¹ Akwana wa abuhat, asma le difa tai al ana hasa gi amulu le itakum." ² Zaman jumhur asma Bulis wonusu le umon fi al luga al Ibiria, umon biga askut. Uwo kelim, ³ " Ana Yahudi, weledu fi Tarsus min Silisia, lakin itialam fi medina de tehet akdam ta Gamaliel. Ana kan derisu hasab turuk al morbut ta al ganun ta abuhat ta nina. Ana gayur le Allah, bes ze kulu itakum alela. ⁴ Ana itahidu Sika de le al mut, robutu wa gedimu umon le sigin min rujal wa nuswan, ⁵ ze al rais al kahana wa kulu al shiuk bi agder ashad. Ana akudu juabat min umon le al akuwana fi Dimask, wa rua jibu umon min inak morbutin wara le Urshelim ashan kede umon ja agibu. ⁶ Al hasal zaman ana kan musafir wa biga gerib le Dimask, nus nahar sutfa kida nur kebir min sama bada wala hawli ana. ⁷ Ana waga tehet wa asma al sot gi nadi ana, ' Saul, Saul, le ita gi itahudu ana?' ⁸ Ana juabu, ' Ita yau munu, ya Said?' Uwo kelim le ana, ' Ana yau Yesua al Nasiri, al ita gi itahidu.' ⁹ Delin al kan ma ana aiynu al nur, lakin umon kan ma fahim al sort ta uwo al wonusu le ana. ¹⁰ Ana kelim, ' Kede ana amulu sunu, Said?' Al Said Rabana kelim le ana, ' Gum fok wa rua fi Dimask; inak bi weri le ita ayi haja al ita lazim bi amulu.' ¹¹ Ana ma bi agder ayinu ashan nur al wala shedid de, wa kan gedimu ma idenat ta delin al kan ma ana, Ana ja le Dimask. ¹² Inak ana gabilu rajil ismu Ananias, al rajil amin hasab al ganun wa kan gi wonusu an kuwes tou ma kulu al Yahud al bi geni inak. ¹³ Uwo ja le ana, wagif ma ana, wa kelim, ' Akuwi Saul, akudu nazar taki.' Fi nefsu zaman dak ana akder aiynu uwo. ¹⁴ Yela uwo kelim, ' Allah ta abuhat ta nina kalas iktar ita le arufu irada tou, le aiynu al wahid al Bar, wa le asma al sot al jai min kasma tou. ¹⁵ Ita bikun sahid le uwo le kulu nas an sunu al ita aiynu wa asma. ¹⁶ Hasa malu ita bi istena? Gum, kede amidu ita, wa kasulu kulu katiat taki bara, nadi le isim tou.' ¹⁷ Bat ana kan rija le Urshelim, wa ze ana kan gi seli fi al hikal, haja hasil gali kan wodi le ana al ruiya. ¹⁸ Ana aiynu uwo kelim le ana, ' Istajil wa sibu Urshelim guwam, ashan, umon ma bi gabilu suhuda taki an ana.' ¹⁹ Ana kelim, 'Rabana, umon be nefsu tomon aruf gali ana siginu wa dugu delin al amin fi ita fi ayi majma. ²⁰ Zaman al dom ta Stiphanus shihada taki kan harik, Ana kaman kan wagif inak wa mutafik, wa ana kan gi harisu gumasat ta delin al katulu uwo'. ²¹ Lakin uwo kelim le ana, ' Rua, ashan ana gi rua rasulu ita beyit kalis le al Umamien." ²² Umon asma le uwo lakadi uwo kelim zede. Biga umon kore wa kelim," Bara ma sikil zol de min al ard, uwo ma sah gali kede uwo geni hayi." ²³ Ze umon kan gi kore, jadau gumasat tomon fok, wa arfa turab le fok, ²⁴ al kait amiru Bulis kede jibu jua al harasa. Uwo wodi talimat kede asalu uwo ma azab, ashan gali uwo be nefsa tou kede aruf le umon kan gi kore kore dit uwo ze de. ²⁵ Zaman umon kan robutu uwo fok ma al hubal, Bulis kelim le dabit al kan wagif inak, " Hal ganuni le ita le azibu zol al uwo muatin Romani wa uwo al lisa ma hukumu?" ²⁶ Zaman al dabit de asma kida, uwo rua le kait al aala wa wori le uwo, kelim, " Ita bi amul sunu bat de? Lianu al rajil de uwo muatin Romani." ²⁷ Al kait al aala ja wa kelim le uwo," Weri le ana, ita muatin Romani?" Bulis kelim, " Nam." ²⁸ Al kait de juabu, " uwo kan bes ma moblak ketir ta gurush ana isteret al muatana." Lakin Bulis kelim, " Ana kan weledu muatin Romani." ²⁹ Biga zol al kan rua asalu uwo de sibu uwo tawali. Al kait al aala kaman kan kafu, zaman uwo aruf gali Bulis kan muatin Romani, ashan uwo kan yau robutu uwo fok. ³⁰ Fi yom nimra itniin, al kait deru aruf al hagaik an al tuham al endu Yahudin dit Bulis. Biga uwo wahidu mojumu tou wa talabu al rais al kahana wa kulu al mejles le intima. Yela uwo jibu Bulis wa kutu uwo fi nus tomon.