¹ Yushia amulu Aid al Fiseh fi Urshelim, wa umon daba kurfan ta Fiseh fi yom Arbatashar ta shahar al awel. ² Huwo kutu kahana ayi zol fi mahal tuo, wa shaja umon le kidima ta bet ta Yahwah. ³ Huwo kelim le Lawin al kan bi alimu Israel, al kasisun umon le Yahwah, ''Kutu takum tabut de fi bet al Siliman jena ta Dauod, melik ta Israel abinu. Matkum arfa fi kitfa takum tani mara. Hasa kede itakum abudu Yahwah Ilah takum, wa amulu takum kidima le shaab tuo Israel. ⁴ nazimu takum badun takum be hasab asma ta judud takum, tabi takum tujihat ta Dauod melik ta Israel, al muktub wa delin ta Siliman jena. ⁵ Wegiftakum fi mahal al mukadas, shilu takum wazaif takum be aksam takum be hasab abuab ta judud ta akwana takum, wa mahalat takum be aksam takum hasab biut ta judud takum Lawin. ⁶ Daba takum kurfan ta Aid aln Fiseh, kadisu nefus takum, jahizu takum kurfan le akuwana takum, ashan bi amulu be hasab kalam ta Yahwah al kan wedi be wasat ta Mosa.'' ⁷ Yushia wedi talata alf kurufan, ganamayat le zebiha ta Aid al Fiseh le kulu shaab al kan fi, kaman huwo wedi talata alf ras ta bagara, de kulu kan min mumtalakat ta melik. ⁸ Ruwasa tuo wedi tabaruaat le shaab, kahana, wa Lawin. Hilkiah , Zecheriah, wa Yaheil ruwasa ta bet ta Allah, wedi le kahana 2,600 zebiha ta Fiseh wa tultumiya ras bagara. ⁹ Kaman Konaniah, Shemiah, wa Nasanaeil, akuwana tuo, wa Hashabiah, Yaeil, wa Yuzabad, rais ta Lawin, wedi kamsa alf zebiha ta Aid al Fiseh wa kumsumiya ras bagara le Lawin. ¹⁰ Yala kidima kan jahizu, wa kahana wegif fi mahalat tumon, ma Lawin be aksam tumon, be hasab awamir ta melik. ¹¹ Umon daba kurfan ta Fiseh, wa kahana rushu dum al umon shilu min Lawin de, wa Lawin bi tala jilid ta kurfan de. ¹² Umon tala muhragat, ashan umon bi gesimu be hasab biut ta judud ta shaab, ashan bi gedimu le Yahwah, ze ma katibu fi kitab ta Mosa. Umon amulu nefsa haja be bagarat. ¹³ Umon aragu kurfan ta Fiseh be nar be hasab tujihat. Le zabaeih al mukasa, umon rakabu fi kujurun, wa marajil wa sahaf, wa umon arfa guwam le shaab kulu. ¹⁴ Fi nihaya umon jahuzu zabaeih le badun tumon wa le kahana, lanu kahan iyal ta Haron, kan mushkulin be gedimu muhragat wa zabaeih, wa shuhum lahadi bilel ja, yala Lawin jahizu zabaeih le badun tumon wa le kahana, iyal ta Haron. ¹⁵ Murenimin, iyal ta Asaf, kan fi mahal tumon, ze kan Dauod wejihu, Asaf, Himan, wa Yadusun rai ta melik, wa gufara kan fi ayi bab. Umon ma muhtaj ashan bi sibu mahalat tumon ashan akuwana tumon Lawin jahizu le umon. ¹⁶ Fi zaman dak kidim ta Yahwah kulu kan amulu le ihtifal ta Aid al Fiseh wa tegdim ta muhragat fi mazbah ta Yahwah, ze melik Yushiah wedi awamir. ¹⁷ Shaab Israel al kan fi amulu Al Fiseh fi zaman dak, ma Aid al Fetir fi le saba yom. ¹⁸ Ihtifal ta Aid al Fiseh ze de ma amulu fi Israel min yamat ta nebi Samuel, wele ayi melik min muluk ta Israel ihtefil ze Yushiah amulu de, sawa ma kahana, wa Lawin wa kulu shaab ta Yahuza wa Israel al kan fi, wa sukan ta Urshelim. ¹⁹ Aid al Fiseh de kan amulu fi sena nimra tamantashar min hukum ta Yushiah. ²⁰ Baat kulu hajat de, baat ma Yushiah nazimo haikal fi nizam, Nako melik ta Masir, ja ashan shakila did Karkamish fi Nahar al Farat, wa Yushiah ruwa ashan shkila did huwo. ²¹ Lakin Nako rsulu sufara le huwo bi kelim, ''Ana bi amulu ma inta shunu, Ya melik ta Yahuza? Ana ma bi ja did inta aleela, lakin did bet al ana bi ruwa shakila ma umon. Allah wedi le ana awamir kede ana istajil, ashan kida kede inta rija min mashakil ma Allah, al fi ma ana, wele huwo bi demiro inta.'' ²² Yushiah aba rija min huwo. Huwo kutu nfsa tuo ashan bi shakilan ma huwo. Huwo ma asuma le kelimat ta Neko al tala min kasma ta Allah; yala huwo ruwa ashan bi shakila fi wadi Majdo. ²³ Nas ta la haraba drubu melik Yushiah, Yala melik kelim le kadamin tuo, ''Shilu takum ana bait, lanu awugu ana kaab.'' ²⁴ Yala kadamin tuo shilu huwo bara, wa kutu huwo fi arabiya tuo al tani. Umon shilu huwo fi Urshelim, mahal al huwo ruwa mutu fugu. Dufunu huwo fi magabir ta judud tuo. Yahuza wa Urshelim kulu kure huwo. ²⁵ Armiya kure Yushiah; kulu murenimin al banat wa walad kure an Yushiah lahadi yom ta aleela. Gunat de bi adda le Israel; katibu umon fi gunat ta kure. ²⁶ Wa bagi hajat ta Yushiah, wa amail tuo al kues muktub fi namos ta Yahwah- ²⁷ wa amail tuo, min didaya lke nihaya, muktub fi kitab ta muluk ta Yahuza wa Israel.