3

¹ Моисей ыж возьмалляз аслаз вармаезлэсь Иофорлэсь, медиамысь священниклэсь. Одӥгпол со улляз ыжъёссэ кыдёке пустыняе но Инмарлэн Хорив гурезез доры лыктӥз.

² Куке Моисей гурузьын вал, солы ӝуась тёрн куакысь Кузё-Инмарлэн ангелэз лыктӥз. Моисей учкиз ӝуась тёрн куак шоры, кудӥз тылын ӝуаса уг быр вал.

³ Моисей малпаз: " Матэгес лыкто но учко та паймымон учырез! Малы тёрн куак ӝуаса уг быр?"

⁴ Кузё-Инмар адӟиз, солэсь учкыны лыктэмзэ, но шуиз солы: " Моисей! Моисей!" Со шуиз: "Мон татын".

⁵ Инмар шуиз: " Татчы матэ эн лыкты, кыль пыдкуктэ пыдъёсысьтыд, уго та инты, кудӥз вылын тон сылӥськод, - святой музъем".

⁶ Но шуиз солы: "Мон тынад атаедлэн Инмарез, Авраамлэн Инмарез, Исааклэн Инмарез но Иаковлэн Инмарез". Моисей пытсаз аслысьтыз ымнырзэ, уго кышка вал Инмар шоры учкыны.

⁷ Кузё-Инмар шуиз: " Мон адӟи Египетын курадӟемзэ Аслам калыкелэсь но кылӥ надзирательёслэсь чидамтэзылэсь соослэсь кесяськемзэс. Мон тодӥсько калыкелэсь куректэмзэ

⁸ но мынӥсько мозмытыны соосты египтянъёс киулысь. Но потто соосты ӟеч но паськыт музъем вылэ, кытын уло Ханаанлэн, Хеттлэн, Аморейлэн, Ферезейлэн, Евейлэн но Иевусейлэн выжыоссы, отын бызё йӧл но чечы.

⁹ Мон кылӥ, кызьы бӧрдо Мынам калыкъёсы, израильтянъёс. Мон адӟи кыӵе вӧсь каро соосты Египетын улӥсьёс.

¹⁰ Озьыен, Мон келясько тонэ фараон доры. Потты Египетысь Мынысьтым калыкме, Израиль пиосты".

¹¹ Моисей шуиз Инмарлы: " Фараон доры мыныны но поттыны Египетысь Израильлэсь пиоссэ, кин мон сыӵе?"

¹² Инмар шуиз: " Мон тонэныд луо. Но тани тыныд, Мон тонэ келяй шуыса пус: куке тон поттод Египетысь калыкез, тӥ Инмарлы йыбырттоды та интыын, та гурезь вылын ик".

¹³ Моисей шуиз Инмарлы: " Мон мынӥ ке израиль калык доры но шуо соослы: " Инмар, Кудӥзлы йыбырттылӥзы тӥляд песьатайёсты, келяз монэ тӥ доры", нош соос юалозы: " Кызьы Солэн нимыз?" - мар мыным верано соослы?"

¹⁴ Инмар шуиз Моисейлы: " Мон Со, Кин Мон Вань. Вера Израиль пиослы, тонэ келяз шуыса соос доры Со, Кин нимаське " Мон Вань".

¹⁵ Озьы ик Инмар шуиз Моисейлы: " Тон израильтянъёслы вераны кулэ: " Кузё-Инмар, тӥляд атайёстылэн Инмарез, Авраамлэн Инмарез, Исааклэн Инмарез но Иаковлэн Инмарез келяз монэ тӥ доры. Та Мынам нимы пыраклы, но Мон сярысь тодэ ваён выжыысь выжые".

¹⁶ Мын Египетэ но люка Израильлэсь старейшинаоссэ но вера соослы: " Кузё-Инмар, тӥляд атайёстылэн Инмарзы, Авраамлэн Инмарез, Исааклэн Инмарез но Иаковлэн Инмарез, лыктӥз мон доры но шуиз: " Мон адӟи, кызьы Египет калык тӥледды зибыса возе".

¹⁷ Но шуиз: " Мон потто тӥледды Египет калыкъёслэн зӥбет улысьтызы хананейъёслэн, хеттейъёслэн, аморрейъёслэн, ферезейъёслэн, евейёъслэн но иевусейъёслэн музъем вылазы, кытын бызе йӧл но чёчы".

¹⁸ Соос кылзозы тынысьтыд верамдэ. Тон но Израиль старейшинаос мынэ Египетысь фараон доры но вералэ солы: " Еврейёслэн Кузё-Инмарзы, кудӥзлы ми йыбырттӥськом, быръйиз милемды. Озьыен, лэзь милемды пустыняе куинь нунал пыдын ортчён кемозь. Ми асьмелэн Кузё-Инмармылы жертва сётом".

¹⁹ Нош Мон тодӥсько, Египетлэн фараонэз лэзёз тӥледды отчы мыныны соку гинэ, куке солы нокытчы пырыны луоз.

²⁰ Соку Мон возьмато Аслысьтым кужымме. Египет вылэ бырон келяло Мынам паймоно ужъёсыным. Со бере со лэзёз тӥледды кошкыны.

²¹ Куке ваньмыз со быдэсмоз, Египетысь калыкъёслэн сюлмазы еврейёсты гажан сёто, тӥ Египетысь тырттэм киын уд кошкоды, :

²² котькыӵе еврей кышномурт Египетысь бускелезлэсь куроз, мар солы кулэ. Но Египетысь улӥсьёс сётозы тӥлед ваньзэ, марзы вань: азвесьлэсь но зарнилэсь арбериоссэс но дӥськутъёёссэс. Тӥ дӥсялоды асьтэлэсь пиналъёстэс, но озьы талалоды Египетын улӥсьёслэсь ваньзэ, марзы соослэн вань".