¹ Saul kan fi itfak le mutu tou. Zede inak fi nefsu yom bada itihad did al kenisa al kan fi Arselim; wa muminin kan kulu setetu hawuli manatik ta Yahudia wa Samaria, ile al rosuls. ² Rejal al mukerisin dofunu Stephanus wa kore be husun sedid le uwo. ³ Lakin Saul awugu al kenisa sediid; uwo gi rua min bed le bed wa juru bara rijal wa nuswan, wa kutu umon fi jua sigin. ⁴ Lakin lisa muminin al biga musetetin de rua gidam ma besiru al kelima. ⁵ Philibus rua tehet le medina ta Samaria wa besiru le umon al Mesih. ⁶ Zaman nas ketirin asma wa ainu al alamatal Philibus amulu, umon kutu balak tomon sawa le sunu al uwo gi kelim. ⁷ Aroha al batal tala bara min ketirin al kan moskunin, gi kore ma sot sedid, wa ketirin al kan mosululin wa maflog kan aliju. ⁸ Zede kan inak fi fara kebir fi medina dak. ⁹ Lakin inak kan fi zol fi al medina ismu Saman, uwo al kan bediri gi marisu sihiri; uwo gi istagarabu al nas ta Samaria, wa gi amulu nefsa tou gali uwo kan zol mohim kalis. ¹⁰ Kulu al Samarien, min al suker le al akbar, gi kutu balak le uwo; umon gi kelim, '' Rajil de yau al guwa ta Allah al bi nadi Azim''. ¹¹ Umon gi asma le uwo, ashan uwo istagarabu umon le fetera towil ma sihiri tou. ¹² Lakin zaman umon amin le Philibus ze uwo gi besiru kabar al kuwes an molokut ta Allah wa be isim ta Ysua al Mesih, amidu umon kan , kulu min rujal wa nusuan. ¹³ Hata Saman nefsu amin, wa bat ma amidu uwo, uwo geni ma Philibus mustemiran. Zaman uwo ainu alamat wa azaim gi hasil, uwo kan istagarab. ¹⁴ Fi wekit dak zaman fi Aurselim asma gal Samarien kaman akudu kelima ta ALLAH, umon rasulu le umon Buturus wa Yuohana. ¹⁵ Zaman umon rua lakadi inak, umon seli le umon, ashan umon bi akudu al Roho al Kudus. ¹⁶ Lianu lakadi zaman dak, al Roho al kudus ma ja le ayi wahid minum; umon bes amidu fi isim ta Rabana Yesua al Mesih. ¹⁷ Yela Buturus wa Yuohana kutu i iden tomon fogo umon, wa umon akudu Roho al Kudus. ¹⁸ Zaman Saman al sihir ainu gali Roho al Kudus kan gi wedi be wasat kutu iden ta rosuls', uwo wedi le umon gurus. ¹⁹ Uwo kelim , ''Wedi le ana guwa de , kaman, ashan ayi zol ana kutu iden le uwo bi akudu Roho al Kudus.'' ²⁰ Lakin Buturus kelim le uwo, '' kede fida taki mutu ma ita, ashan ita gi fekir gali hadia ta Rabana bi ligo ma gurus. ²¹ Ita ma indu jusu au nisba fi hajat de, ashan gelba taki ma adil le Allah. ²² Ashan kida tub min sokol sar al ita indu, wa seli le Rabana, ashan uwo bikun bi afi ita min ragba ta gelba taki. ²³ Lianu ana gi aynu ita malian ma sim ta marara wa fi rubat ta katia.'' ²⁴ Saman al sahar juabu gali, '' Seli le Rabana min ajili, ashan kede ayi haja al ita kelim de kede ma hasil le ana.'' ²⁵ Zaman umon kan sahidu wa kelim kalam ta Rabana, Buturus wa Yuohana rija le Arselim, wa gi besiru al injil le keriat ketir ta Samarien. ²⁶ Zaman dak kan malaika ta Rabana wonusu le Philibus wa kelim, '' gum wa rua le tija ta junub le sika al gi rua min tehet min Arselim le Gaza.''(Sika de fi sahara.( ²⁷ Uwo gum wa rua. Inak, kan fi zol min Asiubia, azim fi sulta wa sakal tehet Kandaka, melka ta Asiubien.Uwo kan mosul le kulu malia ta hia. Uwo kan ja le Arselim le ibada. ²⁸ Uwo kan gi rija wa gi geni fi ras karlo tou, wa kan gi agara min kitab ta nebi Asaiah. ²⁹ Roho kelim le Philibus, '' arkap fok wa geni gerib le markabade.'' ³⁰ Kida Philibus jere le uwo, wa asuma uwo bi agara min sifir ta Asaia al nabi, wa kelim,'' Ita gi fahim sunu al ita bi agara?'' ³¹ Al Asiubi kelim , ''Kef ana bi , ilekan zol tani saidu ana?'' Uwo asalu Pilibus ashan bi arkab fok fi markaba gerib wa geni ma uwo. ³² Kan al giraya ta injl ali Asiubi kan bi agara kan zede, '' Uwo kan gedimu ze koruf al bi dabau, wa ze hamil fi gidam t ta jazar bi askut, kida uwo ma fata kasma tou. ³³ FI ihana al amulu le uwo adala kan silu bara min uwo. Munu bi agder wasifu kamil ajial tou? Lianu haya tou kan silu min al ard''. ³⁴ Kida al kish asalu Philibus, wa kelm, '' Ana asalu ita, munu yau al nebi bi wonusu anu, nefsa tou, wele wahid tani?'' ³⁵ Philibus bada wonusu, wa bada ma injil de uwo besiru al kabar al kuwes an Yesua le uwo. ³⁶ Ze ma umon fi sika, umon ja fi mahal fogo moyo wa al kish kelim, ''Ainu, fi moyo inak. Sunu bi abusu ana ashan bi amidu?'' ^{37 38} Zede al Asiubi amiru al markaba le wuguf. Umon nezil tehet wa jua moyo, kulu Philibus wa al kish, wa Philibus amidu uwo. ³⁹ Zaman umon tala bara min moyo, al Roho ta Rabana silu Philibus bara. wa al kish ma ainu uwo tani mara, lakin uwo itemir be mamoria tou farahan. ⁴⁰ Lakin Phiibus rua zahir fi mahal ismu Azotus wa uwo abiri iklim dak, gi besiru al le kulu al mudun lakadi uwo ja le Kaisaria.