¹ Saɗɗa Yesu tlii viin Ladi Yahudawa a tu murwon ɗaŋ taas wos nə pwaaghǝni. ² She zarsǝ gyagon tǝ nda te yelghǝn mel mel ko wo fuɗ mureshii dzaŋ wolngi ɗaŋ tǝ tu tǝ vyaar tǝ ɗa. ³ Yesu wul mures ɗaŋ taas wos nǝ pwaaghǝnii tu, "Shishi aa dlǝǝrni a dlǝk zarsǝn." ⁴ She a wul zarsǝ tu a ndara tǝ fini ngǝtn mbuni dzaŋ Wolghia ko andara tǝ fini ngǝtn nge ngǝtn; tǝ fuɗnia ko tǝ ɗuni?"Bet tǝ gii tǝ mwaali saɗ. ⁵ A ta yaal yelshi tǝ raa wos ta malari tǝ raaghǝ jii tu tǝ sǝǝ tǝ kǝǝm hŋ, a wul mures tu, "Taa taas waai." Mures ɗaŋ a taa taas woshii she taashes naai ndarara ⁶ .Farisawa tǝ nywaalii ɗi kyaaɗ tǝ tlii gha zarsǝ ghǝ Hiridus, tǝ nda naaɗkǝn lǝɓ ɗi ɗaŋ ta fi tǝ ɗu Yesui tǝ mǝshii. ⁷ She Yesu tǝ mǝǝri dǝn wos, tǝ tlii ɓill dǝllǝ zha, zarsǝ monda tǝ laaɓ tǝ ɗi yaatl Galili tǝ Yahudiya. ⁸ Ɗa yaatl Urshalimai a tlii tǝ ken tǝ Urdun tǝ gya Taya tǝ Sidon, ɗan tǝ wum gya ngǝtn yo ɗŋ a taya fi she tǝ jwaam shi ɗi mel ɓastǝ. ⁹ A fuu mǝǝri dǝn wos tǝ lǝǝr tǝ zhirgi zha mǝn ɗi durghǝ tu zarsǝ taa gǝǝɗii, kaɗ tǝ butuk tii hŋ. ¹⁰ A fuɗ zarsǝ monda, nǝ gii ko nuu ɗaŋ a ta byaalt tǝ hŋ taya fi mberi mberi tǝ tǝǝn tǝ tǝ fuɗi. ¹¹ Ko a kili gyo ɗaŋ mǝndǝŋsǝ caa yel tǝ caa dlaar vi tlyaa tlyaa tu, ''Kinǝ ŋaaghǝ Cogn." ¹² A caashi yir tu bak fuun zarsǝ hŋ. ¹³ A tai dull wuur, she a cim gya gyo ɗaŋ caa suu tǝ tlǝn tu tǝ, she tǝ ta tlǝ tu tǝ. ¹⁴ A ta bwaa zarsǝ dluɓ tliiti mbǝtlǝm (gyagyo ɗaŋ caa cimshi tu mǝǝri dǝn wos).Ɗaŋ ta tsǝtn cimshi, tǝ shinshi tǝ ndǝr tǝ ŋalar vii wos; ¹⁵ a vǝr shi vartǝ nghǝ nyolarghǝn mǝnndǝŋsǝ. ¹⁶ She ata bwaa zarsǝ dzuɓ tliiti mbǝtlǝm: Siman, gyo ɗaŋ a vǝr tǝ sǝm tu Bitrus; ¹⁷ Yakubu kuni Zabadi tǝ Yahaya yeskǝ Yakubu, gyagyo ɗaŋ a ca shi sǝm tu Buwanaris, des tu mǝǝri falaŋ: ¹⁸ tǝ Andarawus, Filibus,Bartamawus,Matta, Toma, Yakubu kuni Alfa, Taddawus, Saminu mǝn Kanariye ¹⁹ ,tǝ Yahuda Iskaryoti,(gyo ɗaŋ wo vǝr tii. ²⁰ A kili yo ɗaŋ a ndai dǝn, she zarsǝ tǝ jwaam shi tǝ maanda tǝ yughǝi,nǝ duryo tu a ɗagshi cighǝn ngǝtn ngǝ cighǝn. ²¹ Tǝ wumngǝn mǝn ɗaashi tǝ tlii tǝ tlǝn ngaɓ tii; tǝ wul tu," wui cigha ɓitalghǝn wos hŋ." ²² 'Mǝn dlyaaɗkǝn ɗaŋ tǝ dlamɗi hal Urshelima tǝ wul tu, "Wui! Ba'elzabul ghǝn a nda tǝ gha dli,a vǝrtǝ vartǝ ghǝn ca nyolar mǝnndǝŋsǝ ²³ Yesu cimshi ɗi ɓastǝ a wulshi vi daŋ gya gini. "Wur ghǝnnda shetan wo nyolar shetane? ²⁴ Ǝŋ guŋndǝ ya ɓǝǝlii dǝni mbǝtlǝm wo dlǝǝr hŋ. ²⁵ Ǝŋ dǝn ya ɓǝǝlii mbǝtlǝm, ca fi maandǝ tǝ gamas dǝni gii wo dlǝǝr hŋ. ²⁶ Ǝŋ Shetan ya shishi fi maandǝ tǝ gamashi, ɗaŋ hal guŋndu wos ɓǝǝlii, ɗaŋ hal wo ɗya kǝǝm dlǝǝr hŋ, to guŋndu wos maan ɓanngǝn ngǝnndi. ²⁷ Beɗ tǝ gi gon wo ɗyaa nda dǝn murghǝ tlyaaghǝn tu ca cini mǝǝr hŋ, she ya naɗ murghǝ tlyaaghǝneshii annda wo ɗya nyomtǝ ngǝtn mǝn ɗa dǝnes. ²⁸ Jom jomi mya fuu ki, ɓuruk wo dlaa loŋ sǝ ŋaa zaar mǝnii, ko yaan ɗan tu kaa malar ni sǝm ngǝ Cogn ɗaŋ ka mbuɗii, ²⁹ beɗ tǝ gii, ɓuruk gyo ɗaŋ ya girtǝ ya malar sǝm ngǝ zhipti var loŋsǝ wos ta dlaa hŋ hal nǝghǝ ndok ndoki." ³⁰ Yesu wul cig durghǝ yo tu tǝ ta wul tu "Citǝ mǝnndǝŋsǝ." ³¹ A kili yo ɗaŋ naashi tǝ gya yeshi tǝ tlǝn dlǝǝr ɓidlǝm, tǝ shin tǝ cim tǝ tǝ man. ³² Gutuli zarsǝ taa ta tsǝtn tǝ ngirǝŋ tii, she tǝ wul tǝ tu gya naashi tǝ gya yeshi ci ɓidlǝm, tǝ cig ci ɓaskǝ ɓuɓkǝni." ³³ A sushiɗa tu, "Nǝ gya nuu ghǝn cinǝ gya naagǝn tǝ gya yesato?" ³⁴ A su yir yaal a dlei waasǝŋ ɗaŋ taa tsǝtn tǝ ngirǝŋ tii a wul tu,"Yelǝn naagǝn, tǝ gya yeasatn yaŋshi ghǝn cighǝni! ³⁵ Kaɓ gyo ɗaŋ ya fi ngǝtn yo ɗaŋ ya fi ngǝtn yo ɗaŋ Cogn ca suu , yaan cinǝ yesatn, tǝ waatsatn, tǝ naagǝtn.