¹ yala Suliman bada abinu haikal le Yahweh .de hasil fi 480 sena baad shaap ta Israel ja min ardi Masir ,fi sena al nimra arba ta sulta ta Suliman fok Israel , fi sena ta ziv, al huwo shahar altani . ² al haikal al melik suliman bana le Yahweh kan sitiin dhuraan tool , isriin dhuraan waase ,wa teletiin dhuraan fok ³ wa fi gidam ta haikal gurfa al asas tul two isriin isawi urud ta haikal ,wa ashara dhuraan fi baab ta dukul. ⁴ le bed huwo amulu shubabik min zawiya al bi kutum deiyiik min bara lakin wase min juwa, ⁵ did al heta ta gurfa dewan al asasi huwo bana guraf haulu , hawili kulu gurfa albara wa gurfa al juwa . Huwo bana guraaf kulu hawili .al amara al tehid kamsa dhuraan wase ,al fi nus kan sita dhuraan wase ,wa nimra talata kan saba dhuraan wase . ⁶ be bara ta heta ta haikal kulu haulu bana hamut ashan ma bikun ma heta . ⁷ bed kan banau ma hujar ,kan mafi shakus ,fas ,wala aiya hadid alasumau fi bed wokit gi abinu. ⁸ fi tijah junub ta haikal kan fi madkal le tehed , wa wahid ruah fok ma silim le mustawa fi nus , wa min nus le mustawa al nimra talata ⁹ biga suliman bana al Haikal wa kalasu ; huwo kati al bed ma umdan wa kashap cedar. ¹⁰ Huwo bana al guraaf al fi adtraf gusaat dewaan al dakil ta Haikal ,fi kulu tija kamsa dhuraan ; humon kulu limu sawa le bed ma kasap ta cedar. ¹¹ Kelima ta Yahweh ja le Suliman ,gali , ¹² ashan kalam Haikal de al ita gi abinu ,iza kan ita douru le hasap ganun tai wa amulu adala ,wa hafisu wasaya tai wa douru fi huwo , yala ana bi asbid waad tai ma ita al ana amulu ma Daud Abu taki. ¹³ Ana bi ish fi wasad ta Israel wa ana mabi sibu humon .” ¹⁴ yala Suliman abinu bed wa kalasu . ¹⁵ yala huwo abinu al heiat al dakil ta bed ma borti ta kashap cedar min tehat lahaidi fi telgim ,huwo kaati humon min juwa ma kashaap ,wa huwo kati al wata ta bed ma loha shejera cypress. ¹⁶ Huwo bana isriin Dhuraan lahaidi fok bed ma borti ta kashap cedar min tehed lahaidi fok telgim .Huwo bana gurfa de bikun aldakil ta mahal mukadas kaalis. ¹⁷ Al gurfa al asas ,de yau mahal al mukadas de fi gidam ta mahal al mukadas al kaalis kan huwo arbein dhuraan fi tul. ¹⁸ kan fi kashap cedar fi dakil bed ,nahitu fi shikil zuhur al fateh . kulu kan loho cedar fi juwa mafi hajer gi ainu fi dakil . ¹⁹ Suliman jahizu al gurfa al dakili ashan bi kutu fogo Tabut alahat ta Yahweh ²⁰ al gurfa al dakil de isriin dhuraan ,isriin dhuraan fi wase , wa isriin dhuraan fok .Suliman kati al heta ma dahab wa kati al masbah ma loho cedar . ²¹ Suliman kati dakil Hailkal ma dahab ,wa huwo kutu genzir ta dahab fi gidam gurfa al dakil ²² huwo kati kulu dakil al Haikal ma dahap lahaidi haikal kulu intaha .wa huwo Kaman kati al masbah al tabi le dakil gurfa ma dahab . ²³ Suliman sala ethnen Malaikat min kasap shejera zaitun ,kulu wahid ashara dhuraan fi gurfa al dakil. ²⁴ wahid jina ta malaika al awel kan kamsa dhuraan towil wa jina altani Kaman kamsa dhuraan towil .yala min kashum jina al tani le tani kan masafa ta ashara dhuraan. ²⁵ kaman al malaika al tani de Kaman indu jina ta ashara dhuraan .kulu al malaikat de nefsu sawa fi shikil. ²⁶ al tul ta wahid malaika kan ashara dhuraan wa malaika al tani Kaman nefsu . ²⁷ Suliman kutu al Malaikat del fi gurfa al dakili .al jinahat ta malaikat del kulu fata bara ashan al jina ta wahid bi lemesu tani al heta ta jina ta malaika tani bi lemesu heta al tani .jinahat tomon gi lemesu baad fi wasat ta mahal al mukadas al kaalis. ²⁸ Suliman dugu malaikat de ma dahap. ²⁹ Huwo nahitu kulu heta ta bed haulu ma sura ta malaikat ,shejera bala ,wa zuhur moftu ,fi bara ta guraaf al dakil. ³⁰ Suliman dugu tehed ta bed ma dahap ,fi kulu bara wa guraaf al dakil ³¹ Suliman amulu abuab min kashap zaitun le madkal ta gurfa al dakli .wa fok baab indu kamsa aksam. ³² yala huwo amulu ethnen abuab min kashap al zeitun ,wa huwo nahitu sura malaika chorobim ,shejera bala ,wa zuhur wa dugu ma dahap huwo rushu aldahap fi chorobim wa shejera bala . ³³ fi teriga de , Suliman Kaman amulu fi madkal ta Haikal fi baab fok kashaap zeitun indu arba aksam. ³⁴ wa ethnen kashap cypress .al ethnen baab fi wahid wa Kaman ethnen baab ma baad. ³⁵ huwo nahitu fogo shura malaika ,shejera bala ,wa zuhur wa Kaman huwo dugu dahap fi sura de . ³⁶ Huwo bana fi dakil ma talata kat al ta hajer al gatau wa kat ta hamud kashap cedar. ³⁷ Al asas ta bed ta Yahweh bana fi sena al nimra arba ,fi shahar ta aviv. ³⁸ fi sena hidashar , fi shahar ta Tor ,al huwo tamaniya shahar ,al bed kalasu fi kulu tijah wa ma kulu muasafat. Suliman shilu saba sena ashan abinu alhikal .