¹ Rais al kahana kelim,'' Hal hajat delin sah?'' ² Stifanus kelim, ''Akwana wa abuhat, asma takum le ana: Illah ta mejid zahir le abu ta nina Ibrahim zaman uwo fi Mesopotamia ) bein naharen), gubal uwo ma geni fi Haran, ³ Uwo kelim le uwo, 'sebu beled taki wa ahal taki, rua le beled al ana bi weri le ita.' ⁴ Yala uwo sibu beled ta kaldanin wa geni fi Haran; min hinak, bat abu tou mutu, Allah jibu uwo le mahal de, ali itakum bi geni fogo hasa. ⁵ Uwo ma wedi ayi werisa le uwu, hata ma kan kifaya ashan bi dusu kura tuo fugu wata de. Lakin Uwu waidu- ragmi inu Ibrahim ma indu jena lisa - inu uwu bi wedi al ard ze melik le uwu wa le jil ta tuo baat uwu. ⁶ Allah kan gi wonusu zede le uwo, gali agial tou bi geni awel fi beled al ma tomon, wa gali nas al bi geni inak de bi jibo umon le abodia wa b amolo umon batal le fetra ta urbomia senawat. ⁷ Lakin Ana bi hukumo uma al umon geni kadimo,' Allah kelim, ' wa bat da umon bi ja wa abidu ana fi makan de. ⁸ Yela Allah wedi le Ibrahim al a-hat ta tethir, kida Ibrahim biga ja kun abu ta Ishak wa tahiru uwo fi yom nimra tamania; Ishak biga abu ta Yagub, wa Yagub yau abu ta itnasar judud. ⁹ Ashan judud del kan gayurin ma Yuosif, umon biu uwo le Masirin; lakin Allah kan ma uwo ¹⁰ wa ankisu uwo min masakil kulu. Uwo wedi le Yuosif neima wa hikma fi gidam ta Faraon, melik ta Masir, al aino uwo hakim le Masir wa le bed tou kulu. ¹¹ Inak kan ja jian fi Masir wa Kanan kulu, wa tab kebir, wa abuhat tanina ma bi agder ligo akil. ¹² Lakin zaman Yagoub asma gali fi dura fi Masir, uwo rasulu abuhat tanina le awel mamoria tomon. Fi ¹³ mamoria tomon nimra itin Yousif arifu nefsa tou le akwana tou, wa usra ta Yousif biga maruf le Faraon. ¹⁴ Yuosif rasulu akwana tou wara wa kede weri le abu tou Yagub kede ja fi Masir, ma kulu usra tou, kamsa wa sebein nafar kulu. ¹⁵ De yau kef Yagub rua fi Masir, wa uwo mat, uwo wa abuhat tanina. ¹⁶ Umon arfao min inak le Shekhim wa dofunu fi turuba al Ibrahim kan biu ma taman min fida min iyal ta Hamor fi Shekhem. ¹⁹ Zema zaman ta wad wosulu, wad ta Allah al amulu le Ibrahim, nas raba wa zidu fi Masir, ¹⁷ lahadi melik tani ja fi Masir, melik al ma bi aruf an Yousif. ¹⁸ De yau nefsu melik al kabasu nas ta nina wa amulu abuhat tanina batal shedid, umon kan asuru abuhat tanina ashan bi beynu iyal tomon al sukerin le kutura, kida umon ma agder hafisu iyal de hayi. ²⁰ Fi zaman dak Musa kan weledu; uwo kan giafa kalis gidam ta Allah wa kan radau le fetra ta talata sahar fi bed ta abu tou. ²¹ Wekid kan kutu uwo bara min bed, binia ta Faraon gum shelu wa rabau ze jena ta hia fi bed tomon. ²² Musa kan biga mutu-alim fi kulu hikma ta Masirin, wa uwo kan azim fi kilimat wa sokolat tou. ²³ Lakin zaman uwo kan biga arbein sens fi umur, ja fi gelba tou ta ziara le akuwana tou, al iyal ta Israil. ²⁴ Zaman uwo ainu wahid min Israil bi amulu batal, Musa gum difau uwo wa intagimu zol al gi azibu ma dak le Masiri: ²⁵ uwo fekir gali akuwana tou bi fahim gali Allah be was at iden tou kan gi ankisu umon, lakin umon ma agder fahim. ²⁶ Fi yom tani uwo ja le Israilin tanin al bi kore kore ma bat; uwo hawil ashan bi jibu salam fi nus tomon; uwo kelim, ' ya Rujal, itakum akwana; malu itakum bi awugu badun takum?' ²⁷ Lakin zol al amulu haja batal le aku tou de lizu uwo bara, wa kelim, ' munu yau amulu ita hakim wa gadi fok nina? ²⁸ Ita kaman der katulu ana, ze ma ita katulu zol ta masir umbari? ²⁹ Musa jere bara bat asma kalam de; uwo biga ajnebi fi beled ta Midian, inak uwo biga abu ta itiniin awulad. ³⁰ Bat arbein sena, malaika zahir le uwo fi gabat ta Jebel Sinaa, fi lehib ta nar fi ges. ³¹ Zaman Musa ayinu le nar, uwo istagarab le haja al uwo ayinu de; wa ze ma uwo gi midu ashan bi ayinu fogo, inak ja sot ta Rabana, kelim, ³² Ana yau Allah ta abuhat takum, Allah ta Ibrahim, wa ta Ishak, wa ta Yagoub.' Musa biga bi rogus wa ma bi agder ashan bi ayinu fogo. ³³ Rabana kelim le uwo, ' Agila gisma bara min kurein taki, lianu mahal al ita bi wagif fogo de mukadas. ³⁴ Ana hagiga ayinu tab ta nas tayi al fi Masir; Ana asma kore tomon, wa ana ja tehet le inkas tomon; has taal, Ana bi rasulu ita le Masir.' ³⁵ De yau Musa al umon aba, zaman umon kelim, ' munu yau kutu ita hakim wa gadi?'- uwo yau al Allah rasulu ze kulu min hakim wa muharir. Allah rasulu uwo be iden ta malalika al zahir le Musa fi gaba. ³⁶ Musa tala umon bara min Masir, bat amulu mojizat wa alamat fi Masir wa Bahar al ahmar, wa fi al sahara fetera ta arbein sena. ³⁷ De yau nefsu Musa al kelim le nas ta Israil,' Allah bi arfa nebi fok min nus takom akuwana, nebi ze ana.' ³⁸ De yau zol al kan fi intima fi sahara ma malaika al kan wonusu ma uwo fok Jebel Sina. De yau zol al kan ma abuhat ta nina; de yau zol al akudu kelimat al hai al wedi le nina. ³⁹ De yau zol al abuhat ta nina aba yi tii; umon lizu uwo bara min nefsa tomon, wa fi gelba tomon umon gilibu wara le Masir. ⁴⁰ Fi zaman dak umon kelim le Haron, 'Salau le nina rabana al bi gedimu nina. Ze le Musa de, uwo al tala nina bara min al ard ta Masir, nina ma bi aruf sunu al hasal le uwo.' ⁴¹ De yau kef umon salau sanam min sura ta bagar fi ayam dak wa jibu zebiha le sanam de, wa biga farhanin ashan sokol ta iden tomon. ⁴² Lakin Allah gilibu wa wedi umon le ibada ta nujum fi sama, ze ma moktub fi kitab ta ambia, ' hal itakum gedimu le ana haiwan wa debiha le arbein sena fi al sahara, ya bed Israil? ⁴³ Itakum gabilu tabut ta Molek wa ta nijma ta rabana Rephan, wa suwar al itakum salau ashan bi abidu umon: wa Ana bi arfa itakum bara lakadi Babilon.' ⁴⁴ Abuhat ta nina indu al tabut ta shuhuda fi sahara, bes ze Allah amiru zaman uwo wonusu le Musa, gali Uwo bi sala sura al uwo kan ayinu de. ⁴⁵ De yau al keyima al abuhat ta nina silu ze momtalak, wa umon jibu uwo le ard ma Yesou. Fi gidam ta abuhat ta nina, al momtalakat ta umam al Allah kan silu bara min al ard kan silu ze momtalakat tomon. Al keyima de fadulu fi al ard lakadi fi zaman ta Daud, ⁴⁶ wa uwo ligo neima fi ena ta Allah wa asalu iza uwo bi ligo makan al Allah ta Yagoub bi geni fogo. ⁴⁷ Lakin Siliman yau kan abinu bed le Allah. ⁴⁸ Hata wo lo, Al Said Ala ma bi geni fi biyut al salau ma idenat ta nas, ze ambia kelim, ⁴⁹ Samawat yau kursi tai , wa Ard yau mahal ta kutu kura tai. Yatu shikil ta bed itakom bi abinu le Ana? Rabana yau kelim, au yatu yau makan le raha tai? ⁵⁰ Iden tai yau ma sala hajat de kulu? ⁵¹ Itakom nas al arianin wa al ma tahiru fi gelba wa adanat, itakum daiman bi kowimo Roho Al Kudus; itakum gi amulu ze abuhat takum gi amulu. ⁵² De yatu al ambia al abuhat takum ma itahidu? Umon katulu al ambia al zahir fi mugedima ta ja ta al bir al wahid; wa itakum has biga yau kainin wa katilin to uwo kaman, ⁵³ itakum nas al akudu la ganun al malaikat kan asisu, lakin itakum ma hafisu". ⁵⁴ Zaman ada ta mejles asma kalam de, gulub tomon kan gata, wa umon biga bi adi sunsun tomon le Stiphanus. ⁵⁵ Lakin uwo, kan malian be Roho Al Kudus, ayinu fok be terkis le sama wa ayinu mejid ta ALLAH; wa uwo ainu Yesua wagif tija ta yomin ta ida ta Allah. ⁵⁶ Stiphanus kelim,'' Suf, ana ayinu sama fata, wa Ibin Insan wagif fi tija ta yomin ta iden ta ALLAH.'' ⁵⁷ Kida al ada ta mejles gum gofulu adanat tomon, wa bada kore be sot shedid, kulu ma bat umon jere le uwo. ⁵⁸ Umon gum juru uwo le bara ta medina inak umon bada luku uwo ma hujar, wa nas al amulu wa sahidin fi katulu Istiphanus de agila gumasat tomon bara wa wedi fi musulia ta Rajil al sab ismu Saul. ⁵⁹ Ze ma umon kan gi luku,luku Stiphanus, uwo kan gi nadi Rabana wa kelim, '' Rabana Yesua , akudu roho tai.'' ⁶⁰ Uwo raka tehet wa nadi be sot kebir, '' Rabana, mata hasibu katia de dit umon.'' Zaman uwo kelim zede, uwo waga naim.