijbari, ino ai zol talabo haja min illah tani aw min zol fi fatra ta talatin yom, ma min ita, melik, zol de lazim bi jadao fi beer ta usod. ⁸ Hasa, ya melik, amolo karar wa mada waraga de ashan ma bi gearo, ze ma moktob fi gawanin ta Madi wa Faris, ashan ma bi balasho." ⁹ Biga melik Darios mada waraga wa koto ze ganon. ¹⁰ Zaman Daniel arofo ino waraga de amolo bega ganon, huwo ruwa le bet tou, huwo tala fi odda tou al fok al indo shobak bi fata tijah ta Orshalim, wa huwo dengir be rukoba,talata marat fi yom, huwo seli wa wodi shukran le Allah tou, ze ma huwo kan bi amolo. ¹¹ Biga rujal del al tifago le shar aino Daniel bi dengir wa asalo mosada min Allah. ¹² Humon wogif gidam ta melik wa wonuso le huwo fi kalam ta karar de: "Ita yao ma tala karar ino mafi zol kede asalo haja min ai illah aw insan fi fatra ta talateen yom, ele min ita, melik, al kalifo bi jadao fi hufra ta usood?" Melik jowabo, "Kalam de amolo, ze ganon ta Madi wa Faris; ma bi agder balaso." ¹³ Biga humon rudu le melik, "Zol dak Daniel, huwo wahid min nas al jibo min Yahuza, aliso kalam taki, ya melik, wa ma ihtarm kara al ita kutu. Huwo bi seli le Allah tou talata marat fi yom." ¹⁴ Zaman melik asoma kalam de, huwo ma mortah, wa huwo fekir fi mokh tou ashan bi ankizo Daniel min hukom de. Huwo hawil lahadi ma shemis waga ashan bi ankizo Daniel. ¹⁵ Biga rujal al fekir shar de amolo ajtima ma melik wa humon kelimo le huwo, "Kede arofo ya melik, ino de ganon ta Madi wa Faris, ino mafi ganon aw karar al melik amolo bi gearo." ¹⁶ Biga melik wodi awamir, wa jibo Daniel, wa jadao huwo fi hufra ta usood. Melik kelimo le Daniel, "Kede Illah taki, al ita bi abido tawali ankizo ita." ¹⁷ Jibo hajer wa kati kasuma ta hufra de, wa melik kitim ta tou ma kitim ta nubala tou ashan mafi haja bi gearo fi kalam ta Daniel. ¹⁸ Yala melik ruwa le kasr tou wa som belel kulu. Mafi ihtifal fi yom dak, wa huwo ma agder nom. ¹⁹ Biga fi sabah tou melik gom bedri wa jere le makan ta hufra ta usood. ²⁰ Zaman huwo wosulo gerib min hufra de, huwo nadi Daniel be sot hazen, wa kelimo le Daniel, "Daniel, khadim ta Allah al hai, sei Allah taki, al ita bi abido tawali, agder ankizo ita min usood de?" ²¹ Daniel gom kelimo le melik, "Melik, ish lelabad! ²² Illah tai rasulo malika wa gofulo kasoma ta usood, wa humon ma awgo ana. Ashan lego ana bedon nedif fi gidam tou wa kaman fi gidam taki, ya melik, wa ana ma amolo haja batal. ²³ Biga melik tala murah shedid. Huwo wodi talimat ino kede talao Daniel bara min hufar de. Fa gom talao Daniel bara min juwa hufra. Ma ligo le huwo jereh, ashan huwo kan amin fi Illah tou. ²⁴ Melik gom tala awamir, wa gom jibo rujal al ishtaki Daniel wa jadao humon fi hufra ta usood de,iyal tumon, wa nasawin tumon. Gobal ma humon ma wosulo tihit, usood de ferteko wa kasoro udam tumon hita hita. ²⁵ Bad daak Melik Darios katibo le kulu shab, ummam, wa lugat al bi geni fi ard: "Kede salam takom zido. ²⁶ Ana tala karar ino kulu nas al bi geni fi mamlaka tai kede kafo Illah ta Saniel, ashan huwo yao Allah al bi ish lelabad, wa mamlaka tou ma bi demiro; sultan tou le nihaya. ²⁷ Huwo hafizo enna wa ankizo enna, wa huwo amolo ayat wa ajaib fi sama wa fi ard; huwo hafizo Daniel min guwa ta usood." ²⁸ Fa Daniel kan naja fi zaman hukom ta Darios wa fi zaman hukom ta Koros al min Faris.