¹ Asuma takum le kalam de , itakum abgar ta Bashan , intakum al fi jebal ta Samaria, itakum nas al be zulumu masakin , itakum al be demero nas al muhtajin , itakum al be kelim le rujal takum jibu lena merisha . ² Elah Yahweh halifu be kadasa tou , ayenu youm be ja le itakum bara be hajat al batal wan as al akir min itakum be selu bara be hajat ta gobudu samaga. ³ Intum be ruwa bara min wasat ta mahalat al kasuru fi heta ( sur ) ta median, kulu wahid min itakum be ruwa adil min fogo,wa be jadau itakum fi safa ta Harmon, de Yahweh yau kelim kalm de. ⁴ Ruawa takum fi Bethel wa amulu takum katiya , ruwa fi Gilgal wa zidu takum katiya, jebu zebiha takum kulu sabah, osur takum kuly bat talata youm . ⁵ Wodi takum zebiha ta sukur ma regif sawa, besiru takum zebiha al itakum be wodi min neya takum ,wori lomon ,de be kum kuwes ma ita,itakum nas ta Israel de yaw kalam al elah Yahweh kelim . ⁶ Ana wodi le itakum sukul nedif ta sunun in kulu mudon takum ,Kaman naks ta akil fi kulu mahalat takum ,lesa itakum ma reja lana,de kalam al Yahweh kelim. ⁷ Ana Kaman selu motoro min itakum lego lesa bagi talata sahar ta amtar le hasat takum , ana sebu keli motoro nezil fi medina wahid bes,Kaman ana sebi ma nezil fi medina tani ,wahid teja ta ard motoro fogo ,lakin teja tani yabis bedon motoro. ⁸ Esnin aw talata modon wogif ma medina tani asan be asrab moyou lakin kan ma temu umon , lesa itakum ma reja lana fi kulu de,de yau kalam al Yahweh kelim. ⁹ Ana azibu itakum be tab wa intaha itakum kulu ma nada Kaman, Kaman fi mahal zira takum ,asjar ta zetun wa kulu hajat intahat be jarad ,lesa itakum ma reja lana,de yau kalam al Yahweh kelim . ¹⁰ Ana rasulu ogubat le itakum ze al kan fi Masir ,ana katulu sabab takum be sef ,ana selu husan takum bara,Kaman itakum sumu reha ta muwaskarat takum lakin itakum lesa aba reja lana, de kalam al Yahweh kelim. ¹¹ Ana demero modon fi washat takum ,ze al kan elah demero Sodom ma Gomorrah , itakum ze asaya al haragu al talau bara min nar, lakin lesa itakum aba reja lana,de yau kalam al Yahweh kelim. ¹² Asan keda ana be amulu haja al batal le itakum , jahizu takum asan be lemu ma Rabuna , ya Israel. ¹³ Asuma ,zol al salau jebal kama hwo yau kalagu hawa , Kaman yau wori afkar tou le insan , yau amulu sabha keli kun asued Kaman be kun fi mahalat al fokta ard , de Yahweh yau kelim.