¹ Zaman nina kan rua bara min umon wa safar be bahar, nina rua adil tawali le medina ta Kos, wa fi yom atani le medina ta Rhodes, wa min inak le al medina ta Batara. ² Zaman nina ligo sefina al bi gata tawali le Bhoenisia, nina arkab wa safir. ³ Bat nina ayinu Kuburus, nina sibu fi tija ta samal ta murkab, nina safir le gidam le Suria wa nezil fi Tyra, mahal al sefina kan gi fadi sendel tou. ⁴ Bat nina ligo al talamis, nina geni inak saba yom. Bewasat ta Roh umon istemir asalu Bulis kede ma rua le Urshelim. ⁵ Zaman ayom tanina inak kan kalasu, nina safar wa rua le mamoria ta nina, wa umon kulu , be nuswan wa iyal tomon, gedimu nina bara al medina. Yela nina raka tehet fi taraf bahar , seli, ⁶ wa kelim wada le bat ta nina. Yela nina rua arkab al sefina, wa umon rija bed. ⁷ Zaman nina kan kalasu al musuar min Tyra, nina wosulu fi Btolemais. Inak nina selimu al akwana wa geni ma umon le yom wajid. ⁸ Fi yom atani nina safir wa rua le Kaesaria. Nina dakalu fi bed ta Philibos, al mubesir, uwo al kan wahid min al saba,wa nina geni ma uwo. ⁹ Rajil de indu arba banat fata umon gi itnaba. ¹⁰ Ze nina geni inak le ayom besid, inak ja tehet min Yahudia nebi tani ismu Agabus. ¹¹ Uwo ja le nina wa silu gas ta Bulis. Uwo rubutu kurain wa idenat tou wa kelim," Roho al Kufus kelim, ' kida bikun al Yahudin fi Urshelim bi rubutu fok al rajil al indu gas de, wa umon bi istelimu uwo fi iden ta al umamie" ¹² Zaman nina asma kalamat de, kulu nina ma al sab al bi geni fi makan dak talabu Bulis kede ma rua le Urshelim. ¹³ Bulis biga juabu, " De sunu al itakum gi amulu, kore wa kasuru gelba tai? Ana kalas jahis, ma bes ashan bi rubutu fok, lakin kaman le mutu fi Urshelim min ajili isim ta Rabana Yesua." ¹⁴ Ze Bulis kan ma gi itmana asahan bi agnau, nina wegif hawil wa kelim, " Kede irada ta Rabana yau amulu." ¹⁵ Bat ayom dak, nina silu sunat ta nina wa rua le ¹⁶ Urshelim. Inak kaman rua ma nina juzu min talamis min Kaesaria. Umon jibu ma um al rajil ismu Mnason, rajil de kan min Kuburus, al telmis al awel, ma uwo nina bi geni. ¹⁷ Zaman nina kan wosulu fi Urshelim, al ikwa rahibu nina be farah. ¹⁸ Yom al tani Bulis rua ma nina le Yaguob, wa kulu al shiuk kan mojudin. ¹⁹ Zaman uwo kan selimu umon, uwo gum weri wahid wahid hajat al Allah kan amulu fi nus al umamien be wasat kitdima tou. ^{20 21} Zaman umon asma, umon shukuru Allah, wa umon kelim le uwo, " Ita aiynu, akuwi, kef alaf ketirin la amin fi nus al Yahudin. Umon kulu kaririru le hafisu al seria/ganun. Weri le umon an ita, gail ita yau gi derisu kulu al Yahudin al bi geni fi nus ta al umamien ashan bi sibu ganun ta Musa, wa gali ita weri le umon kede ma tahiru iyal tomon, wa kede ma tabi al adat algedim. ²² Kede nina amulu sunu? Umon hagigatan bi rua asma gali ita ja. ²³ Kede ita amulu sunu al nina kelim le ita. Inda na arba rujal umon amulu halifa. ²⁴ Silu rujal del wa nedifu nefsa taki ma umon, wa dafa masurufat tomon le umon, kida gali umon kalas haligu ru-us tomon. Kida ayi wahid bi aruf gali hajat al kan weri le umon an ita de galat. Umonbi aruf gali ita kaman gi tabi al ganun. ²⁵ Lakin be kusus al Umamien al kalas amin, nina katabna wa wedi al towojihat gali umon kede hafisu nesfa tomon min hajat al gedimu zebiha le asnam, min dom, min haja al kangu, wa min aklak batal ta zina." ²⁶ Biga Bulis silu al rujal de, wa fi yom al tani, nedifu nefsa tou ma umon, rua le al haikal, alinu fetera le ayom ta tethir, lakadi al tekdima kan gedimu le ayi wahid min umon. ²⁷ Zaman saba ayom kan gerib bi kalasu, juzu Yahudin min Asia, ayinu Bulis fi al haikal, hariku al jamahir kulu, wa arfa idenat le uwo. ²⁸ Umon kan gi korekore," Rujal ta Israil, sa-adu nina. De yau al rajil al gi derisu kulu nas fi ayi makan hajat al did al sab, al ganun, wa makan de. Kaman, uwo kan jibu Yunanien fi jua al haikal wa kan nigisu makan al mukadas de." ²⁹ Lianu umon kan sabikan ayinu Trophimus al min Ephesus ma uwo fi al medina, wa umon fekiru gali k kan Bulis jibu uwo fi jua al haikal. ³⁰ Kulu al medina kan mutuhamisin, wa al sab jere sawa wa hawil gobudu Bulis. Umon juru uwo bara min al haikal, wa al abuab kan tawali gofulu. ³¹ Ze umon kan gi hawil ashan bi katulu uwo, akbar ja fok le rais al mosul le al huras gali kulu Urshelim kan fi muzaharat. ³² Tawali uwo silu asakir wa kait al mia wa jere le tehet le al jamahir. Zaman al sab ayinu al kait al kebir wa al asakir, umon wogif min dugu Bulis. ³³ Biga al kebir ta jes de ja gerib wa amsuku Bulis, wa amiru kede rubutu uwo ma itinin genzir. Biga uwo asalu kan uwo yau munu wa kan uwo amulu sunu. ³⁴ Juzu fi al jamahir kan gi kore haja tani wa tanin hajat tani. Zema zol al kebir ma bi agder weri ayi haja ashan kulu al izaaj, uwo amiru gali kede jibu Bulis fi jua harasa. ³⁵ Zaman uwo ja gerib ma silim, kan arfau wo ma asakir ashan sokol tekeyan ta jumhur. ³⁶ Kan jamahir min al nas gi rua min wara wa gi istemir korekore," Bara ma uwo!" ³⁷ Ze Bulis kan biga bi jibu fi dakil al harasa, uwo kelim le kebir ta jes, " Momkin ana na kelim haja le ita?" Al dabit de kelim, " Ita bi wonusu luga ta Yunan? ³⁸ Yani ita ma biga min al Masirien, umon sabikan mosulin le tomorut wa gedimu al arba alf rujal min al ' Assassins' bara ila sahara?" ³⁹ Bulis kelim," Ana Yahudi, min medina ta Tarsus fi Cilicia. Ana muatin ta medina al mohim. Ana bi asalu ita, asma le ana ashan bi wonusu le al sab." ⁴⁰ Zaman al dabit kan wedi le uwo izin, Bulis wogif fok fi silim wa hariku iden le al sab. Zaman kan inak fii sukut sedid, uwo wonusu le umon be luga Ibiria. Uwo kelim,