1
۱۔وَل سبت آلے ڈیں اِیویں تھیا کہ یسوع اَتے اوندے چیلے کھیتاں وچوں تھی کے ویندے پۓ ہَن اَتے اوندے چیلے کنک دے سِٹے توڑ کے اپنے ہتھاں تے مَل کے کھاون لگے۔
2
۲۔پر تھوڑے جۓ فریسیاں نے آکھیا " تُساں اوہ کم کیوں کریندے او جیکوں سبت دے ڈیں کرنا شریعت دی طرفوں جائز نئیں ؟"
3
۳۔یسوع نے اُنہاں کوُں جواب ڈِتا "کیا تُساں نیئں پڑھیا کہ جیہڑے ویلے داود تے اُنھاں بندیاں کوُں جیہڑے اوندے نال ہَن بُھک لگی تاں اُنہاں نے کیا کیتا۔
4
۴۔اوہ خدا دے گھر گیا تے نذر دی روٹی جیکوں صرف کاہناں کوُں کھاوناں جائز ہائی گھِن کے کھادی اَتے اوندے بندیاں نے وی ایویں ای کیتا۔
5
۵۔وَل اوُں نے اُنہاں کوُں آکھیا "ابنِ آدم سبت دا مالک ہے۔"
6
۶۔ وَل ہک بئے سبت کوُں اوہ عبادت خانے وِچ لوگاں کوُں تعلیم ڈیون گیا۔اَتھاں ہِک بندہ ہا جیندا سجا ہتھ سک گیا ہا۔
7
۷۔ فقیہی تے فریسی بڑے غور نال اوُں کوُ ڈیکھن لگے کے کیا اوہ سبت آلے ڈیں اوُں کوُں چنگا کریندا ہے کہ نیئں تاکہ اوندے خلاف الزام لاون دی وجہ لبھ سگن۔
8
۸۔ پر اوہ جان دا ہا کہ اوہ کیا سوچیندے پئے ہِن اُتے اوُں نے اوُں بندے کوُ جیندا ہتھ سُکا ہویا ہا آکھے "اُٹھ اَتے بندیاں دے وِچ کھڑا تھی ونج۔وَل اوہ بندہ سارے بندیاں دے وچ کھڑا تھی گیا۔
9
۹۔ یسوع نے اُنہاں کو آکھیا " میں تہاڈے کولوں پچھدا ہاں کہ کیا سبت آلے ڈیں چنگے کم کرنا جائز ہے یا بُرے کم کرنا کئیں دی جان کوں بچاونا یا کیئں کوُ مارسٹنا؟"۔
10
۱۰۔وَل اُوں نے ساریاں تے نظر کیتی اَتے اُوں بندے کوُں آکھیا اپنا ہتھ وَدھا اُوں نے ایویں ای کیتا اُتے اونداہتھ ٹھیک تھی گیا۔
11
۱۱۔ پَر اوہ غصے نال بھریج گئے اَتے آپس اِچ گالہیں کرن لگے کہ یسُوع نال کیا کروُں۔
12
۱۲۔ اُنہاں ڈیوہاراں اِچ ایویں تھیا کہ اوہ ہک پہاڑ تے دُعا کرن کیتے گیا۔اُوں نے خدا تھوں دُعا کرن اِچ ساری رات کڈھ چھوڑی۔
13
۱۳۔جیہڑے ویلے سوجھلا تھیا تاں اُوں نے اپنے چیلیاں وِچوں گیاراں کوُں چُن گِدا جنہاں کوُں اُوں نے رسول وی آکھیا۔
14
۱۴۔یعنی شمعون جیندا ناں اوُں نے پطرس وی رکھیا ہا اَتے اوُندا بھرا اندریاس تے یعقوب تے یوحنا تے فَلپُّس تے بر تُلمائی۔
15
۱۵۔ تے متّی تے توما تے حلفئی دا پُتر یعقوب تے شمعُون جیہڑا زیلوتیس اکھواندا ہا۔
16
۱۶۔تے یعقوب دا پُتر یہوداہ تے یہوداہ اسکریوتی جیہڑا اوُں کوُ پکڑواون آلا تھیا۔
17
۱۷۔ ۔ اَتے اوہ اُنہاں دے نال اُتر کے برابر آلی جاہ تے کھڑا تھیا اَتے اُوں دے چیلیاں دی وڈی جماعت تے لوگاں دی وڈی بھیڑ اُتھاں ہائی جو سارے یہودیہ تے یروشلیم تے صُور تے صَیدادے بحری کنارے تے اوُندی سُنن تے اپنی بیماریاں تھوں چنگے تھیون کیتے اوُندے کول آئی ہائی۔
18
۱۸۔اَتے جیہڑے ناپاک روحاں تھوں ڈُکھ پاندے ہَن اوہ چنگے کیتے گئے۔
19
۱۹۔ اتے سارے لوگ اوُں کوُ ہتھ لاون دی کوشش کریندے ہَن کیونکہ اوُندے وِچوں ہِک قوت نکلدی تے ساریاں کوُ چنگا کریندی ہائی۔
20
۲۰۔وَل اوُں نے اپنے چیلیاں کوُ ڈیکھ کے آکھیا خوش قسمت ہو تُساں جو غریب ہیوے کیوں جو خدا دی بادشاہی تُہاڈی ہِے ۔
21
۲۱۔خوش قسمت ہو تُساں جو ہُن بُھکے ہیوے کیوں جو رَج ویسو۔خوش قسمت ہو تُساں جو ہُن روندے ہیوےکیوں جو تُساں کھِلسو۔
22
۲۲۔جڈاں ابنِ آدم دے پاروں تُہاڈے نال عداوت رکھیسن اَتے تُہاکوُ کڈھ چھڈیسن تے لعن طعن کریسن تے تُہاڈا ناں بُرا جان کےکٹ سٹیسن تاں تُساں خوش قسمت ہوسو۔
23
۲۳۔اوُں ڈِیں خوش تھیونا اَتے خوشی دے پاروں ٹپّے مارنا ۔ اِیں کیتے کہ ڈیکھو آسمان تے تُہاڈا بہوں وڈا اَجر ہِےکیوں جو اُنہاں دے پیو ڈاڈا نبیاں دے نال وی ایویں ای کریندے ہَن۔
24
۲۴۔پپر افسوس تُہاڈے تے جو بہوں اَمیر ہوکیوں جو تُساں اپنی تسلّی پا چُکے ہو۔
25
۲۵۔ افسوس تُہاڈے تے جو ہُن تُساں رَجے ہیوےکیونکہ بُھکے ہوسو۔ افسوس تُہاڈےتے جو ہُن کھِلدے ہیوے کیونکہ تُساں ماتم کریسوتے روسو ۔
26
۲۶۔افسوس تُہاڈے تے جڈاں سارے لوگ تُہاکوُ بھلا آکھن کیوں جو اُنہاں دے پیو ڈاڈا کوُڑے نبیاں دے نال وی ایویں ہی کریندے ہَن۔
27
۲۷۔پر میں تُہاکوُ جیہڑے سُندے ہو آدھا ہاں کہ اپنے دُشمناں نال محبت رکھو۔ جیہڑے تُہاڈے نال عداوت رکھیندِن اُنہاں دا بھلا کرو۔
28
۲۸۔جیہڑے تُہاڈے تے لعنت کریندِن اُنہاں کیتے برکت منگو۔ جیہڑے تُہادی بےعزتی کریندِن اُنہاں کیتے دُعا کرو۔
29
۲۹۔جو تیڈے ہِک گال تے تھپڑ مارے ڈوجھا وی اُوندے پاسے پھیر ڈے اَتے جو کوئی تیڈا چوغہ گھننا چاہوےاُوں کوُ کُرتا وی گھنن توں منع نہ کر۔
30
۳۰۔جو کوئی تیڈے کولوں منگے اوُں کوُ ڈےاَتے جو کوئی تیڈا مال گھن گھنے اوُں دے کولوں نہ منگ ۔
31
۳۱۔اَتے جیویں تُساں چاہندے ہو کہ لوگ تُہاڈے نال کرن تُساں وی اُنہاں دے نال اوُں وے ہی کرو۔
32
۳۲۔اگر تُساں اپنے محبت رکھن الیاں دے نال ہی محبت رکھیسو تاں تُہاڈا کیا احسان ہِے ؟ کیونکہ گناہ گار وی اپنے محبت رکھن آلیاں نال محبت رکھیندے ہِن۔
33
۳۳۔اَتےاگر تُساں اُنہاں دا ہی بھلا کرو جیہڑے تُہادا بھلا کریندِن تاں تُہاڈا کیا احسان ہِے؟ کیونکہ گناہ گار ویایویں ہی کریندِن۔
34
۳۴۔اَتے اگر تُساں اُنہاں کوُ ہی قرضہ ڈیسو جنہاں کولوں واپس آون دی اُمید ہِے تاں تُہاڈا کیا احسان ہِے؟ گناہ گار وی گناہ گاراں کوُ قرضہ ڈیندے ہِن تاں جو پورا پورا واپس گھن گھنن۔
35
۳۵۔پر تُساں اپنے دُشمناں نال محبت رکھو تے بھلا کرو اَتے بغیر نااُمید تھیئے قرضہ ڈیووتاں تُہاڈا اَجر وڈا تھی سی اَتے تُساں خدا تعالیٰ دے پُتر ٹھہرسو کیونکہ اوہ ناشکراں تے بُریاں تے وی مہربان ہِے۔
36
۳۶۔جیویں تُہاڈا باپ رحیم تُساں وی رَحم دِل تھیوو۔
37
۳۷۔ نکتہ چینی نہ کرو۔ تُہاڈی وی نکتہ چینی نہ کیتی ونجے ۔ مُجرم نہ ٹھہراؤ۔ تُساں وی مُجرم نہ ٹھہرائے ویسو ۔ آزاد کرو تُساں وی آزاد کیتے ویسو۔
38
۳۸۔ ڈِتا کرو۔ تُہاکوُ وی ڈِتا ویسی۔چنگی ترکڑی دَب دَب کے تے ہلا ہلا کر تے بھر کے تُہاڈے پلّے وِچ سٹیسن کیونکہ جیہڑی ترکڑی نال تُساں تُلیندے ہیوے اوُں دے نال ہی تُہاڈے کیتے تولا ویسی۔
39
۳۹۔اَتے اوُں نے اُنہاں کوُ ہِک تمثیل وی سُنائی کہ کیا اندھے کوُ اندھا راہ ڈِکھا سگدے؟ کیا ڈوہیں کھڈے وِچ نہ ڈھِےپوسن؟
40
۴۰۔چیلا اپنے اُستاد توں وڈا نئیں بلکہ ہر ہِک جڈا کامل تھی سی تاں اپنے استاد جیہا تھی سی۔
41
۴۱۔تُوں کیوں اپنے بھرا دی اَکھ دے تیلے کوُ ڈیدھا ہیِں اَتے اپنی اَکھ دے شہتیر تے غور نئیں کریندا ؟
42
۴۲۔اَتے جیہڑے ویلے تائیں توں اپنے اَکھ دے شہتیر کوُ نئیں ڈیدھا تاں اپنے بھرا کوُ کیویں آکھ سگدا ہیئں کہ بھرا آ میں اُوں تیلے کوُ جیہڑا تیڈی اَکھ وِچ ہِے کڈھ ڈیواں؟ اَے فریبی ! پہلے اپنی اَکھ وچوں تاں شہتیر کڈھ ۔ وَل اوُں تیلے کوُ وی جیہڑا تیڈے بھرا دی اَکھ وِچ ہِے چنگی طرح ڈیکھ کے کڈھ سگسیں ۔
43
۴۳۔کیوں جو کوئی ایہو جیا چنگا رُکھ نئیں جیہڑا بُرا پھل گھن آوے اَتے نہ ای کوئی بُرا رُکھ ہِے جیہڑا چنگا پھر گھن آوے۔
44
۴۔ہر ہِک رُکھ اپنے پھل توں سُنجھانا ویندے کیونکہ جھاڑیاں وِچوں انجِیر نئیں توڑیندے اَتے نہ ایجھڑ بیری توں انگور۔
45
۴۵۔چنگا بندہ اپنے دِل دے چنگے خزانے وِچوں چنگیاں شئیاں کڈھیندا ہِےاَتے بُرا بندہ بُرے خزانے وِچوں بُریاں شئیاں کڈھیندا ہِےکیونکہ جو کجھ دِل وِچ بھریا ہویا ہِے اوہو اوُندے مُنہ تے آندے۔
46
۴۶۔جڈا تُساں میڈے آکھن تے عمل نئیں کریندے تاں کیوں میکوں خداوند خداوند آدھے ہو؟
47
۴۷۔جو کوئی میڈے کول آندے تے میڈیاں گالہیں سُن کے اُنہاں تے عمل کریندے میں تُہاکوُ ڈسیندا ہاں کہ اوہ کئیں دی کار ہِے۔
48
۴۸۔اوہ اوُں بندے دی کار ہِے جئیں نے گھر بناندے ویلے زمین ڈونگی کھود کے چٹان تے بنیاد رکھی ۔ جیہڑے ویلے طوفان آیا اَتے ہَڑ نےاوُں گھر کوُ ٹکر ماری پر اوُں کوُ نہ ہلا سگیاکیوں جو اوہ مضبوط بنی ہویا ہا۔
49
۴۹۔پر جو سُن کے عمل نئیں کریند اوہ اوُں بندے دی کار ہِے جئیں نے زمین تے گھر کوُ بے بُنیاد بنایا ہِے ۔ جیہڑے ویلے ہَڑ اوُں دے تے زور نال آیا تاں اوہ جلدی نال ڈھِے پیا اَتے اوہ گھر بالکل برباد تھی گیا۔