1

¹ Тани Израиль пиослэн нимъёссы, кудъёсыз Иаков атаенызы, котькудӥз аслаз семьяеныз пыризы Египетэ:

² Рувим, Симеон, Левий но Иуда,

³ Иссахар, Завулон но Вениамин,

⁴ Дан но Неффалим, Гад но Асир.

⁵ Ваньмыз Иаковлэсь вордӥськем выжыос сизьымдон адями вал. Нош Иосиф Египетын вал ини.

⁶ Иосиф, но ваньмыз солэн братъёсыз но соин улэмъёс кулӥзы.

⁷ Нош Израильлэн пиналъёсыз йылӥзы но ватсаськизы, будӥзы но туж юнмазы, но тырмиз соосын со музъем.

⁸ Египетын выль фараон кузёяськиз, со уг тоды вал Иосифез,

⁹ но шуиз фараон аслаз калыкезлы: " Учкелэ, Израиль калык тросгес но кужмогес асьмелэсь.

¹⁰ Амалтом соосты, медам ни ватсаське, яке, война кутскиз ке, соос огазеяськозы асьмелэн тушмонъёсынымы но ожтӥрлык люкалозы асьме пумитэ но кошкозы та музъем вылысь".

¹¹ Соосты секыт ужъёсын зибон понна, соос вылэ пуктӥзы ужзэс эскерыса учкись кивалтӥсьёсты. Соос израильтянинъёсты кужмысь пуктыны косӥзы фараонлэсь ваньбурзэ возьон Пифом но Раамсес городъёсты.

¹² Ужзэс учкись кивалтӥсьёс секытгес зӥбыны тыршизы ке но Израиль калыкез, соос уката но тросгес ватсаськизы. Но соку Египетын улӥсьёс кышканы кутскизы Израиль пиослэсь.

¹³ Соин ик Египетын улӥсьёс Израиль калыкез тужгес но зол пачкатыса ужатыӥзы,

¹⁴ горд сюйлэсь кирпич лэсьтэменызы, котькыӵе бусыын гырон-кизён, аран но котькыӵе мукет ужъёсты кужмысь косыса быдэсъяменызы, Израиль пиослэн улонзы чидантэм луиз.

¹⁵ Еврейёслэн вал кык акушер кышномуртсы. Соослэн нимъёссы Шифра но Фуа. Фараон шуиз та кышномуртъёслы:

¹⁶ "Куке тӥ юрттоды еврей кышномуртъёслы пинал вайыкузы, вордӥськоз ке пи, тӥ виыны кулэ. Нош ныл ке - мед улоз".

¹⁷ Нош акушер кышномуртъёс кышкало вал Инмарлэсь, но фараонлэсь косэмзэ ӧз быдэсъяльлялэ, пиналъёсты улэпен кельтылӥзы.

¹⁸ Фараон дораз соосты ӧтиз но юаз:" Малы тӥ озьы лэсьтӥськоды? Малы пиналъёсты уд вииське?"

¹⁹ Акушер кышномуртъёс шуизы фараонлы: " Еврей кышномуртъёс Египет кышномуртъёслэсь мукетэсьгес, соос тазаесьгес, соин ик милям лыктэммылэсь азьло ик пинал ваё".

²⁰ Со понна акушер кышномуртъёслы Инмар ӟеч карылӥз, нош Израиль пиос ватсаськылӥзы но кужмояллязы.

²¹ Акушер кышномуртъёс Инмарлэсь кышкамез понна, Со юнматылӥз соослэсь семъяоссэс.

²² Соку фараон аслаз калыкезлы косон сётӥз: " Еврейёслэсь котькыӵе вордӥськем пизэс шуре куштэ, нош нылзэс улэп кельтэ".