¹ Wa kaman fi kalam ta tabaroat le momenen, ze ma ana weri le knayes fi Galatiya, kaman amulu takum zede. ² Fi awel yom ta isbu, kulu zol min itakum kede shelu haja wa kutu fok hasab guwa ta tuo. Amulo takum zede ashan ma be kun fi tabaroat kan ana ja. ³ Kan ana wosulu,zol al itakum be ikhtar, ana be rasulu huwo ma juwab ashan be wode attaya takum le Orshalime. ⁴ Kan huwo munaseb le ana ashan be ruwa, humon be ruwa maa ana. ⁵ Laken ana be ja le itakum iza ana mururu be Mecdoniya. Leano fi sika tai ana be wosulo fugu. ⁶ Ihtemal ana be geni ma itakum aw kalaso shetta ma itakum, ashan itakum be saidu ana fi rehla tai, le ay mahal ana der ruwa. ⁷ Ana ma azo ayeno itakum hasa fi zaman beset, leano neya tay azo geni ma itakum, iza Rabana rudu. ⁸ Laken ana be geni fi Efsus lahadi eid al Khamsen, ⁹ ashan Rabana fata bab keber le ana, wa fi mugawemen keter. ¹⁰ Kan Temosaws ja le itakum, ayno takum kede huwo ma geni ma kafu fi nus takum, leano huwo gi amulo shokol ta Rabana ze ana gi amulo. ¹¹ Kede mafi zol aliso huwo. Saido takum huwo ashan huwo be reja le ana be salam. Ashan ana gi istena ja ta tuo ma bagi akwana. ¹² Fi kalam ta aku tann Abullos, ana shejao huwo shede ashan be ruwa ayno itakum sawa ma akwana. Laken huwo ma indo neya ashan be ruwa hasa. Laken huwo be ja kan huwo lego fursa al munasib. ¹³ Ena takum kede kun fadi, wogef takum guwi fi iman, geni takum ze rujal, geni takum gawe. ¹⁴ Kulu haja al itakum be amulo kede kun be muhaba. ¹⁵ Itakum be arufu beat ta Stefanas, humon yao awel nas al amen fi Akhaiya, wa humon kutut nufus tomon fi khedma ta mumenen. Ana gi asalu itakum, ya akwaani, ¹⁶ asuma takum le humon wa le kulu zol al gi saido fi shokol ma humon wa ana. ¹⁷ Ana tala murah shede zaman Stefanas, Fertonatos, wa Akhaikas ja.Humon saidu fi zaman al itakum mafi. ¹⁸ Humon shejao ruhu tai wa takum. Ashan keda gaderu takum shekel nas al zada. ¹⁹ Kanaes ta Asiya be selemu itakum. Akela ma Preskela be selemu itakum ma kenesa al fi beat tuomon. Akwana kulu be selemu itakum. ²⁰ Selemu badon takum be gubla mukadas. ^{21 22 23 24} Ana Bulus yao katebu resala de ma eden tai. Kan fi zol al ma gi hebu Rabana, kede huwo geni molun. Rabana taal! Neima ta Rabana Yesua ma itakum. ²⁴ Keli muhaba geni ma itakum kulu fi al Massih Yesu.