1
۱۔ سبت دے ڈیں تاں اُنہاں نے حکم دے مطابق آرام کیتا۔ لیکن فجر سویل، چھن چھن دے پہلے ڈینہ، اوہ سارے خوشبودار مصالحے جیہڑے اُنھاں تیار کیتے ہَن، گِھن کے قبر تے آئیاں۔
2
۲۔تے اُنہاں پتھر دی سِل کوُں قبر توں ہٹیا ہویا پاتا۔
3
۳۔اوہ اندر داخِل تھیاں لیکن یسوع دی لاش نہ ہَائی۔
4
۴۔وَل ایویں تھیا کہ جَڈاں اوہ اوُں بارے وِچ حیران ہَن، تاں ڈیکھو ڈو بندے چمک دار لباس پاتے ہوئے اُنہاں کول آکھڑے تھئے۔
5
۵۔جیئں ویلے اوہ عورتاں ڈر گئییاں تے اُنہاں اپنے سر زمین تے جُھکائے اَتے اُنہاں اُوں عورتاں کوُں آکھیا۔تساں جیندے کوُں مویاں اِچ کیوں گولیندیاں ہیوے؟۔
6
۶۔اوہ اِتھاں کئے نئیں بلکہ زندہ تھِی گیا ہے! یاد کرو، جیئیں ویلے او گلیل وِچ ہا تے اوُں تہا کوں کیا آکھیا ہائی۔
7
۷۔ضروری ہِے جو ابنِ آدم گناہ گاراں دے حوالے کیتا ونجے تے مصلوب تھیوے تے تریجے ڈینہ جیندا تھی ونجے۔
8
۸۔عورتاں کوُں اوُندیاں گالہیں یاد ہَن۔
9
۹۔تے اوہ قبر توں ولیاں تے اُنہاں شاگرداں تے باقی سبھناں کوُں وی ایہہ گالہیں ڈسیاں۔
10
۱۰۔ جِنہاں نے رسولاں نال ایہہ گالہیں کیتاں اوہ، مریم مگدلینی،یوآنہ ، مریم یعقوب دی ماں تے بہوں ساریاں عورتاں ہَن۔
11
۱۱۔ پرایہہ گالہیں رسولاں کوُں بے کار معلوم تھِیاں تے اُنہاں عورتاں دا یقین نہ کیتا۔
12
۱۲۔وَل پطرس اُٹھیا، تے قبر تک دَوڑا گیا تے جُھک کے نظر کیتی تے کفن ای کفن ہا وَل پطرس حیران تھِی کے اپنے گھر لگا گِیا۔
13
۱۳۔تے ڈیکھو ڈو بندے اُوں ڈیہاڑے اوں وَستی ول ویندے پئے ہَن جیندا ناں اماؤس ہائی، جیہڑا یروشلیم تھوں ست میل دے فاصلے تے ہا۔
14
۱۴۔اُنہاں اوُں گالہیں دے بارے وِچ جیہڑیاں تِھیاں ہَن، آپس وِچ گل بات کریندے ویندے ہَن۔
15
۱۵۔جڈاں اوہ ایہہ گالہیں کریندے پئے ہَن تے ہک بئے کوُں سوال کریندے پئے ہَن تے ایویں تِھیا جو یسوع آپ اُنہاں دے نال ٹرن پے گیا۔
16
۱۶۔لیکن اُنہاں دِی اکھیاں کوُں بند کیتا گیا ہا کہ اوُں کوُں سنجان نہ سگن۔
17
۱۷۔یسوع اُنہاں کوُں آکھیا، ''تُساں ڈُووَے ٹردیاں کیہڑیاں گالہیں دا ذِکر کریندے پئے ہیوے؟۔ اوہ پریشان تِھی کے کھڑ گئے۔
18
۱۸۔اُنہاں وِچوں ہیک جیندا ناں کُلیپاس ہا جواب اِچ اوُں کو آکھیا کیاتُوں یروشلیم وِچ کلہا بندہ ہیں، جیہڑایں گالہیں کوُں نیئں جاَن دا جیہڑیاں انِہاں ڈینہاں وچ تِھیاں ہن؟
19
۱۹۔یسوع اُنہاں کوُں آکھیاء ''کیہڑیاں گالہیں؟ اُنہاں نے اوُں کو آکھیا'' یسوع ناصری دے متعلق جیہڑا خدا تے ساری امت آسطے کلام کرن وِچ قدرت آلا نبی ہائی۔
20
۲۰۔تے کیویں سردار کاہن تے ساڈے وڈیریاں نے اوُں کوُ پکڑوایا تے اوُندے تے مَوت دا فتویٰ لایا تے مصلوب کرڈتا۔
21
۲۱۔پر ساکوُں تاں اُمید ہَائی جو ایہو ہِے جیہڑا اسرائیل کوُں آزاد کرویسی، ہاں تے اِتھاں سب دے علاوہ اِتھاں گالہیں کوُں ہُن تِریجا ڈینہ تھی گیا ہے۔
22
۲۲۔لیکن ساکوں کُج عورتاں حیران کر ڈتا، جد اوہ سجری سویل قبر تے گییاں۔
23
۲۳۔تے جڈاں اوُندی لاش نہ ڈِٹھی تے ایہہ آدھیاں ہویاں آئیاں کہ اساں رویا وِچ فرشتیاں کوُں ڈِٹھاہے، جیہڑے ایہہ پئے آدھے ہَن کہ اوہ جیندا ہے۔
24
۲۴۔کُجھ لوک جیہڑے ساڈے نال ہَن جیہڑے قبر دَو گئے تے جیویں عورتاں آکھیا ہائی، اوُویں ایں ہا لیکن اُتھاں اوُں کوُں نہ ڈِٹھا۔
25
۲۵۔یسوع نے اُنہاں کوُں آکھیا، ''اے گالہو تے اُنہاں گالہیں تے جیہڑیاں نبیاں کیتیاں ہن، سستی نال یقین کرن آلیو!
26
۲۶۔کیا مسیح کیتے ایہہ ضروری ہِے جو ڈکھ چاوے، تے اپنے جلال وچ داخل تھیوے؟
27
۲۷۔وَلا موسیٰ تَوں شروع کرکے ساریاں نبیاں دے ذریعے اپنے متعلق لکھیاں ہوئیاں ساریاں گالہیں بیان کیتیاں تے سمجھائیاں۔
28
۲۸۔تے جڈاں اوہ وستی کول جتھاں ویندے پئے ہَن پہنچ گئے یسوع دے عمل تھوں ایویں معلوم تھیا جو او اَگے ونجنا چاہندا ہے۔
29
۲۹۔لیکن اُنہاں اوُں کوُں مجبور کیتا تے آکھیا، ساڈے کول رَاہو کیوں جو شام تھیندی پئی ہے ڈینہ قریباً لیہہ گیا ہے۔ وَلا یسوع اندر گیا تے انہاں نال رہیا۔
30
۳۰۔جیئں ویلے اُنہاں نال کھاون بیٹھا تے ایویں تھیا، اوں روٹی گھن کے برکت ڈے کے توڑی تے انہاں کوُں وی ڈتی۔
31
۳۱۔ولا اُتھاں اُنہاں دیاں اکھیاں کھُل گیئاں تے انہاں اوُں کوُں پچھان گدا۔ تے ولا اوہ انہاں دی نظرتھوں غیب تھی گیا۔
32
۳۲۔انہاں ہک بئے کوں آکھیاء ؛؛ کیا جڈاں اوہ راہ وِچ ساڈے تے کلام دے راز کھولیندا پیا ہاتاں کیا ساڈے دِل جوش اِچ بھریج نہ ویندے ہَن؟
33
۳۳۔اوں ویلے اوہ اٹھے تے واپس یروشلیم دو لگے گئے۔ انہاں اوں یاراں تے باقی ساریاں کوں کٹھیاں پائے۔
34
۳۔ اوہ آدھے پئے ہَن ''بے شک خداوند جیندا تھی گِیا ہِے شمعون کوُں وکھالی ڈِتا ہے۔
35
۳۵۔تے انہاں اوہ ساریاں گالہیں جیہڑیاں راہ وچ تھیاں ہن، انہاں کوں ڈسایاں جو کیویں روٹی توڑیندیاں یسوع اُنہاں تے ظاہر تھیا۔
36
۳۶۔تے جیئں ویلے اُتھاں ایہہ گالہیں کیتیاں تے یسوع انہاں وچ آگیا تے انہاں کوں آکھیا، تہاڈی سلامتی ہووے۔
37
۳۷۔لیکن اوہ خوفزدہ تے بہوں ڈرگئے ہَن، تے ایہہ سمجھدے پئے ہَن کہ کہئیں روح کو ڈٹھا ہے۔
38
۳۸۔یسوع اُنہاں کوُں آکھیا، ''تساں کیوں گابھردے وَے؟ دل وچ سوال کیوں اٹھدے پئے ہن؟
39
۳۹۔ میڈے ہتھاں تے پیراں کوُں ڈیکھو کہ میں اِی ہاں میکوں ہتھ لاؤ تے ڈیکھو کیوں جو روح دیاں ہڈیاں تے گوشت نیئں ہوندا جیویں میڈے وِچ ڈیدھے ہیوَے''۔
40
۴۰۔ایہہ آکھ کے اوُں اپنے ہتھ تے پیر اُنہاں کوُ ڈکھائے۔
41
۴۱۔جَد خوشی دے سببوں اُنہاں کوں یقین نہ آیا تے حیران ہَن۔ تے یسوع اُنہاں کوُں آکھیا ''کِیا تہاڈے کول کھاون آسطے کجھ ہے؟
42
۴۲۔اُنہاں اوں کوُں مچھی وا بھنیا ہویا ہِک ٹکڑا کھاون آسطے ڈتا۔
43
۴۳۔یسوع اوں کوُںگھِن کے اُنہاں دے سامنے کھا ہدا۔
44
۴۴۔اوُں انہاں کوں آکھیاء ''میں تہاکوں آکھیا نہ ہی جیئں ویلے میں تہاڈے کٹھے ہاسی جو ضرور ہے کہ جتنیاں گالہیں موسیٰ دی توریت، تے نبیاں دے صحائف اَتے زبور وچ میڈے بارے وچ لکھیاں ہِن، پوریاں ہوسن۔
45
۴۵۔ول اوں اُنہاں دا ذہن کھولیا تانجو کتاب مقدس کوُں سمجھن۔
46
۴۶۔تے انہاں کوں آکھیا، ایں لکھیا لاتھے جو مسیح ڈکھ چاسی تے تریجے ڈینہ مویاں وچوں جیوندا تھی ویسی۔
47
۴۷۔تے یروشلیم توں شروع کرکے ساریاں قوماں وِچ توبہ تے گناہیں دی معافی دی منادی اوُندے نال نال کیتی ویسی۔
48
۴۸۔تساں اِنہاں گالہیں دے گواہ ہیوے۔
49
۴۹۔تے ڈیکھو جیندا میڈے باپ وعدہ کیتا ہے۔ مَیں اوُں کوُں تُہاڈے تے نازل کریساں۔ لیکن جے تائیں عالمِ بالا توں تہاکوں قوت دا لباس نہ مِلے ایں شہر اچ ای راہو۔
50
۵۰۔وَل اوہ اُنہاں کوُں بیت عنیاہ دے سامنے تک باہروں گھن گیا تے اپنے ہتھ چاتے اُنہاں کوں برکت ڈِتی۔
51
۵۱۔جیئں ویلے اُنہاں کوُں برکت ڈیندا پیا ہا تے ایویں تھیا کہ اوہ اُنہاں تو جدا تھِی گیا تے آسمان تے چاتا گیا۔
52
۵۲۔تے اوہ اوُں کوُں سجدہ کریندے وڈی خوشی نال یروشلیم دَو وَل گئے۔
53
۵۳۔تے ہر ویلے ہیکل وچ حاضر تھی کے خدا دی تعریف کریندے راہندے ہن۔