¹ Biga shaab ta beled ardi shilu Jehaahaz weled ta josia, wa kutu huwo melik fi mahal ta abu towo fi ourshelim. ² Jehoahaz kan indu talata wa ishirin sena laman huwo bada hokum, huwo hokum talata ahahar fi ourshelim. ³ Melik ta masir kan shilu huwa bara min ourshelim, wa asuru huwo keli dafa garama ta beled, miya awozan ta fida, wa wozna min al dahab. ⁴ Melik ta masir kutu eliakim, kan aku ta jehoahaz melik ta yahuza wa ourshelim (wa geiru isim ta Eliakim le Jehoiakim). Necho kan shilu aku ta Elinkim Jehoahaz wa jibu huwo fi masir. ⁵ Jehoaikim kan indu kamsa wa ishirin sena laman huwo bada hokum, wa huwo kan hokum bidashar sena fi ourshelim. Huwo kan amulu batal fi ena ta yahwa Rabana towo. ⁶ Nebukadnasir, melik ta babel kan hajim wa robutu huwo be genzir jibu fi babel. ⁷ Nebukadnasir kan hajat min beit ta yahwa le babel, wa kutu umon fi kasr bitowo fi babel. ⁸ Le hajat tannin al bi kusus jehoiakim, hajat al kaab al huwo kan amulu, wa al kan ligo did huwo, katibu fi kitab ta muluk ta yahwa wa Israel, bega jehoiachin weled bitowo kan geni melik fi mahal bitowo. ⁹ Jehoiachin kan indu tamania sena laman uwo bada hokum, huwo kan hokum talataa ahahar wa ashara yom fi ourshelim. Huwo kan amulu hajat batal fi ena ta yahawa. ¹⁰ Fi bidaya ta sena melik nubukadnasir kan rasulu rujal wa jibu huwo le bebel, ma hajat al gali min beit ta yahwa, wa kutu zedekia ahal towo melik le yahwa wa ourshelim. ¹¹ Zedekia kan indu wahid wa ishirin sena laman huwa selim sulta, huwo hokum hidashar sena fi ourshelim. ¹² Huwo kan amulu hajat batal fi ena ta yahwa Rabana towo, huwo kan ma nenzil nefsa towo gidam armiya al nebi, al kan bi wonusu min kasma ta yahwa. ¹³ Zedekia Kaman kan merid did melik nubukadnasir, al kan kutu huwo halifu bi kun tabi huwa be Rabana. Lakin zedekia kan dowi ras towo, wa gelba bi towo ashan bi agilibu did yahwa, Rabana ta Israel. ¹⁴ Ziyada le de, kulu roasa ta kahana wa shaab kan ma umana kalis, wa umon kan tabe momarasat al batal ta bilad dak, umon ajinu lousu beit ta yahwa al huwa kan karizu fi orshelim. ¹⁵ Yahwa, Rabana ta judud tomon, kan rasulu kalam le umon rusul tani wara tani, ashan huwo indu hanan le shaab bi towo wa le mahal al huwo bigeni. ¹⁶ Lakin umon kan kutu rusul fi tajriba, alisu lkalamat towo, wa higiru anbiya towo lahadi zalan ta yahwa kan gum jidu did shaab bitowo, hata kan mafi mosaad le kalam de. ¹⁷ Bekida Rabana kan jibu le umon melik ta kaldaniin, al kan katulu shabab tomon ma seif dakil maabad, wa kan ma indu rahma le shabab wa banat al azra, nas kubar, abu shaar abiyad. Rabana kan wodi umon kulu fi ida towo. ¹⁸ Kulu afasat al fi beit ta Rabana, kebir wa suker, kazaen al fi ta rabana, wa kazaen ta melik mata kadat towo shilu kulu le Bebel. ¹⁹ Humon kan haragu beit ta Rabana, kasuru sur ta ourshelim, haragu kulu kusur amarat, wa karabu kulu hajat al gali al fi fogo. ²⁰ Melik kan shilu ma huwo nas al nofudu min seif. Umon kan biga abid le huwo wa le awolad bitowo lahadi zaman ta mamlaka ta faris. ²¹ Kalam de kan hasil ashan bi hagigu kalam ta yahwa bewasit be lisan ta armiya, lahadi beled bija itmataa be raha ta subut, beled bi hafizu yom sebit fi kulu zaman ta karab al bi kun sebein sena. ²² Hasa fi sana al awel ta kursh, melik ta faris, ashan kalam ta yahwa min kasma ta armiya bi amulu nefsa, yahwa kan harik gelba roho ta kursh, melik ta faris ashan bi wodi eilan fi kulu mahalat ta mamlaka towo, wa kan katibu gali, ²³ De yau haja al kursh melik taa faris kelim, Yahwa Rabana ta sama, wodi le ana kulu ma melik ta arid. Huwo amiru ana ashan abinu le huwo beit fi ourshelim, al fi yahuza. Ayi zol min nus bitakum al min shaab ta Rabana keli ruwa, keli yahwa Rabana takum kun ma intum.