¹ De yau kan tegsimat le huras ta bab min al korahitiin, mashelemia weled ta kore, min usura ta asap ² Mashelemia ka indu awolad; zekariya al bikir, jadiael tani bikir, zebadia tallit bikir, jathaniel rabi bikir, ³ Elam kamis bikir, jehohanan nimira sita, eliehonai nimira saba. ⁴ Obed–edom kan indu awolad; shemaiah al bikir, jehozabad al tani, joah nimira talata, wa sakar nimira arba, nathanel nimira kamsa, ⁵ Ammiel sita, issakar saba, wa peullethai tamania, leanu Rabuna kan bariku obed-edom. ⁶ Le shemaia weled bitowo, kan weledu awolad al kan hokum ashaer tomon, umon kan rujal al indu gudra azi. ⁷ Awolad ta shemaia kan othni, Raphael, obed, wa elzabad. Agriba bitowo elihu wa semakia kan Kaman indum gudrat ketir. ⁸ Del kulu kan ahfad ta obed-edom. Umon wa awolad tomon, wa adriba bitowo kan rujal al kidma ta maabad. Umon kan etnen wa sitin al indu sila garaba ma oned-edom. ⁹ Meshelemia kan induu awolad wa usar, rujal gadrin, umon kulu kan tamantasahar. ¹⁰ Hosa, al ja min usura ta merari, kan indu awolad; shimri al kaed (ragam huwo ma kan bikir abu bitowo kan kutu huwo kaed), ¹¹ Hikia al tani, tabalia nimira talata, zecharia nimira arba, kulu awolad wa akwana ta hosa kan talatashar. ¹² Tegsimat ta huras ta bab del kan gi amulu hasab kiyadat tomon, umon kan indu wajibat tomon, ze usura tomon, ashan bi akdim fi bet ta yahwa. ¹³ Umon kan jadau gura, kulu shab wa ajus, hasab ashaer tomon, le kulu bab. ¹⁴ Laman kan jadau gura le bab ta sherig, kan waga le shelemia. Umon Kaman jadau gura le jena towo zacharia mushtashar al hakim, wa gura bitowo waga le bab ta shamal. ¹⁵ Le obed-edom kan wodi le huwo mosoulia ta bab al fi junub, wa awolad towo wodi le umon mosouliya ta makazin. ¹⁶ Suppin wa hosa kan wodi le umon mosuliya ta bab al fi garib ma bab ta shalleket, fi sharia al fok. Al huras kan geribin le baad shedid. ¹⁷ Fi sherik kan fi sita lawiin, fi shamal arba fi yom, fi junub arba fi yom, wa fo makazin etnen. ¹⁸ Fi amud al fi gerib kan fi arba wogifu fi sika wa etnen fi amud. ¹⁹ Del yau tagsimat ta huras ta bab al kan min usur ta kora wa merari. ²⁰ Min lawiin, ahija, kan mosoul ta maliya ta beit ta Rabuna, wa le kazaen ta hajat ta yahwa. ²¹ Usur ta ladan, al umon kan min usur ta gershonitiin bi wasit ladan, al umon kan ruasa ta aelat at tabi le ladan al min gerhonitiin, kan jehieli. ²² Wa awolad ta jehieli; zetham wa joel aku bitowo, umon kan mosoul le kazaen ta beit ta yahwa. ²³ Min ashaer ta amram, ashaer ta izhar, ashaer ta hebron, wa ashaer ta uzziel. ²⁴ Shubael, usra ta gershon weled ta musa, kan moragib ta kazaen. ²⁵ Ahal bitowo min ashir ta eliezer kan weled towo Rehabiah, weled ta rehabia jeshaia, weled ta jeshaia joram, weled ta joram zikri, wa weled ta zikri shelomit. ²⁶ Shelomit wa ahal kan mosoulin le kulu kazaen al bi shilu hajat ta yahwa, al Daud al melik, ruasa ta aelat, kadat ta aalaf, wa kadat ta miyat, wa kadat ta jeish al kas. ²⁷ humon kan hafizu hajat al umon nyakamu fi hurubat, ashan jemilu ma uwo beit ta yahwa. ²⁸ humon Kaman kan mosoulin le kulu hajat al kutu kas le yahwa biwasit nebi Samuel, soul weled ta kish, abner weled ta ner, wa joab weled ta zeruia, kulu hajat al kan kas le yahwa kan tehet hirasa ta shelomit wa ahal bitowo. ²⁹ Le usrab ta izhar, kenania wa awolad bitowo kan mosoul le shun al medenia ta Israel, umon kan dubat wa gudaa. ³⁰ Le usra ta hebron, hasabia wa akwana towo,1700 rujal kadrin, umon kan mosoul le shokol ta yahwa wa shokol ta melik. Umon kan fi bab al fi jiha ta garibe le urdon. ³¹ Ze le hebroniin, jaria kan reis ta ashacer, hasab seisila ta sejelat ta wilada fi arbatasar sena min hokum ta daud, umon kan fetisu sejelat wa ligo fi nus tomon rujal al indu kudrat azim fi jazer ta gilad. ³² Jeriah kan indu 2,700 ahal, al kan ruasa ta aelat al kadirin. Daud ka kutu umon uzara am ta gabael ta raubin wa jad, Kaman ma nus geliba ta manasi, le ai mushkila al bikus rabuna, wa le shun ta melik.