¹ Bulus bardu ja le Dirba wa le Listira; wa telmis isim tuo Timosaus kan fi hinak, Jena ta mara Yahudia al amin; abu tuo Yunani. ² Uwu kan indu shihada kues min nas al be geni fi Listira wa Igoniya. ³ Bulus der uwu kede safir ma uwu; uwu shilu uwu wa taharu uwu ashan kalam ta Yahud al kan fi fi makanat dak, ashan umun kulu arufu inu abu tuo Yunani. ⁴ Ze ma umun ruwa be sika ta mudun, umun wedi le Kanies irshadat ashan umun bi tii, irshadat al kan katibu be rusul wa shiuk fi Urshelim. ⁵ Kanais kan ligu gowa fi iman wa zidu fi adat. ⁶ Bulus ma nas al bi ruwa ma uwu mururu be safa ta Firijia wa Galatia, baad ma Roho al Kudus abusu umun kede ma beshiru injil fi safa ta Asia. ⁷ Zaman umun wusulu gerib ma Misiya, umun hawil ruwa le Bisinia, Lakin Roho ma sibu umun. ⁸ Umun mururu be sika ta Misiya, umun ja le medina ta Terwas. ⁹ Ruwiya zahir le bulus be bilel: rajil min Makadunia kan bi wegif hinak, wa bi nadi, ''Taal fi Makadunia wa saidu nina.'' ¹⁰ Zaman Bulus ayinu ruwiya de, tuwali inna jahisu ashan bi ruwa le Makadunia, inna katimu kalam de inu Allah nadi inna ashan bi beshiru injil le umun. ¹¹ Inna arkab sefina min Terwas, Inna ruwa adil le Samosraki, wa fi yom nimra itnin inna ja le Niyabulus. ¹² Min hinak inna ruwa le Filibi, al uwu medina ta Makadunia, de medina al Muhim fi mugata ta Roma kuluni, wa inna geni fi medina de ayam ketir. ¹³ Fi yom Sebit inna ruwa bara be safa ta bahar, mahal al inna fekir bikon fi mahal ta salawat fugu. Inna geni tehit wa wunuso le nusuwan al limu sawa. ¹⁴ Fi mara isim tuo Lydia, bi tabiyu arjuwan min Siyatira, uwu bi abudu Allah, uwu asuma le inna. Rabuna fata geliba tuo ashan bi kutu bala le kalam al kan wunuso be Bulus. ¹⁵ Wekit amidu uwu ma nas ta bait tuo, uwu asalu min inna, wa wunuso, ''Kan itakum bi ayinu ana amin le rabana, taal takum wa geni takum fi bait tai.'' wa uwu agni inna. ¹⁶ Wa hasil wekit inna bi ruwa le makan ta salawat, mara al indu roho ta arafa limu ma nina. Uwu bi jibu maksab ketir le said tuo be shukul ta arafa tuo de. ¹⁷ Mara de ruwa wara ta Bulus wa inna wa kan bi kure kure, wa bi wunuso, ''Rujal de bi akdimu Allah al fuk. Umun beshiru le itakum sika ta kulasa.'' ¹⁸ Uwu amulu haja le fetera ta ayamatketir. Bulus biga zalan kalis min uwu, uwu lefet wa wunuso le roho de, ''Ana bi amiru ita bi isim ta Yesua al Messih tala bara min hiya.'' Wa tuwali uwu tala bara. ¹⁹ Zaman said tuo ayinu inu raja tuun ta maksab kalas ruwa, umun gubudu Bulus wa Sila wa juru umun fi suk gidam ta Sulutat. ²⁰ Zaman umun jibu umun le wula, umun kelim, ''Rujal del gi balbilu medina ta nina. wa umun Yahudin. ²¹ Umun bi alinu tagalid al ma ganoni ashan Romaniin bi rudu wa nefisu'' ²² Yala jumhur gum did bulus wa Sila; wa Wula sheretu gumasat tumun wa wedi awamir inu kede dugu umun be asayat. ²³ Zaman umun dugu umun darbat ketir, dakalu umun fi sigin wa wedi awamir kedi harisu umun kalis. ²⁴ Baat uwu ligu awamir de, zol al bi siginu nas dakalu umun fi sigin al juwa wa dakalu kura tumun fi genzir. ²⁵ Fi nus bilel Bulus wa Sila kan bi seli wa bi guna taranim le Allah, wa bagi masajin tanin bi asuma le umun. ²⁶ Faja kida zal zal shedid hasil, wa asas ta sigin kan bi hizu hizu; wa tuwli abuwab kulu fata, wa genzir ta ayi zol kan fiku. ²⁷ Al sajan gum min num wa ayinu abuwab ta sigin fadi; uwu tala sef tuo wa kan der katulu madun, lanu uwu fekir inu masajin del jere. ²⁸ Lakin bulus kure le uwu be sout ali, wa wunuso, ''Mata auwugu nefsa taki, lanu inna kulu fi hini.'' ²⁹ Al sagan de asalu nur wa jere juwa, be kuf shedid, uwu dengir gidam ta Bulus wa Sila, ³⁰ wa jibu umun bara wa kelim, ''Ya said, ana bi amulu shunu ashan bi ligu kulasa? ³¹ Umun kelim, ''Amin fi Rabana Yesua wa ita bi ligu kulasa, ita ma nas ta bait taki.'' ³² Umun wunuso kalam ta Rabana le uwu, saw le kulu zol al fi bait tuo. ³³ Baat kida sajan de shilu umun fi nefsu zaman ta bilel, wa kasulu juruh tumun, wa uwu ma delin kulu al fi bait tuo amidu tuwali. ³⁴ Wa ze ma uwu jibu bulus wa Sila fi bait tuo wa wedi akil gidam tumun, uwu tala farhan kalis ma delin al fi bait tuo, al amin fi Allah. ³⁵ Hasa zaman wata biga saba, wula rasulu kabara ma huras, bi kelim, ''Fiku rujal de kede ruwa.'' ³⁶ Al sajan jibu kabara le Bulus, bi kelim, ''wula rasulu kabara le ana kede fiku itakum: hasatala takum bara, wa ruwa takum be salam. ³⁷ Lakin Bulus kelim le umun, ''Umun dugu inna gidam ta nas bidun hukum, wa inna muatini ta Romanin umun dakalu inna fi sigin Umun hasa der fiku inna be sir? La! kede umun ja be nefus tumun wa fiku inna bara.'' ³⁸ Haras de weri kabara de le wula, wa zaman umun asuma inu Bulus wa Sila Romanin, umun kan kafu. ³⁹ Wula de ja wa itezir le umun wa fiku umun bara, asalu umun kede ruwa baiit min medina. ⁴⁰ Bulus wa Sila tala min sigin wa ja fi bait ta Lidia. Zaman Bulus wa Sila ayinu ikewa, umun shaja umun wa tala min medina.