¹ Baad min rujal ja min Yahudia le Antakia wa weri le Ikewa, wunuso, ''Ita ma bi ligu kulasa Ile kan taharu ita be hasab ganon ta Musa.'' ² Kalam de kutu Bulus wa Barnaba nakishu ma umun kalis. Iktaru Bulus wa Barnaba ma baat min nas min nus tumun ashan bi ruwa le Urshelim ashan bi gabilu ma rusul wa shiuk be kusus kalam de. ³ Yala Kenisa Rasulu umun, umun mururu be Finigia wa Samira bi kabaru umun inu Umam gairu geliba. Umun jibu farah kebir le kulu ikewa. ⁴ Zaman umun ja fi Urshelim, Rahibu umun be Kenisa wa rusul wa shiuk, wa umun weri kulu hajat al Allah amulu ma umun. ⁵ Lakin baad min rujal al amin, al tabien le mujumua ta Ferissin, wegif fuk wa kelim, ''Uwu dururi ashan be taharu nas de wa amiru umun kede tabigu ganon ta Musa. ⁶ Rusul wa shiuk limu sawa ashan be fekir fi kalam de. ⁷ Baat nikash tawil, Buturus wegif fuk wa wunuso le umun, ''Ikewa, itakum arufu kues fi ayamat wara AAllah iktar min nus takum, inu be wasat kasma tai umamin bi asuma kelima ta injil, wa bi amin. ⁸ Allah al arufu geliba, bi shahidu le umun, wedi le umun Roho al Kudus, ze ma uwu amulu ma inna; ⁹ Wa uwu ma maizu bainu inna ma umun, nadifu gulub tumun be iman. ¹⁰ Hasa le itakum bi jeribu Allah, itakum der kutu tegila fi ragabta ta talamiz tegila al ma inna wele abuhat ta inna agder arufa? ¹¹ Lakin inna gi amin bi kalisu inna be wasat ta naima ta Rabana Yesua, ze ma umun kan.'' ¹² Jumhaur kulu kan gi skout ligu umun bi asuma le Barnaba ma Bulus bi weri Mujizat wa ajaib al Allah amulu fi nus ta Umam be wasat tumun. ¹³ Baat ma umun askout, Yagub jouabu, wa kelim, Ikewa, asuma takum ana. ¹⁴ Samaan weri kef Allah awel be naima zuru Umam ashan bi shilu min umun nas le isim tuo. ¹⁵ Kelimat ta ambiya tifagu be kalam de, ze muktub, ¹⁶ 'Baat hajat de Ana bi rija, wa ana bi abinu kaima ta Daoud al waga de tani mara; Ana bi abinu wa bi rija uwu tani, ¹⁷ ashan bagi nas al fadulu bi nadi Rabana, bi nas Umam nadi be isim tai.' ¹⁸ de haja al Rabana bi kelim, al amulu hajat de al arufu min ayamat ta bediri. ¹⁹ Ashan kida, rai tai yau ze de, kede inna ma tabanu delin al min Umam al ja le Allah. ²⁰ Lakin inna bi katibu le umun inu umun lazim be kun bait min najasat ta asnam, min zina, wa min laham ta haiwanat al kanagu, wa min dum. ²¹ Lanu Musa kan bi beshiru fi ayi ayi medina min zaman ta judud wa uwu gi agarau fi majma kulu yom sebit.'' ²² Yala rusul wa shiuk, ma Kenisa kulu ayinu uwu kues ashan bi Yahuza al isim tuo Barnaba, ma Silas, al umun kan giadin ta Kenisa, wa bi rasulu umun le Antakia ma Bulus wa Barnaba. ²³ Umun katibu kida: ''Min rusul w shiuk, akuana takum, le Ikewa Umam fi Antakia, wa Kilikia: Salam le itakum! ²⁴ Inna asuma inu fi baad min rujal ruwa min inna, budun izin min inna, wa shuwishu itakum be talim al karabu nufus takum. ²⁵ Haja al hasil, inn akulu tifagu ashan bi iktar rujal wa bi rasulu umun le itakum sawa ma mahbubin ta nina Barnaba wa bulus, ²⁶ rujal al wedi haya tumun fi katar le ajili isim ta Rabuna ta nina Yesua al Messih. ²⁷ Ashan kida inna bi rasulu Yahuza wa Silas, al bi weri le itakum nefsa haja be nufus tumun be kelimat tumun. ²⁸ Ashan uwu bi bainu kues le Roho al Kudus wa le inna, ashan ma bi wedi le itakum tegila aktar min hajat al dururi: ²⁹ inu kede itakum abusu badun min hajat al gedimu zebiha le asnam, dum, hajat al kanagu, wa min zina. Kan itakum hafisu badun min hajat de, bi kun kues ma itakum. Muafin.'' ³⁰ Zaman umun biga bi ruwa, umun ja le Antakia; baat ma umun limu jumhur sawa, umun rasulu risala. ³¹ Wekit umun agarau, umun tala farhanin bi kalam ta teshji. ³² Yahuza wa Sila, bardu ambiya, sheje akuwana be kelimat wa guwi umun. ³³ Baat ma umun akudu zaman hinak, rasulu umun bara be salam min ikewa le delin al rasulu umun. ³⁴ Lakin Sila ayinu uwu kues ashan uwu bi fadulu hinak. ³⁵ Lakin Bulus ma Barnaba geni fi Antakia sawa ma tanin ketirin, fi mahal al umun alimu wa beshiru kelima ta Rabana. ³⁶ Baat ayam Bulus kelim le barnaba, ''Kele inna rija zuru ikewa fi kulu medina al inna beshiru kelim ta Rabana fugu, wa bi ayinu umun kef.'' ³⁷ Barnaba der bardu shilu ma umun Yuhanna al bi nadi Murkus. ³⁸ Lakin Bulus fekir ma kues ashan umun bi shilu Murkus, al kan sibu umun fi Bamafilia wa ma ruwa ma umun fi shukul. ³⁹ Nikash shedid hasil bainu umun, umun ferigu min badun, wa Barnaba shilu Murkus ma uwu wa arkab sefina le Gubrus. ⁴⁰ Lakin Bulus iktar Sila wa fat, baat ma ikewa istauda umun be naima t Rabana. ⁴¹ Uwu mururu be Suriya wa Kilikia, bi gowi Kenisa.